بی جے پی اب دنیا کی سب سے بڑی سیاسی جماعت، ارون سنگھ
30 مارچ 2015![](https://static.dw.com/image/16546318_800.webp)
پیر تیس مارچ کی شام نئی دہلی سے موصولہ جرمن نیوز ایجنسی ڈی پی اے کی رپورٹوں کے مطابق بھارتیہ جنتا پارٹی کے نیشنل سیکرٹری ارون سنگھ نے کہا ہے کہ گزشتہ مہینوں کے دوران اس جماعت نے اپنی رکنیت میں اضافے کی جو کامیاب مہم چلائی تھی، اس کے نتیجے میں مزید کئی ملین بھارتی شہری اس پارٹی میں شامل ہوئے اور اپنے ارکان کی مجموعی تعداد کے لحاظ سے BJP نے چین میں حکمران کمیونسٹ پارٹی کو بھی پیچھے چھوڑ دیا۔ چین آبادی کے لحاظ سے دنیا کا سب سے بڑا ملک ہے جس کے بعد دوسرے نمبر پر بھارت ہی کا نام آتا ہے۔
ارون سنگھ کے مطابق گزشتہ برس نومبر میں بی جے پی کے رجسٹرڈ ارکان کی تعداد قریب 30 ملین تھی جو نئے ارکان کی شمولیت کی ’انتہائی کامیاب مہم‘ کے بعد اب 89 ملین ہو چکی ہے۔ انہو ں نے مزید کہا کہ کمیونسٹ پارٹی آف چائنا یا CPC کے رجسٹرڈ ارکان کی تعداد گزشتہ برس جون میں 86.86 ملین تھی اور اب بھارتیہ جنتا پارٹی نے دنیا کی سب سے بڑی سیاسی جماعت کے طور پر سی پی سی کو واضح طور پر پیچھے چھوڑ دیا ہے۔
ڈی پی اے کے مطابق بھارت میں قومی سطح پر بی جے پی کی سب سے بڑی حریف پارٹی انڈین نیشنل کانگریس ہے جو گزشتہ برس ہونے والے عام انتخابات سے پہلے مسلسل ایک عشرے تک برسراقتدار رہی تھی۔ 2014ء کے آخر تک اس پارٹی کے رجسٹرڈ ارکان کی تعداد 38.8 ملین تھی اور اب یہ جماعت بھی اپنی رکنیت میں اضافے کے لیے قومی سطح پر ایک مہم شروع کر چکی ہے۔ اس آن لائن ممبرشپ مہم کے لیے کانگریس پارٹی خاص طور پر تیار کردہ ایک سمارٹ فون ایپلیکیشن استعمال کر رہی ہے۔