یہ تصویر جرمن وفاقی ریاست اور شہر بریمن کے غریب ترین سمجھے جانے والے علاقے کی ہے۔ بریمن میں ہر پانچویں شخص کو غربت کے خطرات لاحق ہیں۔ جرمنی میں غریب اسے تصور کیا جاتا ہے جس کی ماہانہ آمدنی درمیانے درجے کے جرمن شہریوں کی اوسط آمدنی سے ساٹھ فیصد سے کم ہو۔

بریمن میں تین ایسی غیر سرکاری تنظیمیں بھی سرگرم ہیں جنہوں نے غربت اور بھوک کے خلاف جنگ شروع کر رکھی ہے۔ یہ ادارے سپر مارکیٹوں اور بیکریوں سے بچا ہوا کھانا اور اشیائے ضرورت جمع کر کے ضرورت مند افراد میں تقسیم کرتے ہیں۔ ایسی ایک تنظیم ہر روز قریب سوا سو افراد کو کھانا مہیا کرتی ہے۔

جرمن شہر ایسن میں ایک نجی تنظیم نے غیر ملکی افراد کو مفت خوراک مہیا نہ کرنے کا فیصلہ کیا تھا جس پر شدید تنقید سامنے آنے کے بعد انہیں فیصلہ تبدیل کرنا پڑا۔ بریمن میں سرگرم تنظیموں کا تاہم کہنا ہے کہ وہ ہر رنگ اور نسل سے تعلق رکھنے والے غریب افراد کی مدد کرتے ہیں۔

اسی سالہ ویرنر ڈوزے رضاکارانہ طور پر غریبوں کو خوراک مہیا کرنے والی تنظیم بریمنر ٹافل کے لیے کام کرتے ہیں۔ کئی افراد ایک یورو فی گھنٹہ اجرت کے عوض اور بہت سے رضاکار طالب علم بھی ’غربت کے خلاف جنگ‘ کا حصہ ہیں۔

مشرقی جرمنی میں ہالے شہر کی رونقیں قابل دید تھیں لیکن اب ہالے نوئے اسٹڈ کا علاقہ ویرانی کا منظر پیش کرتا ہے۔ ہالے میں بے روزگاری کی شرح بھی زیادہ ہے اور روزگار ملنے کے امکانات بھی کم ہیں۔

ہالے میں محروم ترین طبقے کی مدد کے لیے انہیں کم داموں پر اشیائے خورد و نوش اور کپڑے فراہم کیے جاتے ہیں۔ ان ’سوشل مارکیٹوں‘ میں محروم ترین طبقے سے تعلق رکھنے والے بچوں اور معمر افراد کو ترجیحی بنیادوں پر یہ اشیا فراہم کی جاتی ہیں لیکن غریب ترین جرمن شہر ہالے میں ضرورت مندوں کی تعداد بڑھتی جا رہی ہے۔

یہ تصویر ایک ایسے اسٹور کی ہے جہاں گھر کی اشیا سستے داموں فراہم کی جاتی ہیں۔ اسٹور کے ملازم کا کہنا ہے کہ خریداروں کی اکثریت غیر ملکیوں اور مہاجرین کی ہوتی ہے۔ ان کے بقول غریب جرمن شہری شاید استعمال شدہ اشیا خریدنے میں شرمندگی محسوس کرتے ہیں۔

جرمنی میں قریب ایک ملین بچے غربت کا شکار ہیں۔ ایسے بچے نہ تو سالگرہ کی تقریبات منا پاتے ہیں، نہ کھیلوں کے کلبوں کا رخ کر سکتے ہیں۔ اعداد و شمار کے مطابق جرمنی میں ہر ساتواں بچہ حکومت کی فراہم کردہ سماجی امداد کا محتاج ہے۔

’شنٹے اوسٹ‘ نامی ایک تنظیم چھ سے پندرہ برس عمر کے پچاس بچوں کو اسکول کے بعد کھانا مہیا کرتی ہے۔ ادارے کی ڈائریکٹر بیٹینا شاپر کہتی ہیں کہ کئی بچے ایسے ہیں جنہیں ایک وقت کے لیے بھی گرم کھانا دستیاب نہیں ہوتا۔ اس تنظیم کی خواہش ہے کہ کوئی بچہ گھر بھوکا نہ جائے۔

بیٹینا شاپر کا کہنا ہے کہ ضرورت مند بچوں کی تعداد بڑھتی جا رہی ہے جن میں مہاجر بچوں کی بڑی تعداد بھی شامل ہے۔ ان کی تنظیم بچوں کو کھانا مہیا کرنے کے علاوہ ہوم ورک اور روز مرہ کے کاموں میں بھی معاونت فراہم کرتی ہے۔ دانت صاف کرنے کا درست طریقہ بھی سکھایا جاتا ہے۔

ایک اندازے کے مطابق قریب چھ ہزار بے گھر افراد برلن کی سڑکوں پر سونے پر مجبور ہیں۔ جرمن دارالحکومت کے ساٹھ فیصد بے گھر افراد غیر ملکی ہیں اور ان کی اکثریت کا تعلق مشرقی یورپی ممالک سے ہے۔

ایک حادثے میں یورگ کی ایک ٹانگ ضائع ہو گئی تھی اور وہ گزشتہ چھ برس سے بے گھر ہے۔ یورگ کا کہنا ہے کہ برلن میں بے گھر افراد کی تعداد بڑھنے کے ساتھ ساتھ ایسے افراد میں آپسی مقابلہ بھی بڑھ رہا ہے۔ تعمیر کے فن میں مہارت رکھنے والے اڑتیس سالہ یوگ کی خواہش ہے کہ کسی دن وہ دوبارہ ڈرم بجانے کے قابل ہو پائے۔

آٹھ جنوری 1964ء کو اس وقت کے امریکی صدر لِنڈن جانسن نے اپنے اسٹیٹ آف دا یونین خطاب میں امریکا میں غربت کے خلاف جنگ کا اعلان کیا تھا۔ تاہم اس بات کو 50 برس گزر جانے کے باوجود دنیا کی سب سے بڑی معیشت امریکا میں غربت کے خاتمے کا خواب آج بھی تعبیر سے کہیں دور ہے۔

بھوک غربت کا نتیجہ ہوتی ہے۔ امریکا کے ’ہاؤسنگ اینڈ اربن ڈویلپمنٹ ڈیپارٹمنٹ‘ کی ایک تحقیق کے مطابق نیویارک میں بے گھر افراد کی تعداد میں 2013ء کے دوران اضافہ ہوا۔ صرف لاس اینجلس ہی بڑے امریکی شہروں میں سے ایک ایسا ہے جہاں بے گھر افراد کی شرح نیویارک کے مقابلے میں زیادہ تھی۔

امریکا میں غرباء کے لیے مفت خوراک کی طلب تیزی سے بڑھ رہی ہے۔ نیویارک شہر کا فوڈ بینک شہر میں قریب چار لاکھ مفت کھانے روزانہ تقسیم کرتا ہے۔

امریکا کے ادارہ برائے مردم شماری کے مطابق 2009ء سے 2011ء کے عالمی اقتصادی بحران کے دوران ہر تین میں سے ایک امریکی شہری کم از کم دو ماہ تک غربت بھگت چکا ہے۔

بہت سے ایسے لوگ بھی ہیں جن کے پاس ملازمت تو ہے مگر وہ اپنی ضروریات زندگی پوری نہیں کر پاتے۔ ان کو عام طور پر ’ورکنگ پؤر‘ یا برسرروزگار غرباء کا نام دیا جاتا ہے۔ امریکا میں اس وقت کم سے کم فی گھنٹہ تنخواہ 7.25 ڈالر ہے۔ 2013ء کے ایک گیلپ سروے کے مطابق امریکا کے 20 فیصد بالغ شہری سال کے کسی نہ کسی حصے میں عام اشیائے ضرورت کی خریداری کے لیے بھی مشکلات کا شکار رہتے ہیں۔

ایک مفت ٹرکی کے حصول کا یہ کوپن دراصل نیویارک کے غربت کے شکار رہائشیوں کے لیے مسائل کو کسی حد تک حل کرنے کی کوشش کا حصہ ہے۔ بھوک کے خلاف نیویارک شہر کا اتحاد نامی تنظیم کے مطابق نیویارک میں گھروں میں رہائش پذیر ہر چھ میں سے ایک فرد کو گزشتہ برس ناکافی خوراک کا سامنا رہا۔

امریکی دارالحکومت واشنگٹن میں ’مَنا فوڈ سنٹر‘ Manna Food Center ہر ماہ ضرورت مندوں کو مفت ماہانہ خوراک کے پیکج فراہم کرتا ہے۔ ان میں سے بہت سے خاندان ہوتے ہیں۔ دنیا کے امیر ترین ملک میں 16 ملین سے زائد بچے غربت کی زندگی بسر کر رہے ہیں۔ یہ تعداد دراصل امریکا میں غرباء کی غیر متناسب شرح کی نمائندگی کرتی ہے۔

امریکا میں 2012ء کے دوران غربت سے متاثرہ افراد کی تعداد 47 ملین تھی جس میں 13 ملین بچے بھی شامل تھے۔ ملک میں جاری فوڈ سٹیمپ پروگرام کے تحت اطلاعات کےمطابق اقتصادی بحران سے قبل 26 ملین افراد کو مدد فراہم کی گئی تھی۔ اس کی طلب میں 2010ء کے بعد سے بہت تیزی سے اضافہ ہو رہا ہے۔ اس پروگرام کے تحت مستحق افراد کو طے شدہ اشیائے خوراک کے حصول میں مالی رعایت دی جاتی ہے۔