برطانیہ کے دفتر برائے قومی شماریات کے تازہ ترین اندازوں کے مطابق برطانیہ کی آبادی دوہزار بتیس تک ساڑھے بہتر ملین تک پہنچ سکتی ہے۔ ملکی آبادی میں اس اضافے کا سب سے بڑا ذریعہ تارکین ہوں گے۔

او ان ایس برطانیہ کا قومی دفتر برائے شماریات ہے۔ اس دفتر کی جانب سے منگل کو ایک بیان میں کہا گیا کہ 2022 ء میں لگائے گئے اندازوں کے مطابق برطاینہ کی کُل آبادی 67.6 ملین تھی جو 2032 ء تک 72.5 ملین تک پہنچ سکتی ہے۔ برطانیہ کی آبادی میں اضافے کا سب سے بڑا سبب غیر ملکیوں کی برطانیہ کی طرف ہجرت ہے۔

برطانیہ: تارکین وطن کی تعداد میں تشویشناک اضافہ، قوانین میں سختی کا فیصلہ

امیگریشن ریکارڈ

برطانیہ میں حالیہ دنوں میں امیگریشن کی ریکارڈ سطح دیکھنے میں آئی۔  قومی ادارہ برائے شماریات کی طرف سے پیش کردہ یہ تازہ ترین تخمینہ برطانوی معاشرے میں ایک نئی بحث کو ہوا  دینے کا سبب بن سکتا ہے۔ اس کے نتیجے میں یہ سوال زور و شور سے اٹھایا جا سکتا ہے کہ آیا برطانوی معاشرے کے عوامی سروسز کے ادارے آبادی میں اضافے سے پیدا ہونے والے چیلنجز سے نمٹنے کی صلاحیت رکھتے ہیں۔ نیز اس بارے میں بھی بحث چھڑنے کا امکان قوی ہے کہ آیا برطانیہ کی ترقی اور اس کی معیشت کو آگے بڑھانے کے لیے ملک میں غیر ملکی کارکنوں کی ضرورت ہے؟

  

 برطانوی حکوت کا ایجنڈا

برطانیہ کے موجودہ وزیر اعظم اور لیبر پارٹی کے لیڈر کیئر اسٹارمر اور ان کی حکومت نے امیگریشن کو کم کرنے کا عزم کر رکھا ہے۔ برطانیہ میں ہجرت اور تارکین وطن کا موضوع ایک عرصے سے غیر معمولی اہمیت کا حامل رہا ہے ۔ اس پر ہونے والی گرما گرم بحث ہی دراصل برطانیہ میں بریگزٹ ووٹ کو آگے بڑھانے میں بہت کلیدی ثابت ہوئی تھی اور اسی نے برطانیہ کی دائیں بازو کی ریفارم یو کے پارٹی کو جلا بخشی۔

برطانیہ کی نصف بالغ آبادی کو پہلی ویکسین لگا دی گئی

برطانیہ کے آفس فار نیشنل اسٹیٹسٹکس یا قومی دفتر برائے شماریات نے کہا ہے کہ برطانیہ میں تارکین وطن کی مجموعی تعداد (یعنی ملک میں آنے والوں میں سے ملک چھوڑنے والے افراد کی تعداد تفریق کرنے کے بعد) اگلے دس برسوں میں چار اعشاریہ نو ملین ہونے کی توقع کی جا رہی ہے۔

پیدائش اور اموت کی شرح

برطانیہ میں 2022-2032 کے دوران پیدائش اور اموات کی تعداد کو او این ایس نے ایک ہی جیسا بتایا۔ دفتر شماریات کا مزید کہنا تھا کہ آبادی کے اعداد و شمار میں  کسی بھی قدرتی تبدیلی کے بڑے پیمانے پر اثرات کے امکانات نہیں ہیں۔ گرچہ پیدائش کی شرح میں تھوڑا سا اضافہ متوقع تھا۔

بریگزٹ نے قوم پرستوں میں متحدہ آئر لینڈ کی سوچ پیدا کر دی

برطانیہ کے دفتر برائے قومی شماریات کے تخمینے یہ بھی ظاہر کرتے ہیں کہ 2028 ء کے وسط کے بعد کے سالوں میں برطانیہ کی طرف تارکین وطن کی سالانہ نیٹ مائیگریشن تین لاکھ چالیس ہزار تک پہنچنے کی توقع ہے۔ ان اعداد و شمار سے یہ انکشاف بھی ہوا ہے کہ 2023 ء کے جون کے ماہ تک برطانیہ میں 9 لاکھ سے زائد تارکین وطن کا ریکارڈ دیکھنے میں آیا۔  

او این ایس کے اعداد و شمار سے پچھلے سال برطانیہ کی آبادی میں ایک فیصد کے اضافے کی نشاندہی ہوئی تھی۔  2023 ء کے وسط تک سالانہ اعتبار سے ایک فیصد اضافے سے آبادی  68.3 ملین ہو گئی جس کی سب سے بڑی وجہ امیگریشن تھی۔

دوسری جانب بریگزٹ کے بعد ویزہ پالیسیوں میں تبدیلی کے سبب یورپی یونین سے برطانیہ آنے والے تارکین وطن کی تعداد میں واضح کمی واقع ہوئی۔ دریں اثناء بریگزٹ کی نئی ویزہ پالیسی نے بھارت، نائجیریا اور پاکستان سے برطانیہ آنے والے تارکین وطن کی تعداد میں اضافے کا سبب فراہم کیا۔ ان میں زیادہ تر ایسے ملازمین تھے جو برطانیہ کی صحت اور سماجی نگہداشت کی آسامیاں پُر کرنے کے لیے آئے۔

ک م/ ع ت(روئٹرز)