اس قلعے کی بنیاد افغان بادشاہ فرید خان نے، جو شیر شاہ سوری کے نام سے مشہور ہوا، تقریباً پونے پانچ سو سال قبل مئی 1542ء میں رکھی تھی۔ پتھر اور چونے سے بنائے گئے اس قلعے کی تعمیر قریب پانچ سال میں مکمل ہوئی تھی۔ بعد میں اس قلعے میں شیر شاہ سوری کے بیٹے سلیم شاہ کے دور میں توسیع بھی کی گئی تھی۔

شیر شاہ سوری نے روہتاس قلعہ گکھڑوں کے حملوں سے بچنے کے لیے فوجی حکمت عملی کے تحت تعمیر کرایا تھا۔ اس کی تعمیر میں تین لاکھ سے زائد فوجیوں اور مزدوروں نے حصہ لیا تھا۔ اس قلعے کے بارہ دروازے تھے اور مجموعی طور پر اس کی تعمیر پر سولہ کروڑ بہلولوی سکے لاگت آئی تھی۔ تصویر میں اس قلعے کا ایک دورازہ اور ٹوٹی ہوئی فصیل کا ایک حصہ نظر آ رہا ہے۔

چوہتر فٹ اونچا سہیل دروازہ، جو سہل یا سوہل دروازہ بھی کہلاتا ہے، روہتاس قلعے کا وہ واحد دروازہ ہے، جسے اب تک سب سے کم نقصان پہنچا ہے۔ قلعے میں داخلے کی اس جگہ کے اندرونی حصے میں اس دور کے ایک بزرگ سہیل خان غازی کا مزار بھی ہے اور اسی نسبت سے اسے سہیل دروازہ کیا جاتا ہے۔

شیر شاہ سوری نے یہ قلعہ صدیوں پہلے بھارت میں تعمیر کردہ اسی طرح کے ایک دوسرے قلعے کی طرز پر بنوایا تھا۔ سنسکرت میں رہتس کا مطلب ہے، سفید انڈہ۔ اونچائی سے دیکھنے پر یہ قلعہ ایک چمکتے ہوئے سفید انڈے کی طرح نظر آتا تھا۔ یہیں سے اس کا نام رہتس سے روہتاس پڑ گیا۔ اس تصویر میں فصیل کا ایک کِنگر نظر آ رہا ہے، جسے ماہر تیر انداز دشمنوں پر حملوں کے لیے استعمال کرتے تھے۔

چار سو ایکڑ رقبے پر اور اصل حالت میں غالباً اس سے بھی زیادہ علاقے پر پھیلا ہوا روہتاس قلعہ اب کوئی ایک مکمل عمارت نہیں ہے۔ اس کی باقیات جگہ جگہ پھیلی ہوئی ہیں کیونکہ کئی حصے وقت کے ساتھ تباہ ہو کر ناپید ہو چکے ہیں۔ اس تصویر میں کئی عشروں پہلے ٹوٹنے والا قلعے کا ایسا حصہ نظر آ رہا ہے، جو آج تک وہیں پڑا ہے۔ دروازے کے ساتھ اور اوپر محافظوں کی برجی اور پہرہ دینے کی جگہیں بھی دی دیکھی جا سکتی ہیں۔

اس تصویر کو دیکھ کر اندازہ لگایا جا سکتا ہے کہ پتھر کے بڑے بڑے ٹکڑوں، چونے اور چکنی مٹی سے تعمیر کیا گیا یہ قلعہ اپنی تکمیل کے بعد کتنا خوبصورت نظر آتا ہو گا۔ اس قلعے کی تعمیر علاقے کی جغرافیائی نوعیت کے حساب سے کی گئی تھی۔ قلعے کی فصیل کا یہ ٹوٹا ہوا حصہ قریب سے دیکھیں تو پتہ چلتا ہے کہ زمانے کی سختیوں اور مسلسل عدم توجہ کا نتیجہ کیسا ہوتا ہے۔

قلعے کا یہ حصہ رانی محل کہلاتا تھا، اب کالا محل بھی کہلاتا ہے، وجہ وقت کے ساتھ اس کی کالی ہو جانے والی رنگت ہے۔ شیر شاہ سوری کے بعد جب یہ قلعہ مغلوں کے قبضے میں آیا تو اس میں راجہ مان سنگھ کی بیوی بہن روپ کماری رہتی تھی، اسی لیے اس کا نام رانی محل پڑ گیا۔ آج یہ محل بری طرح ٹوٹ پھوٹ چکا ہے۔ جہاں کبھی شاہی شان و شوکت تھی، وہاں صدیوں سےکائی جمی ہے اور طاق ہیں جہاں صدیوں سے کوئی چراغ نہیں جلایا گیا۔

روہتاس قلعے کا یہ حصہ غیر معمولی حد تک اچھی حالت میں ہے۔ کافی اونچی بیرونی فصیل پر تھوڑے تھوڑے فاصلے پر قائم محرابی شکل کی وہ کِنگریاں دیکھی جا سکتی ہیں، جن کی تعداد شروع میں سات ہزار کے قریب تھی۔ محاصرے یا حملے کی صورت میں یہاں ماہر تیر انداز تعینات کیے جاتے تھے۔

اس قلعے کی شان و شوکت کے عروج کے دور میں یہاں ستر ہزار پیدل اور گھڑ سوار فوجی قیام کرتے تھے۔ قلعے کے دفاعی اور عوامی حصوں کے درمیان 1750 فٹ طویل ایک داخلی دیوار بھی موجود تھی۔ قلعہ تعمیر ہونے پر شیر شاہ سوری نے کہا تھا کہ اس نے گکھڑوں کی پیٹھ میں خنجر گھونپ دیا ہے۔ لیکن اب وقت اس قلعے کی پیٹھ میں خنجر گھونپ چکا ہے۔

روہتاس قلعے کی فصیل سے کچھ دور اور ایک تالاب کے قریب ایک عید گاہ آج بھی موجود ہے۔ یہاں پانچ سو تک نمازی نماز ادا کر سکتے ہیں۔ بظاہر یہ عید گاہ قلعے جتنی قدیم نہیں لگتی لیکن اس کے بہت اچھی حالت میں ہونے کی ایک وجہ اس کا عیدین کے موقع پر ابھی تک مقامی آبادی کے زیر استعمال ہونا بھی ہے۔

روہتاس قلعے کی قدیم حدود کے اندر نظر آنے والے اکا دکا باغیچے ابھی بھی کافی بہتر حالت میں ہیں۔ اپنی موجودہ حالت میں یہ باغیچے قدیم اور جدید کا امتزاج نظر آتے ہیں۔ اس علاقے میں جگہ جگہ سانس لیتی تاریخ گواہ ہے کہ صدیوں پہلے جو روہتاس ایک قلعہ بند شہر کی طرح تھا، وہ اب اپنے ہی کھنڈرات کی وجہ سے پہچانا جانے والا ’روہتاس گاؤں‘ کہلاتا ہے۔

محکمہٴ آثار قدیمہ کے زیر انتظام یہ قلعہ یونیسکو نے عالمی ثقافتی میراث کہلانے والے تاریخی مقامات کی فہرست میں شامل کر رکھا ہے لیکن پھر بھی اس کی دیکھ بھال پر زیادہ توجہ نہیں دی جاتی۔ بحالی منصوبوں میں غیر ملکی ادارے بھی دلچسپی رکھتے ہیں لیکن انہیں اجازت نہیں دی جاتی۔ اس تصویر میں اونچی نیچی پہاڑیوں پر قائم روہتاس قلعے کا ایک مکمل ماڈل دیکھا جا سکتا ہے۔