مولوی فقیر محمد کے ساتھیوں نے اس اقدام پر شدید رد عمل کا اظہار کرتے ہوئے کہا ہے کہ اس سے یقیناﹰ تنظیم کمزور ہوگی اور وہ اپنا علیحدہ گروپ بنا نے کا سوچ رہے ہیں۔

کالعدم تحریک طالبان پاکستان کے سربراہ حکیم اللہ محسود اور نائب کمانڈر مولوی فقیر کے مابین اُس وقت اختلافات پید اہوئے، جب مولوی فقیر نے حکومت کے ساتھ بات چیت کا عندیہ دیا، جس کے بعد حکومت نے زیر حراست اُن کے 145ساتھیوں کو خیر سگالی کے طور پر رہا کیا۔ اس پر کالعدم تحریک طالبان پاکستان کی شوریٰ نے انہیں تحریک سے علیحدہ کرنے کا اعلان کیا اور اس بات کی تصدیق طالبان کے ترجمان احسان اللہ احسان نے بھی کی ہے۔ ان کا کہنا ہے کہ شوریٰ بہت جلد نئے ڈپٹی کمانڈر کے نام کا اعلان کرےگی۔

دوسری جانب تجزیہ کاروں کا کہنا ہے کہ سکیورٹی فورسز کی جانب سے مختلف علاقوں میں آپریشن کی وجہ سے طالبان کافی حد تک کمزور ہوچکے ہیں اور اب حکومت کو ان کے خلاف مؤثر کارروائی کرنی چاہیے۔ تاہم وزیرستان سے تعلق رکھنے والے سینیٹر صالح محمد کی رائے اس سے مختلف ہے۔ ان کا کہنا ہے، ”کوئی بھی مسئلہ آپریشن سے حل نہیں کیا جاسکتا۔ جب تک جرگے ہوا کرتے تھے اور مذاکرات جاری تھے تو حالات اس قدر خراب نہیں ہوئے لیکن پاکستان نے امریکہ کی ایماء پر مذاکرات اور بات چیت کا سلسلہ ختم کردیا، جس نے حالات کو تباہی کی جانب گامزن کردیا ہے۔ ان کا کہنا تھا کہ جرگوں اور مذاکرات کے بغیر یہ مسائل کبھی حل نہیں ہوں گے۔ آپریشن اور جنگ سے کبھی بھی مسائل حل نہیں ہوئے۔ آپ نے آخر میں مذاکرات کی میز پر آکر بیٹھنا ہوگا۔“

دوسری جانب پاکستان کے قبائلی علاقے وزیرستان میں پناہ لینے والی افغان جنگجو حقانی نیٹ ورک کے سراج الدین حقانی نے طالبان پر زور دیا ہے کہ وہ پاکستان میں کارروائیوں کی بجائے افغانستان میں امریکہ اور نیٹو فورسز کے خلاف کارروائیوں پر توجہ مرکوز کریں۔ ان کے اس مؤقف کو پاکستان کے کئی جنگجو گروپوں کی حمایت بھی حاصل ہے۔ چند روز قبل پاکستان نے بھی پہلی مرتبہ طالبان سے کرزئی حکومت کے ساتھ مذاکرات کرنے کی اپیل کی تھی۔ طالبان کے ساتھ مذاکرات کی فضاء اس دن سے ہموار ہونا شروع ہوئی، جب امریکہ اور اتحادیوں نے طالبان کو قطر میں رابطہ آفس کھولنے کی اجازت دی۔

دوسری جانب پاکستانی طالبان کے مختلف گروپوں کی طرف سے آج بھی پاکستان کے قبائلی علاقوں اور خیبر پختونخوا میں سکیورٹی فورسز ، حکومتی اداروں اور سیاسی لوگوں کے اجتماعات کو نشانہ بنایا جا رہا ہے۔ ان مسلح عسکریت پسندوں کےگروپوں نے ایک مرتبہ پھر پولیس اور اسکولوں کو نشانہ بنا نا شروع کیا ہے۔ سال رواں کے 67 دنوں کے دوران نو خود کش حملوں اور 88 بم دھماکوں میں پولیس اہلکاروں سمیت183افراد ہلاک جبکہ361 سے زیادہ زخمی ہوئے، جبکہ بارہ اسکولوں کو بھی دھماکوں سے اُڑایا گیا۔

رپورٹ: فرید اللہ خان / پشاور

ادارت: امتیاز احمد