ایران اور ترکی نے ایک نئے مشترکہ ریلوے ٹریک کی تعمیر پر اتفاق کیا ہے۔ یہ نیا منصوبہ خطے میں تجارتی نقل و حمل کے لیے اسٹریٹجک اہمیت کا حامل تصور کیا جا رہا ہے۔ ایرانی وزیرِ خارجہ عباس عراقچی نے آج اتوار کے روز بتایا کہ اس منصوبے سے دونوں ممالک کے درمیان اقتصادی تعاون کے ایک نئے دور کا آغاز ہو گا۔

ایرانی حکام کے مطابق یہ تازہ ترین منصوبہ ریلوے ٹرانزٹ روٹ کے نام سے تعمیر کیا جائے گا۔ یہ لائن ایران سے لے کر ترکی کے سرحدی علاقے آرالک تک پہنچائی جائے گی۔   اس منصوبے کو مکمل ہونے میں تین سے چار سال لگ سکتے ہیں۔

ایران کی وزیرِ ٹرانسپورٹ فرزانہ صادق نے قبل ازیں کہا تھا کہ یہ نئی ریلوے لائن سلک روڈ کے جنوبی حصے کو جدید آل ریل کاریڈور میں تبدیل کر دے گی جس سے سامان کی ترسیل تیز، کم خرچ اور غیر ضروری رکاوٹوں کے بغیر ممکن ہو  سکے گی۔

ہفتے کو ترک وزیرِ خارجہ ہاکان فیدان کے ساتھ مشترکہ پریس کانفرنس میں عراقچی نے کہا کہ دونوں ممالک نے باہمی تجارت اور سرمایہ کاری کے فروغ کے لیے رکاوٹیں دور کرنے پر اتفاق کیا ہے۔
ان کے مطابق، "اس نئے منصوبے کی علاقائی اہمیت پر تفصیلی بات چیت ہوئی اور امید ظاہر کی گئی کہ تعمیر کا آغاز جلد کیا جا سکے گا۔"

سلک روٹ صدیوں تک مشرقی ایشیا، مشرقِ وسطیٰ اور یورپ کو باہم جوڑنے والا تجارتی راستہ رہا ہے۔ 2013 میں چین نے بیلٹ اینڈ روڈ انیشی ایٹو کا آغاز کیا تھا، جسے نیو سلک روڈ کا درجہ دیا جاتا ہے۔

ایران خطے میں بنیادی ڈھانچے اور تجارت کے فروغ کے ذریعے اپنے اوپر عائد سخت پابندیوں سے متاثرہ معیشت کو تقویت دینے کی کوشش کر رہا ہے اور یہ ریلوے منصوبہ انہی کوششوں کا اہم حصہ قرار دیا جا رہا ہے۔

ادارت: امتیاز احمد