ترک حکومت کے بقول یہ واقعہ کسی صورت بھی نظر انداز نہیں کیا جائے گا۔ ترک صدر عبداللہ گل نے اس واقعے کی مذمت کرتے ہوئے کہا ’’ ہوسکتا ہے کہ ایف چار جنگی طیارہ شامی حدود میں داخل ہوگیا ہے‘‘۔ ان کے بقول دوران پرواز تیز رفتاری کی وجہ سے بغیر کسی غلط مقصد کے اکثر ایسا ہو بھی جاتا ہے۔ ترک وزیراعظم رجیب طیب ایردوان کی صدارت میں ایک ہنگامی اجلاس ہو چکا ہے جبکہ انہوں نے دوسرا طلب کر لیا ہے۔ اس اجلاس میں کابینہ کے چیدہ چیدہ وزراء، فوج کے سربراہان اور دیگر اعلی سرکاری اہلکار شرکت کریں گے۔ ایردوان نے کہا کہ بات چیت کے بعد انقرہ حکومت اپنا موقف واضح کرے گی اور اس تناظر میں تمام ضروری اقدامات اٹھائے جائیں گے۔ انقرہ میں وزیراعظم کے دفتر سے جاری ہونے والے ایک بیان کے مطابق شام نے اس واقعے کی ذمہ داری قبول کرتے ہوئے معذرت کی ہے۔ دمشق حکام کے بقول ایک نامعلوم ہدف شامی حدود میں داخل ہوا اور شناخت واضح نہ ہونے پر اسے نشانہ بنایا گیا۔ ترکی اور شام کی جانب سے بحیرہء روم میں دونوں پائلٹس کی تلاش کا کام جاری ہے۔

اس سے قبل اپریل کے مہینے میں شامی افواج نے ترکی کی حدود میں فائرنگ کرتے ہوئے متعدد شامی باشندوں کو ہلاک کر دیا تھا اور اس دوران ترک شہری بھی ہلاک ہو گئے تھے۔ اس وقت ترکی نے دمشق حکومت کو خبردار کیا تھا کہ نیٹو کا رکن ہونے کی صورت میں وہ آرٹیکل 5 پر عمل کرنے کی درخواست کر سکتا ہے۔ اس کا مطلب یہ ہے کہ نیٹو میں شامل کسی بھی ملک کے خلاف کارروائی، پورے اتحاد پر حملہ تصور کی جائے گی۔ سیاسی امور کے ماہرین کا کہنا ہے کہ اس واقعے کے بعد شام کے خلاف نیٹو کارروائی کے موضوع پر ایک مرتبہ پھر بحث شروع ہو سکتی ہے۔ ماہرین کے بقول جیٹ طیاروں کی جانب سے فضائی حدود اس نوعیت کی کی خلاف ورزی پر، ان کا پیچھا کیا جاتا ہے اور انہیں اترنے پر مجبور کیا جاتا ہے نا کہ گرا دیا جائے۔

گزشتہ برس مارچ میں شامی صدر بشارالاسد کے خلاف شروع ہونے والی تحریک کے بعد سے ہزاروں افراد ترکی ہجرت کر چکے ہیں۔ ماہرین کا کہنا ہے کہ اب دونوں پڑوسی ممالک کے پہلے سے کشیدہ حالات میں اب مزید تناؤ پیدا ہو گا۔

ai /ah (Reuters, AFP)