ترکی میں خاندانی بہبود کی وزارت کا کہنا ہے کہ ملک میں تباہ کن زلزلے کے سبب اپنی ماں سے جدا ہو جانے والی بچی تقریباً دو ماہ بعد اپنی ماں سے دوبارہ مل گئی ہے۔

ترکی اور شام میں تباہ کن زلزلہ، ایک ماہ بعد صورتحال کیسی ہے؟

اس بچی کا اصل نام ویتن ہے اور حکام کے مطابق ڈی این اے ٹیسٹ کے ذریعے رشتے کی تصدیق ہو جانے کے بعد بچی کو اس کی ماں کے حوالے کر دیا گیا۔

زلزلے سے سات ملین ترک اور شامی بچے متاثر، یونیسیف

وزارت کے مطابق بچی کی عمر صرف ساڑھے تین ماہ ہے اور نرسوں نے ترکی زبان میں اس کا نام غزیم بیبک (یعنی پراسرار بچہ) رکھ دیا۔

ترکی اور شام کے زلزلے میں ہلاکتیں پچاس ہزار سے بھی متجاوز ہو جانے کا خدشہ، اقو ام متحدہ

جنوبی ترکی میں آنے والے تباہ کن زلزلے کی زد میں آنے کے پانچ دن سے بھی زیادہ عرصے کے بعد صوبہ ہاتائی میں ایک عمارت کے ملبے سے اس بچی کو نکالا گیا تھا۔ اس تباہ کن زلزلے کی وجہ سے دسیوں ہزار افراد ہلاک ہو گئے۔ وزارت نے بتایا کہ بچی کی صحت کو کوئی مسئلہ لاحق نہیں ہے۔

ترکی اور شام کا زلزلہ صدی کی بدترین آفت، ڈبلیو ایچ او

سانحے میں خاندان تباہ ہو گیا

ترکی کے خبر رساں ادارے انادولو کی اطلاعات کے مطابق زلزلے میں بچی کی ماں یاسمین بیگداس زخمی ہو گئی تھیں، جب کہ ان کے والد اور بڑے بھائی ہلاک ہو گئے۔

اصلی زلزلے اور جگاڑو دنیا

خاندانی اور سماجی سروس کی وزیر دیریا یانیک کا کہنا تھا، ''ماں اور اس کے بچے کو دوبارہ ملانا دنیا کے سب سے بہترین کاموں میں سے ایک ہے۔'' انہوں نے اپنی ایک ٹویٹ میں کہا، ''ویتن اب ہماری بچی بھی ہے۔''

ابتدائی طور پر اڈانا کے ایک ہسپتال میں ویتن کی دیکھ بھال کی گئی تھی اور پھر مزید طبی علاج کے لیے اسے صدر کے خصوصی طیارے کے ذریعے انقرہ لایا گیا تھا۔ جب اس بات کی تصدیق ہو گئی کہ یاسمین ہی اصل میں اس کی ماں ہیں، تو بچی کو واپس اڈانا لے جایا گیا۔

انادولو نیوز ایجنسی نے خاندانی بہبود کی وزیر کے حوالے سے بتایا ہے کہ یاسمین بھی پیر کے روز تک اڈانا کے ہسپتال میں ہی زیر علاج تھیں۔

واضح رہے کہ چھ فروری کو ترکی اور شام میں آنے والے تباہ کن زلزلے میں 56 ہزار سے بھی زائد افراد ہلاک ہو گئے تھے۔

ص ز/ ج ا (روئٹرز، نیوز ایجنسیاں)