ترکی نے باضابطہ طور پر اقوام متحدہ کی سلامتی کونسل سے شام کی جنگ کو روکنے کے لیے ’’ضروری کارروائی‘‘ کرنے کی درخواست کی ہے۔ ترکی کی طرف سے یہ اقدام بدھ کے روز مبینہ طور پر شام کی سرحد کے اندر سے فائر کیے جانے والے ایک مارٹر گولے کے فائر کیے جانے کے بعد سامنے آیا ہے۔

ترکی کی شام سے ملحق سرحد کے قریبی علاقے اکاکالے پر فائر کیے گئے ایک مارٹر گولے کی زَد میں آ کر ایک بچے سمیت چار افراد ہلاک جبکہ کم از کم 9 شدید زخمی ہو ئے تھے۔ ترک وزیر اعظم رجب طیب ایردوآن کے دفتر سے جاری ہونے والے ایک بیان کے مطابق شام کی اشتعال انگیزی کا جواب دیا جائے گا۔

دریں اثناء ترک فوج نے شامی فوج کی چوکیوں کو نشانہ بنایا ہے۔ دوسری جانب شام کے وزیر اطلاعات نے ترک باشندوں کی ہلاکت پر افسوس کا اظہار کرتے ہوئے کہا ہے کہ مارٹر گولہ فائر کیے جانے کی تحقیقات کی جائیں گی کہ ایسا کیوں ہوا۔؟

نیٹو اتحاد کا اجلاس

دریں اثناء بدھ کو رات گئے ترکی کی مشاورت سے برسلز میں 28 رکنی نیٹو کا ہنگامی اجلاس ہوا، جس میں آئندہ کی حکمت عملی طے کرتے ہوئے شام سے ’جارحانہ کارروائیاں‘ روکنے کا مطالبہ کیا گیا۔ نیٹو اتحاد کے ممبران کا کہنا تھا کہ وہ اپنے اتحادی ملک کے ساتھ کھڑے ہیں۔ نیٹو کے سیکرٹری جنرل آندرس فوگ راسموسن نے کہا کہ نیٹو اتحاد نئی پیشرفت کو ’’قریب اور بڑی تشویش ‘‘ سے دیکھ رہا ہے۔

اقوام متحدہ کی طرف سے مذمت

دوسری جانب اس تازہ واقعے کے بعد نیویارک میں اقوام متحدہ کی 15 رکنی سلا متی کونسل کا ہنگامی اجلاس طلب کرتے ہوئے ترکی اور شام کے مابین بڑھتی ہوئی کشیدگی پر تشویش کا اظہار کیا گیا۔ اقوام متحدہ کے سیکرٹری جنرل بان کی مون نے شام سے کہا ہے کہ ہمسایہ ممالک کی خودمختاری کا احترام کیا جائے۔

بان کی مون کا خبردار کرتے ہوئے کہنا تھا کہ شام کا تنازعہ ہمسایہ ملکوں تک پھیلنے کا خدشہ ہے۔ بان کی مون نے شام اور ترکی سے اس مسئلے کا سفارتی حل تلاش کرنے کے لیے کہا ہے۔

دریں اثناء امریکی وزیر خارجہ ہلیری کلنٹن نے شدید ردعمل کا اظہار کرتے ہوئے کہا ہے کہ آئندہ لائحہ عمل کے لیے انقرہ حکومت سے مشاورت کی جائے گی۔ انہوں نے صورتحال کو ’انتہائی خطرناک‘ قرار دیا ہے۔

( ia / ab (AFP, Reuters, dpa, AP