اس وادی میں کبھی کرد آباد تھے، جنہوں نے جدید ترک ریاست کے ابتدائی سالوں میں تونجیلی نامی علاقے میں پرتشدد بغاوت کی تھی۔ لیکن مشرقی مرجان وادی میں کردوں کی جگہ اب رفتہ رفتہ افغانوں نے لے لی ہے، جو غربت اور خونریزی سے فرار ہو کر پیدل اور ٹرکوں کے ذریعے براستہ ایران یہاں پہنچے۔

دو دہائیوں تک جاری رہنے والے تنازعات کے بعد، اب کچھ افغان واپس جانے کا سوچ رہے ہیں چاہے انہیں افغانستان میں طالبان کی سخت گیر حکمرانی کا سامنا کرنا پڑے۔

بیس سالہ چرواہے حافظ ہاشمی میمنی کا کہنا ہے کہ کوئی بھی اپنا ملک چھوڑنا نہیں چاہتا جب تک کہ ایسا کرنا بالکل مجبوری نہ بن جائے۔ ان کی منگیتر جنگ زدہ ملک میں ان کا بے تابی سے انتظار کر رہی ہے۔

''ہم یہاں آتے ہیں، چرواہے کا کام کرتے ہیں، پیسہ کماتے ہیں، اور اپنے خاندانوں کو بھیجتے ہیں۔‘‘

سخت زمین پر نائیلان سے بنے کچھ خیمے لگے ہوئے ہیں۔ یہ افغان خاندانوں کے نئے گھر ہیں۔ اس سے ذرا فاصلے پر، چند افراد ایک شیڈ میں اپنی بھیڑوں اور بکریوں سے دودھ نکال رہے ہیں۔

میمنی کا کہنا ہے، ''اگلے سال، میں افغانستان واپس چلا جاؤں گا۔ جنگ ختم ہو چکی ہے۔‘‘ میمنی کے مطابق، ''جب (افغان) ریاست طالبان سے لڑ رہی تھی، معیشت کو شدید نقصان پہنچا تھا۔ لیکن اب ہم واپس جانے کی منصوبہ بندی کر رہے ہیں۔‘‘

صدر رجب طیب ایردوآن کا اندازہ ہے کہ 300,000 افغان ترکی میں رہائش پذیر ہیں، جو جنگ زدہ شام کے 3.7 ملین افراد کی میزبانی بھی کرتا ہے۔

تونجیلی کے رہنے والے ترک شہری مصطفیٰ آجون کا کہنا ہے کہ مقامی لوگ افغانوں کی جانب سے ان کے ریوڑوں کی دیکھ بھال کرانے کے عادی ہو چکے ہیں۔ 67 سالہ آجون ان کے ساتھ مل کر بھیڑوں کے دودھ سے پنیر اور دہی بناتے ہیں۔ آجون کے مطابق، ''ہمارے بچے یا تو یہ کام نہیں کر سکتے یا نہیں کرنا چاہتے۔‘‘

یہ کام خطرناک بھی ہے۔ ایک شخص نے بندوق بھی اٹھا رکھی ہے۔ اس کا مقصد رات کو شکار کے لیے نکلنے والے بھیڑیوں اور ریچھوں کو بھیڑوں پر حملہ کرنے سے روکنا ہے۔

یہاں موجود ایک 55 سالہ افغان چرواہے کا کہنا ہے، ''میں اس طرح ریوڑ کی دیکھ بھال کرتا ہوں۔ میں یہاں سات سال سے ہوں، میں نے تین سال کام کیا اور افغانستان چلا گیا لیکن پھر یہاں دوبارہ آنے کا فیصلہ کیا۔‘‘ اپنے دردناک سفر کو یاد کرتے ہوئے ان کا کہنا ہے، ''خدا نے چاہا اور اگر میری صحت نے اجازت دی تو میں اگست میں افغانستان واپس جاؤں گا جب گرمی کی شدت کم ہونے لگے گی۔‘‘

یہاں موجود ایک اور 29 سالہ افغان چرواہے سلیمان نے اپنی افغان بیوی اور دو چھوٹے بچوں کو چار سال سے نہیں دیکھا۔ اس کا کہنا ہے کہ وہ اپنے کتوں کے ساتھ ترکی کے پہاڑوں میں چرواہے کے طور پر کام کرنا چھوڑ دیں گے۔ اپنی بیٹی کی تصویر دکھاتے ہوئے سلیمان نے کہا، ''مجھے پہاڑ بہت پسند ہیں۔ ترکی کے پہاڑ بہت خوبصورت ہیں۔‘‘

ب ج،ج ا (اے ایف پی)