آیا صوفیہ کی شاندار عمارت اس شہر کی پیچیدہ تاریخ کی درست غمازی کرتی ہے۔ سن 325 یہ عمارت ایک چرچ کے طور پر تعمیر کی گئی تھی۔ قبل ازیں یہ بت پرستوں کا ایک مقدس مقام تھا۔ سلطنت عثمانیہ نے سن 1453 میں اِسے مسجد بنا دیا۔ جدید ترکی کے اولین صدر مصطفیٰ کمال اتاترک نے سن 1935 میں اسے میوزیم کا درجہ دیا۔ پچاسی برس بعد ترک صدر رجب طیب ایردوآن نے اسے پھر مسجد بنا دیا تاہم سیاح اس عمارت کا وزٹ کر سکتے ہیں۔

آیا صوفیہ کے بعد چھ سو سالہ پرانی یہ عمارت سیاحوں کی سب زیادہ توجہ کا مرکز بنتی ہے۔ یہ وسیع و عریض محل سلطنت عثمانیہ کی شاہی رہائش گاہ کے طور پر بنایا گیا تھا۔ اسے دیکھنے کی خاطر ایک پورا دن درکار ہوتا ہے۔

استنبول میں تین ہزار سے زائد مساجد ہیں۔ سن 1609 میں تعمیر کی گئی یہ مسجد آیا صوفیہ کے بعد کئی برسوں تک سب سے زیادہ اہم مسجد رہی۔ اسے نیلی مسجد بھی کہا جاتا ہے۔ اس مسجد کو سلطنت عثمانیہ کی فن تعمیر کا ہیرا بھی قرار دیا جاتا ہے۔

استنبول پررونق بازاروں اور مارکیٹوں کے حوالے سے بھی مشہور ہے۔ گرینڈ بازار پندرہویں صدی سے ہی اس شہر کا اہم تجارتی مرکز رہا ہے۔ یہ دنیا کے سب سے بڑے بازاروں میں شمار کیا جاتا ہے۔ قیمتی قالینوں سے لے کر مصالحوں تک یہاں سبھی کچھ دستیاب ہے۔

کہا جاتا ہے کہ سو برس قبل تک استنبول میں ڈھائی ہزار سے زائد حمام تھے۔ اگرچہ اب ان کی تعداد کم ہو چکی ہے لیکن پھر بھی انتخاب کے لیے متعدد حمام موجود ہیں۔ ان میں سولہویں صدی کا سلطان حمام بھی ہے، جہاں خواتین اور مردوں کے نہانے کے لیے الگ الگ انتظام ہے۔

جیمز بونڈ کا کردار نبھانے والے شین کونری ، ٹام ہینکس اور جیکی چن سبھی نے چھٹی صدی کی اس عجوبہ بازطینی عمارت میں فلمی سین فلمائے ہیں۔ یہ زیر زمین واٹر ورلڈ آیا صوفیہ سے زیادہ دور نہیں۔ موسم گرما میں سورج کی تپش سے فرار چاہتے ہیں تو یہ بہترین مقام ہے۔

استنبول دنیا کا ایسا واحد میٹروپولس شہر ہے، جو یورپ اور ایشیا دو براعظموں پر پھیلا ہوا ہے۔ آبنائے باسفورس ترک شہر استنبول کو یورپ اور ایشیا میں تقسیم کرتی ہے۔ یہاں کا بوٹ ٹرپ انتہائی دلکش ہے جبکہ شہر کے تاریخی مقامات کو دیکھنے میں بھی مدد دیتا ہے۔

نو جزیروں پر مشتمل جزائر پرنس استنبول کا ایک ضلع ہے۔ پندرہ ہزار نفوس پر آباد پرنس جزائر کا ایک روزہ دورہ انتہائی دلکش قرار دیا جاتا ہے۔ اگر آپ پندرہ ملین آبادی والے استنبول کے مرکز سے کچھ سکون چاہتے ہیں تو یہاں ضرور جائیں۔

استنبول لذیز پکوانوں کی وجہ سے بھی شہرت رکھتا ہے۔ گالاتا بریج کے قریب ہی واقع مچھلی مارکیٹ مخصوص ترک پکوان ’بیلک ایکمک‘ کے لیے مشہور ہے۔ فرائڈ یا گرلڈ مچھلی کا یہ پکوان تازہ سالاد اور ٹوسٹڈ بریڈ کے ساتھ پیش کیا جاتا ہے۔ گوشت کے دلدادہ افراد کبابوں سے بھی لطف اندوز ہو سکتے ہیں۔

غروب آفتاب کے 360 ڈگری پیناراما دلکش نظارے کے لیے میڈن ٹاور بہترین مقام ہے۔ یہ باسفورس کے ایک چھوٹے سے جزیرے پر واقع ہے، جو بوٹ ٹرپ کے ذریعے قابل دسترس ہے۔ اٹھارہویں صدی کا یہ مینار مختلف مقاصد کے لیے استعمال کیا جاتا رہا تھا تاہم اب یہ سلیفی لینے کا ایک مرکز قرار دیا جاتا ہے۔

تین ہزار سے زائد مخلتف اشیاء کی دوکانوں والے اس صدیوں پرانے خریدو فروخت کے مرکز کی خاص بات یہ ہے کہ ایک ہی چھت کے نیچے کم وبیش ہر طرح کی اشیاء خریدوفروخت کے لیے موجود ہیں۔

یہاں پر چمڑے اور سلک کے ملبوسات تیار کرنیوالوں، جوتا سازوں، صّرافوں، ظروف سازوں، قالین بافوں، گھڑی سازوں، آلات موسیقی اور کامدار شیشے سے خوبصورت لیمپ تیار کرنیوالوں کی صدیوں سے چلی آ رہی دوکانیں بازار کی تاریخی حیثیت کا منہ بولتا ثبوت ہیں۔

گرینڈ بازار کو اپنے قیام کے بعد مختلف ادوار میں شکست وریخت کا سامنا کرنا پڑا۔ سولہویں صدی میں آنے والے زلزلے نے اس بازار کو بری طرح نقصان پہنچایا۔ لیکن منتظمین نے بڑی حد تک اسے اپنی اصل شکل میں برقرار رکھا ہے۔

ایک اندازاے کے مطابق روزانہ اڑھائی سے تین لاکھ افراد گرینڈ بازار کا رخ کرتے ہیں۔ ان میں مقامی افراد کے علاوہ بڑی تعداد غیر ملکی سیاحوں کی بھی ہے۔

خوبصورت نقش و نگار والے فانوسوں اور آنکھوں کو خیرہ کرتی روشنیوں والے دیدہ زیب لیمپوں کی دکانیں اس تاریخی بازار کی الف لیلوی فضا کو چار چاند لگا دیتی ہیں۔

بازار میں خریدار خاص طور پر ترکی کی سوغاتیں خریدنے آتے ہیں۔ ان میں انواع واقسام کی مٹھائیاں اور مصالحہ جات شامل ہیں۔

صدیوں پرانے اس بازار کی ایک قابل ذکر بات یہاں پر اس دور میں مہیا کی جانےوالی سہولیا ت ہیں۔ جن میں سب سے نمایاں یہاں لگائے گئے پانی کے نل ہیں جن سے آج بھی یہاں آنے والے اپنی پیاس بجھا ر ہے ہیں۔

بازار میں داخلے اور اخراج کے لئے مختلف اطراف میں اکیس دروازے ہیں اور ہر ایک دروازے کو مختلف نا م دیے گئےہیں۔

بازار میں خواتین کے دستی پرس یا ہینڈ بیگز سے لدی دوکانوں کی بھی کمی نہیں۔ یہاں پر اصل اور مصنوعی چمڑے اور مقامی کشیدہ کاری کے ڈیزائنوں سے مزین بیگ ملتے ہیں۔ اس کے علاوہ معروف بین الاقوامی برانڈز کی نقول بھی باآسانی دستیاب ہیں۔

طلائی زیورات اورقیمتی پتھروں کے شوقین مرد وخواتین کے ذوق کی تسکین کے لئے بھی گرینڈ بازار میں متعدد دوکانیں موجود ہیں۔

اس بازار کی ایک اور خاص بات یہاں کے دوکانداروں کا مختلف زبانوں میں گاہکوں سے گفتگو کرنا ہے۔ بازار میں گھومتے ہوئے چہرے پر مسکراہٹ سجائے دوکاندار گاہکوں کے ساتھ انگلش، عربی ، جرمن ، اردو اور ہندی زبانوں میں گفتگو کرتے سنائی دیتے ہیں۔

مقامی ہنرمندوں کے ہاتھوں سے تیار کی گئی گرم شالیں بھی یہاں خریداری کے لئے آنے والوں میں خاصی مقبول ہیں۔

گرینڈ بازار میں آنے والے گاہک دوکانداروں سے بھاؤ تاؤ کر کے قیمت کم کرانے کی کوشش بھی کرتے ہیں اور اس میں وہ اکثر کامیاب بھی ہو جاتے ہیں۔

ترکی کے مخلتف علاقوں میں تیار کیے جانے والے آرائشی سامان کو یہاں اتنے خوشنما طریقے سے سجایا جاتا ہے کہ قریب سے گزرنے والے ایک نظر دیکھے بغیر نہیں رہ سکتے۔

گرینڈ بازار میں ترک اور عرب نوجوانوں میں مقبول شیشے کی دوکانیں بھی ہیں جہاں مخلتف رنگوں کے شیشے اور ان میں استعمال ہونیوالا تمباکو بھی مختلف ذائقوں میں دستیاب ہے۔