ترک وزیرِ اعظم نے دس ہزار کے قریب ترک باشندوں سے خطاب کرتے ہوئے کہا کہ ترک باشندوں کے لیے لازمی ہے کہ وہ جرمن معاشرے میں پوری طرح ضم ہوں تاہم ایسا کرتے وقت انہیں اپنے ملک کی ثقافت اور روایات کو بالکل ترک بھی نہیں کرنا چاہیے۔ رجّب طیّب ایردوآن کا کہنا تھا کہ معاشرے میں ہر شخص کو انفرادیت کے ساتھ رہنے سہنے کی آزادی حاصل ہونا چاہیے۔

انضمام کی کوششیں کامیاب نہ ہو سکیں، یورپی رہنماؤں کا مؤقف

جرمنی اور یورپ میں ان دنوں اقلیتی باشندوں کے انضمام کے بارے میں بحث کی جا رہی ہے اور اس حوالے سے وفاقی جرمن چانسلر انگیلا میرکل سمیت برطانوی وزیرِاعظم ڈیوڈ کیمرون اور فرانسیسی صدر نکولا سارکوزی تبصرہ کر چکے ہیں۔ ان رہنماؤں کے تبصروں کا بنیادی نکتہ یہ ہے کہ یورپ میں مختلف تہذیبوں سے تعلق رکھنے والے افراد کے درمیان انضمام کی کوششیں بارآور ثابت نہیں ہوسکی ہیں۔

واضح رہے کہ جرمنی میں ترک باشندے سب سے بڑی اقلیت تصوّر کیے جاتے ہیں۔

ہفتے کے روز ترک وزیرِاعظم ایردوآن نے ایک جرمن اخبار کو دیے گئے انٹرویو میں جرمن حکومت کی امیگریشن پالیسی پر نکتہ چینی کرتے ہوئے کہا تھا کہ اقلیتی شہریوں کے زبردستی انضمام کی کوششیں بین الاقوامی قوانین کی خلاف ورزی ہیں۔

دوسری جانب جرمن اخبارات میں بعض جرمن سیاستدانوں کے وہ بیانات بھی شائع ہوئے ہیں جس میں ان سیاستدانوں نے ترکی میں عیسائیوں کے خلاف امتیازی سلوک کا الزام عائد کیا ہے۔

ترکی کی یورپی یونین میں شمولیت کی خواہش

پیر کے روز ترک وزیرِاعظم اور جرمن چانسلر میرکل کی ملاقات طے ہے جس میں ترک وزیرِاعظم کی جانب سے ترکی کی یورپی یونین میں شمولیت کا موضوع خاصی اہمیت کا حامل سمجھا جا رہا ہے۔ تاہم سن دو ہزار پانچ سے لے کر اب تک ترکی کی یورپی یونین میں شمولیت کے حوالے سے کوئی خاص پیش رفت دیکھنے میں نہیں آئی ہے۔ مزید برآں مختلف مذاہب اور تہذیبوں سے تعلق رکھنے والے افراد کے درمیان انضمام کے حوالے سے یورپ کی بڑی سیاسی جماعتوں کے سخت گیر مؤقف کے بعد ان کوششوں کو مزید دھچکہ لگا ہے۔

رپورٹ: شامل شمس⁄ خبر رساں ادارے

ادارت: افسر اعوان