گیڈو ویسٹر ویلے نے جمعے کو اقوام متحدہ کی جنرل اسمبلی سے خطاب میں کہا کہ شام میں کیمیائی حملوں کی تفتیش بین الاقوامی فوجداری عدالت کرے۔ خبر رساں ادارے اے ایف پی کے مطابق انہوں نے شام کے کیمیائی ہتھیاروں کی تلفی کے لیے اقوام متحدہ کی سلامتی کونسل کی جانب سے منظوری کی گئی قرار داد کا بھی خیرمقدم کیا۔

ان کا کہنا تھا: ’’یہ ہتھیار طے شدہ نظام الاوقات کے مطابق پوری طرح تباہ کیے جانے چاہیئں۔ جرمنی ان کیمیائی ہتھیاروں کو تباہ کرنے کے لیے مالی اور تکنیکی مدد فراہم کرنے کے لیے تیار ہے۔‘‘

ایران اور شام کے حوالے سے ہونے والی پیش رفت کے تناظر میں ان کا کہنا تھا: ’’یہ دنیا کے لیے ایک اچھا ہفتہ تھا، عالمی برداری کو اسی طرح کام جاری رکھنا چاہیے۔‘‘

جرمن وزیر خارجہ نے کہا کہ روس اور امریکا کے درمیان شام کے کیمیائی ہتھیاروں کے حوالے سے طے پانے والے معاہدے کا فائدہ اٹھایا جانا چاہیے۔ انہوں نے کہا کہ سیاسی حل کے ذریعے ہی شام میں امن قائم کیا جا سکتا ہے۔

ایران اور امریکا کے درمیان اعلیٰ سطحی رابطے کے بارے میں ویسٹر ویلے نے کہا: ’’ایرانی حکومت کے ساتھ ہونے والی حالیہ بات چیت سے ایک موقع پیدا ہوا ہے۔ اب اعتماد سازی کی ضرورت ہے۔‘‘

گیڈو ویسٹر ویلے نے جنرل اسمبلی کے اجلاس سے خطاب میں انٹرنیٹ سکیورٹی، پرائیویسی اور جاسوسی کے موضوعات پر بھی بات کی۔ امریکی نیشنل سکیورٹی ایجنسی کے سابق ملازم ایڈورڈ سنوڈن کی جانب سے جاسوسی کے انکشافات کے بعد عوام کی پرائیویسی میں دخل اندازی پر دنیا بھر میں حکومتوں کو تنقید کا نشانہ بنایا جانے لگا تھا۔

جرمن وزیر خارجہ کا کہنا تھا: ’’ہمیں ایک ایسا انٹرنیٹ چاہیے جس کے ذریعے نجی سطح پر آزادی، سکیورٹی اور تحفظ کو مناسب توازن میں رکھا جا سکے۔ انٹرنیٹ کے ہر صارف کو اس بات کا یقین ہونا چاہیے کہ دنیا بھر میں کمپنیوں اور ریاستوں کی جانب سے اس کے حقوق کا تحفظ کیا جا رہا ہے۔‘‘

ویسٹر ویلے جرمنی کی فری ڈیموکریٹک پارٹی (ایف ڈی پی) کے رکن ہیں جسے حالیہ انتخابات میں شکست کا سامنا کرنا پڑا ہے۔ یہ جماعت پانچ فیصد ووٹ حاصل کرنے میں ناکام رہی ہے جس کے باعث اس کے تمام ارکان پارلیمانی نشستوں سے محروم ہو جائیں گے۔ ایف ڈی پی جرمن چانسلر انگیلا میرکل کی حالیہ حکومت میں اتحادی ہے۔