اسلام آباد کی احتساب عدالت نے توشہ خانہ کیس میں بدھ اکتیس جنوری کو اپنا فیصلہ سناتے ہوئے پاکستان کے سابق وزیر اعظم اور پاکستان تحریک انصاف پارٹی کے بانی عمران خان اور ان کی اہلیہ بشریٰ بی بی کو چودہ چودہ سال قید  کی سزا سنا دی۔ عدالت نے ان دونوں کو کسی بھی عوامی عہدے کے لیے دس سال کے لیے نااہل بھی کر دیا اور 78 کروڑ 70لاکھ روپے کے جرمانے کی سزا بھی دی ہے۔

یہ فیصلہ پاکستان کے عام انتخابات سے ایک ہفتے قبل ریاستی راز افشا کرنے یعنی سائفر کیس میں دس سال قید کی سزا سنائے جانے کے ایک دن بعد آیا ہے۔

سائفرکیس: عمران خان اور شاہ محمود قریشی کو دس، دس سال قید کی سزا

پی ٹی آئی کے ترجمان نے میڈیا سے بات چیت کرتے ہوئے کہا،" آج ہمارے عدالتی نظام، جسے ختم کرنے کی کوشش کی جا رہی ہے، کی تاریخ کا ایک اور افسوس ناک دن ہے۔"

فوری طورپر یہ واضح نہیں ہوسکا کہ آیا خان کو دی گئی سزائیں ایک ساتھ یا مسلسل چلیں گی۔ وہ گزشتہ اگست میں گرفتار کیے جانے کے بعد سے بیشتر اوقات جیل میں بند ہیں۔

بشریٰ بی بی کو فی الحال گرفتار نہیں کیا گیا ہے

عمران خان کے وکیل سلمان صفدر نے اے ایف پی کو اس بات کی تصدیق کی کہ سابق وزیر اعظم کے ساتھ ان کی اہلیہ بشریٰ بی بی کو بھی سزا سنائی گئی ہے، جو پورے مقدمے کے دوران ریمانڈ پر تھیں۔

انہوں نے کہا، "عمران خان اور بشریٰ بی بی کو سزا ہوچکی ہے۔ لیکن بشریٰ بی بی کو ابھی تک گرفتار نہیں کیا گیا ہے۔"

اس جوڑے نے عمران کے وزیر اعظم منتخب ہونے سے چند ماہ قبل سن 2018 میں شادی کی تھی۔ بشریٰ بی بی عوامی طورپر کم ہی نظر آتی ہیں۔ ان کی عمران خان سے ملاقات اس وقت ہوئی تھی جب پی ٹی آئی کے بانی نے روحانی رہنمائی کے لیے ان سے رجوع کیا تھا۔

پی ٹی آئی انتخابی مہم سے آؤٹ، ن لیگ اِن

احتساب عدالت کے فیصلے کو عمران خان کے لیے ایک اور دھچکہ قرار دیا جارہا ہے۔ انہوں نے اور ان کی اہلیہ نے اس ماہ کے اوائل میں راولپنڈی جیل میں عدالتی سماعت کے دوران اپنے اوپر عائد کیے گئے الزامات کو غلط قرار دیا تھا۔

توشہ خانہ کیس کیا ہے؟

توشہ خانہ چارج شیٹ میں بتایا گیا ہے کہ وزار ت عظمیٰ کے دوران عمران خان اور بشریٰ بی بی کو مختلف سربراہان مملکت کی طرف سے 108 تحائف ملے۔ ملزمان نے ان میں سے 58 قیمتی تحائف خود رکھ لیے۔ اس میں مزید بتایا گیا کہ بشریٰ بی بی نے 14 کروڑ روپے مالیت کے 58 تحائف اپنے پاس رکھے۔

چارج شیٹ کے مطابق "عمران خان اور بشریٰ بی بی نے اختیارات کا ناجائز استعمال کرتے ہوئے تحائف کی من پسند قیمت لگوائی،جس سے قومی خزانے کا 1573ملین روپے کا نقصان ہوا۔"

عمران خان اور پی ٹی آئی کے اہم رہنما الیکشن سے باہر

عمران خان نے اپنے تحریری جواب میں بتایا تھا کہ یہ تحائف زیادہ تر پھولوں کے گلدان، میز پوش، آرائشی سامان، دیوار کی آرائش کا سامان، چھوٹے قالین، بٹوے، پرفیوم، تسبیح، خطاطی، فریم، پیپر ویٹ اور پین ہولڈرز پر مشتمل تھے البتہ ان میں گھڑی، قلم، کفلنگز، انگوٹھی، بریسلیٹ /لاکٹس بھی شامل تھے۔

جواب میں بتایا گیا تھا کہ ان سب تحائف میں صرف 14 چیزیں ایسی تھیں جن کی مالیت 30 ہزار روپے سے زائد تھی جسے انہوں نے باقاعدہ طریقہ کار کے تحت رقم کی ادا کر کے خریدا۔ اپنے جواب میں عمران خان نے اعتراف کیا تھا کہ انہوں نے بطور وزیر اعظم اپنے دور میں چار تحائف فروخت کیے تھے۔

الیکشن کمیشن آف پاکستان نے اپنے ایک فیصلے میں عمران خان کے خلاف فوجداری کارروائی کی سفارش کی تھی۔

ج ا/ ص ز (اے ایف پی، اے پی، روئٹرز)