تيسرے ون ڈے ميں نيوزی لينڈ کو پاکستان کے ہاتھوں بھاری شکست
15 دسمبر 2014![](https://static.dw.com/image/16257458_800.webp)
متحدہ عرب امارات کے شہر شارجہ ميں اتوار چودہ دسمبر کے روز کھيلے گئے تيسرے ايک روزہ ميچ ميں پاکستانی ٹيم کے ليے کپتان کی ذمہ دارياں نبھانے والے مايہ ناز آل راؤنڈر شاہد آفريدی نے شاندار کارکردگی کا مظاہرہ کيا۔ انجری کے سبب ون ڈے کپتان مصباح الحق کی عدم دستيابی کے نتيجے ميں قائم مقام کپتان آفريدی نے پہلے تو چھبيس گيندوں پر پچپن رنز کی دھواں دار اننگز کھيلتے ہوئے اپنی ٹيم کے مجموعی اسکور کو 364 رنز تک پہنچايا اور بعد ازاں بولنگ ميں بھی نماياں کردار ادا کيا۔
پاکستان نے ٹاس جيت کر پہلے بيٹنگ کرتے ہوئے مقررہ پچاس اوورز ميں سات وکٹوں پر 364 رنز بنائے، جو ايک روزہ کرکٹ ميں پاکستانی ٹيم کا چھٹا سب سے بڑا اسکور ہے۔ پاکستان کے ليے اوپنر احمد شہزاد نے بھی 120 گيندوں پر 113 رنز کی شاندار اننگز کھيلی۔
ميچ جيتنے کے ليے 365 رنز کے ہدف کا تعاقب کرتے ہوئے کيوی ٹيم کی وکٹيں يکے بعد ديگرے گرتی رہيں اور وہ 38.2 اوورز ميں 217 کے مجموعی اسکور پر ڈھير ہو گئی۔ کيوی ٹيم کے ليے سب سے نماياں کارکردگی کا مظاہرہ کپتان کين وليمسن نے کيا، جنہوں نے چھياليس کی انفرادی اننگز کھيلی۔ پاکستان کے ليے شاہد آفريدی نے سينتيس رنز کے عوض تين کيوی کھلاڑيوں کو پويلين کا رخ دکھايا۔
آفريدی نے ميچ جيتنے کے بعد کہا، ’’سب سے اچھا دفاع، جارحانہ انداز ہی ہونا چاہيے۔ اس ميچ ميں بلے بازوں نے اپنا کردار ادا کيا اور گيند بازوں نے اپنا۔‘‘ ان کے بقول ہر ميچ ايک نيا ميچ ہوتا ہے اور کيوی ٹيم اگلے ميچ ميں واپس آنے کی پوری کوشش کرے گی۔ پاکستان کو آئندہ بھی اسی طرز کی کارکردگی دہرانا ہو گی۔
ميچ کے بہترين کھلاڑی يا مين آف دا ميچ اپنی سنچری کے سبب احمد شہزاد قرار پائے۔
پاکستان اور نيوزی لينڈ کے مابين پانچ ايک روزہ ميچوں کی سيريز اب دو ايک سے پاکستان کے حق ميں ہے۔ سيريز کا پہلا ميچ پاکستان نے جيتا تھا جبکہ دوسرا کيوی ٹيم نے۔ چوتھے اور پانچويں ون ڈيز آئندہ بدھ اور جمعے کے روز ابو ظہبی ميں کھيلے جائيں گے۔