بنکاک کی آئینی عدالت نے آج چودہ اگست بروز بدھ تھائی وزیر اعظم سریتھا تھاویسین کو مجرمانہ ریکارڈ رکھنے والے ایک سیاستدان کی تقرری کے الزام پر ان کے عہدے سے ہٹا دیا ہے۔ 

چار کے مقابلے میں پانچ ججوں کی جانب سے دیا گیا یہ اکثریتی عدالتی  فیصلہ بہت سے سیاسی مبصرین کے لیے حیران کن تھا۔ وزیراعظم سریتھا فیصلہ سنائے جانے کے وقت عدالت میں موجود نہیں تھے، ان کا کہنا تھا کہ انہیں دیگر مصروفیات درپیش ہیں۔

 فوج سے قریبی تعلقات رکھنے والے درجنوں تھائی سینیٹرز نے مئی میں سابق پراپرٹی ٹائیکون اور ملکی وزیر اعظم سریتھا کے خلاف مقدمہ دائر کیا تھا۔ سینیٹرز نے 62 سالہ سریتھا پر مجرمانہ ریکارڈ رکھنے والے سیاست دان پچیت چوئنبان کو حکومت میں وزارتی عہدے پر تعینات کرکے قواعد و ضوابط کی خلاف ورزی کا الزام لگایا تھا۔

پچیت  کو 2008 میں رشوت ستانی کے ایک اسکینڈل میں توہین عدالت کے جرم میں چھ ماہ قید کی سزا سنائی گئی تھی۔ وہ بڑھتے ہوئے دباؤ کی وجہ سے مئی میں پہلے ہی اپنے عہدے سے مستعفی ہو چکے تھے۔

 سریتھا نے دلیل دی تھی کہ پچیت کی تقرری قانون کے مطابق ہوئی تھی لیکن عدالت نے یہ کہتے ہوئے ان سے اتفاق نہیں کیا کہ وزیر اعظم نے قواعد کی خلاف ورزی کی ہے۔

ش ر⁄ اب (ڈی پی اے)