ایران کے مقامی میڈیا کی طرف سے 11 دسمبر کے روز فضائی آلودگی کے تشویش ناک حد تک بڑھ جانے کے اعلان کے ساتھ ہی یہ بھی بتایا گیا کہ تہران میں ہوا کے معیار کا انڈکس یا AQI کہلانے والی شرح 170 تک پہنچ گئی ہے۔

سرکاری میڈیا کی رپورٹوں کے مطابق ایران کے کچھ حصوں میں طلبا و طالبات اور سرکاری ملازمین کو فضا کے ''غیر صحت بخش‘‘ حد تک آلودہ ہو جانے کے پیش نظر بدھ اور جمعرات کو گھروں میں ہی رہنے کا حکم دے دیا گیا ہے۔

تہران، جہاں فضائی آلودگی کی سطح عام طور سے بہت بلند رہتی ہے، حالیہ دنوں میں اسموگ کی لپیٹ میں بھی رہا ہے۔ ایرانی دارالحکومت البرز پہاڑوں کے جنوبی دامن میں واقع ہے اور اس وجہ سے اس  شہر کی فضا  گہری آلودہ ہوا کے اثرات میں رہتی ہے۔

ایران: پانی کی قلّت کے سبب گوناگوں مسائل سے دوچار

اس موسمیاتی رجحان کو ''تھرمل انورژن‘‘ کہا جاتا ہے اور سردیوں کے موسم میں یہ انتہائی واضح ہو جاتا ہے۔ اس کی  وجہ سے ہوا کی کمی اور زیادہ سردی اس شہر کی فضا میں کئی کئی دنوں تک خطرناک اسموگ کی موجودگی کو برقرار رکھتی ہے۔

عوامی مقامات کی بندش

ایرانی دارالحکومت تہران میں چند مخصوص شاخوں کے علاوہ تمام میوزیم اور بینک بند کر دیے گئے ہیں۔ تاریخی میلاد ٹاور، جو 435 میٹر بلند ہے، بدھ کی صبح اسموگ کے سبب بمشکل ہی نظر آ رہا تھا۔ شدید فضائی آلودگی دوسرے بڑے شہروں کو بھی متاثر کر رہی ہے، جن میں وسطی ایرانی شہر اصفہان اور شمال مغرب میں واقع تاریخی شہر تبریز بھی شامل ہیں۔

سرکاری ٹیلی ویژن کی رپورٹوں کے مطابق ملک کے جنوب مغرب میں اہواز کو بھی فضائی آلودگی کی اعلٰی سطح کا سامنا ہے۔ مقامی میڈیا نے اس آلودگی کی وجہ صنعتی شعبے کے کچھ خستہ حال بنیادی ڈھانچوں، سڑکوں پر پرانی گاڑیوں اور پٹرول کے ناقص معیار کو قرار دیا ہے۔

تہران میں فضائی آلودگی کے باعث آؤٹ ڈور کھیلوں پر پابندی

آلودگی کی بنیادی وجوہات

حالیہ ہفتوں میں حکومت نے بعض پاور پلانٹس میں استعمال ہونے والے ایندھن کو بھی ایک اہم عنصر کے طور آلودگی کی وجوہات میں شامل کیا ہے۔

ایرانی وزیر صحت محمد رضا ظفرقندی کے مطابق فضائی آلودگی ہر سال ملک بھر میں تقریباً 50 ہزار شہریوں کی قبل از وقت موت کی وجہ بنتی ہے۔

حالیہ برسوں میں ایرانی حکام تہران میں بار بار اسکولوں کو بند کرنے کے اعلانات کر چکے ہیں۔ ان اقدامات میں ہوا کے ناقص معیار کی وجہ سے 2019ء میں ایک ہفتے کے لیے اسکولوں کی بندش بھی شامل تھی۔

تہران میں فضائی آلودگی اس شہر کی ساری آبادی کے لیے بالعموم اور حساس اور بیمار افراد کے لیے بالخصوص مضر صحت ثابت ہوتی ہے۔

ک م/ م م (اے ایف پی)