وائٹ ہاؤس کے قریب ایک افغان نژاد شخص کی فائرنگ سے زخمی ہونے والے نیشنل گارڈ میں سے ایک کی ہلاکت کے اعلان کے بعد صدر ڈونلڈ ٹرمپ نے جمعرات کو سوشل میڈیا پر ایک پوسٹ میں لکھا،''میں امریکہ کے نظام کو مکمل طور پر بحال ہونے دینے کے لیے تیسری دنیا کے تمام ممالک سے ہجرت کو مستقل طور پر روک دوں گا۔‘‘

’تیسری دنیا کے ممالک‘ ایک وسیع اصطلاح ہے، جو بنیادی طور پر افریقہ، ایشیا، لاطینی امریکہ اور اوشینیا کے کچھ حصوں میں واقع کم اور متوسط آمدنی والے ترقی پذیر ممالک کے لیے استعمال ہوتا ہے۔

انہوں نے یہ دھمکی  بھی دی کہ اپنے پیشرو جو بائیڈن کی جانب سے دی گئی ''لاکھوں‘‘ امیگریشن کے درخواستوں کی منظوری واپس لے لیں گے، اور''ہر اس شخص کو نکال باہر کریں گے جو امریکہ کے لیے فائدہ مند نہیں ہے۔‘‘

ٹرمپ نے مزید کہا کہ وہ غیرملکی شہریوں کو فراہم کردہ تمام وفاقی مراعات اور سبسڈیز ختم کر دیں گے اور ہر ایسے غیر ملکی کو ملک بدر کریں گے جو سکیورٹی کے لیے خطرہ ہو یا ''مغربی تہذیب سے غیر مطابقت رکھتا ہو۔‘‘

ٹرمپ کی غصے سے بھرپور یہ پوسٹ ان کی دوسری مدتِ صدارت میں تارکینِ وطن مخالف پالیسیوں میں شدت کی عکاسی کرتی ہے۔

امریکی صدر نے کہا،''ان مقاصد کو غیر قانونی اور مسائل پیدا کرنے والی آبادی میں نمایاں کمی لانے کے مقصد کے ساتھ آگے بڑھایا جائے گا۔ کیونکہ ان کی صرف اپنے ممالک کو واپس ہجرت (ریورس مائیگریشن) ہی اس صورت حال کا مکمل حل فراہم کر سکتی ہے۔‘‘

’گرین کارڈ ہولڈرز‘ کی حیثیت کا دوبارہ جائزہ

امریکی صدر ٹرمپ نے فائرنگ کے واقعے کا الزام بائیڈن دور کی امیگریشن جانچ پڑتال کی ناکامیوں پر لگایا اور پناہ گزینوں کے کیسز کے وسیع جائزے کا حکم دیا۔ ٹرمپ انتظامیہ نے جمعرات کے روز اعلان کیا کہ وہ افغانستان اور دیگر 18 ممالک سے تعلق رکھنے والے ہر مستقل رہائشی یا ''گرین کارڈ‘‘ ہولڈرز کی امیگریشن حیثیت کا دوبارہ جائزہ لے گی۔

وائٹ ہاؤس کے قریب فائرنگ کے بعد امریکی شہریت اور امیگریشن سروسز نے کہا کہ ٹرمپ نے ''ہر ایسے غیر ملکی کے ہر گرین کارڈ کے مکمل اور سخت جائزے‘‘ کا حکم دیا ہے جو کسی بھی 'باعث تشویش‘ ملک سے تعلق رکھتا ہو۔

ایجنسی نے ایسے 19 ممالک کی فہرست کا بھی حوالہ دیا، جن میں افغانستان، کیوبا، ہیٹی، ایران اور میانمار شامل ہیں، جو جون میں ٹرمپ کے ایک سابقہ حکم کے تحت امریکی سفری پابندیوں کا سامنا کر رہے ہیں۔ ٹرمپ انتظامیہ نے افغانستان سے امیگریشن درخواستوں کی پروسیسنگ کو فوری طور پر معطل کرنے کا بھی حکم دیا ہے۔

فائرنگ میں زخمی ایک نیشنل گارڈ کی موت

 ایک افغان پناہ گزین نے بدھ کے روز وائٹ ہاؤس کے قریب دو نیشنل گارڈ کے اہلکاروں پر فائرنگ کر دی تھی۔ امریکی صدر نے اس واقعے کو ''بہیمانہ حملہ‘‘ قرار دیا۔

ٹرمپ نے بتایا کہ بیس سالہ سارہ بیک اسٹروم زخموں کی تاب نہ لاتے ہوئے دم توڑ گئیں جبکہ ان کے ساتھی گارڈز چوبیس سالہ مین اینڈریو وولف ''زندگی اور موت کی جنگ‘‘ لڑ رہے ہیں۔ حکام کے مطابق تحقیقاتی اداروں   نے فائرنگ کے اس واقعے کی  دہشت گردی کے طور پر جانچ شروع کر دی ہے۔

ایک طویل سوشل میڈیا پوسٹ میں ٹرمپ نے دعویٰ کیا،''پناہ گزینوں کا یہ بوجھ امریکہ میں سماجی بگاڑ کی سب سے بڑی وجہ ہے،ایک ایسا مسئلہ جو دوسری عالمی جنگ کے بعد موجود نہیں تھا۔‘‘

انہوں نے مزید کہا،''اگرچہ ہم تکنیکی طور پر ترقی کر چکے ہیں، مگر امیگریشن پالیسی نے یہ تمام فائدے ختم کر دیے ہیں اور بہت سے لوگوں کی زندگیوں کی حالت بگاڑ دی ہے۔‘‘

ادارت: شکور رحیم