حکمران جارجین ڈریم پارٹی کی 26 اکتوبر کو ہونے والے پارلیمانی انتخابات میں فتح کے بعد سے بحیرہ اسود کی یہ ریاست ہنگامہ آرائی کا شکار ہے۔ دریں اثناء جارجیا کی وزارت داخلہ نے کہا کہ 107 افراد کو ''پولیس کے قانونی  احکامات کی نافرمانی اور معمولی غنڈہ گردی کے الزام‘‘ میں گرفتار کیا گیا ہے۔ وزارت داخلہ کے بیان میں مزید کہا گیا، ''رات بھر مظاہرین نے قانون نافذ کرنے والے اہلکاروں پر پتھر، آتش بازی، شیشے کی بوتلیں اور دھاتی اشیاء سمیت مختلف چیزیں پھینکیں۔‘‘ اس بیان میں مزید کہا گیا کہ وزارت داخلہ کے 10 ملازمین زخمی ہوئے ہیں۔

جارجیا کی وزارت داخلہ کے مطابق جمعرات کو 32 پولیس اہلکار زخمی ہوئے اور 43 مظاہرین کو حراست میں لیا گیا۔

حکومت مخالف مظاہروں کی وجہ

گزشتہ جمعرات کو وزیر اعظم Irakli Kobakhidze کی طرف سے کہا گیا، ''جارجیا 2028ء  تک یورپی یونین کے ساتھ الحاق کے مذاکرات شروع نہیں کرے گا۔‘‘ اپوزیشن کی جانب سے اس بیان پر شدید ردعمل سامنے آیا اور احتجاج کا سلسلہ شروع ہوا۔

جارجیا: روس نواز حکومتی جماعت پارلیمانی الیکشن میں کامیاب

 بعدازاں جارجیا کے وزیر اعظم نے حزب اختلاف اور یورپی یونین کے سفیر پر اپنے الفاظ کو توڑ مروڑ کر پیش کرنے کا الزام لگایا اور اصرار کیا کہ سن 2030 تک یورپی بلاک میں رکنیت ان کی ''اولین ترجیح‘‘ ہے۔

مظاہرین کے خلاف پولیس کی کارروائی

خبر رساں ایجنسی اے ایف پی کے مطابق اُس کے نامہ نگاروں نے جمعے کو تبلیسی میں پارلیمنٹ کے باہر جمع ہونے والے یورپی یونین کے حامی مظاہرین پر پولیس فائرنگ،  واٹر کینن اور آنسو گیس کا استعمال دیکھا۔ جبکہ مظاہرین انڈے اور آتشبازی پھینک رہے تھے۔ پارلیمنٹ کے باہر علاقے کو خالی کرانے کے لیے پولیس کی کوشش کے دوران پولیس اور مظاہرین کے درمیان جھڑپیں ہوئیں۔

جارجیا کے ٹی وی اسٹیشن پیرویلی نے کہا کہ اس کا ایک صحافی شدید زخمی حالت میں اسپتال میں داخل ہے۔

 ایک اور ٹی وی اسٹیشن ''متواری ‘‘ نے رپورٹ کیا کہ جمعہ کو جارجیا کے دیگر شہروں میں بھی احتجاجی مظاہرے کیے گئے۔

نئی پارلیمان کا بائیکاٹ

مغرب نواز اپوزیشن جماعتیں نئی ​​پارلیمان کا بائیکاٹ کر رہی ہیں، جبکہ صدر سلوم زورابیشویلی نے ملک کی آئینی عدالت کے ذریعے انتخابی نتائج کو کالعدم قرار دینے کی کوشش کی ہے۔ جمعے کی شام قوم سے ایک ٹیلیویژن خطاب میں، مغرب نواز صدر نے حکمران جماعت کے ساتھ تناؤ کے بارے میں کہا، ''مزاحمتی تحریک شروع ہو گئی ہے۔ میں یکجہتی کے اظہار میں اس کے ساتھ کھڑا ہوں۔‘‘ صدر کا مزید کہنا تھا، ''ہم اس وقت تک متحد رہیں گے جب تک جارجیا اپنے اہداف حاصل نہیں کر لیتا، اپنے یورپی راستے پر واپس آنے اور نئے انتخابات کو محفوظ بنانے کا۔‘‘

جارجیا کے 'فارن ایجنٹ' بل سے امریکہ ناراض کیوں ہے؟

انتخابی دھوکہ دہی

اکتوبر کے ووٹ کے بعد، جارجیا کے انتخابی مانیٹرنگ کے ایک گروپ نے کہا کہ ان کے پاس بڑے پیمانے پر انتخابی دھوکہ دہی کی ایک پیچیدہ اسکیم کے ثبوت موجود ہیں۔

 برسلز نے انتخابی نگرانی کرنے والوں کی طرف سے رپورٹ کی گئی ''سنگین انتخابی بے ضابطگیوں‘‘ کی تحقیقات کا مطالبہ کیا ہے۔

حکمران جماعت کی طرف سے جمعرات کو متفقہ طور پر Irakli Kobakhidze  کو وزیر اعظم کے عہدے پر برقرار رہنے کے لیے ووٹ دیا گا۔ یہاں تک کہ اپوزیشن نے پارلیمنٹ کا بائیکاٹ کیا۔

جارجیا: سابق فوجی نے پانچ افراد کو گولی مار کر ہلا ک کر دیا

واضح رہے کہ '' ڈیموکریٹک جارجیا‘‘ یا GD پارٹی کو عرف عام میں کوٹسیبی بھی کہا جاتا ہے، اور یہ جارجیا کی ایک روس نواز سیاسی جماعت ہے۔

دریں اثناء ایمنسٹی انٹرنیشنل نے کہا، ''تبلیسی میں پولیس کی کارروائیاں پرامن اجتماع کے حق پر ایک اور تعزیری حملہ ہے۔‘‘ فرانس، برطانیہ، یوکرین، پولینڈ، سویڈن اور لتھوانیا ان ممالک میں شامل ہیں، جنہوں نے اس صورتحال پر تشویش کا اظہار کیا۔

 حالیہ برسوں میں، ناقدین جارجین ڈریم پارٹی پر کا الزام لگاتے ہیں،جس نے ملک کو یورپ سے دور اور روس کے قریب کر دیا ہے۔

ک م/ا ب ا (اے ایف  پی)