گزشتہ برس لال مسجد پر کیے گئے فوجی آپریشن کی پہلی برسی سے ایک روز قبل جامعہ حفصہ سے تعلق رکھنے والی خواتین ، طالبات اور اساتذہ نے، لال مسجد میں ایک کانفرنس کا اہتمام کیا جس میں لال مسجد فوجی آپریشن میں ہلاک ہونے والوں کو خراجِ تحسین پیش کیا گیا۔

کانفرنس کی صدارت جامعہ حفصہ کی پرنسپل اور لال مسجد آپریشن کے دوران گرفتار کیے گئے لال مسجد کے خطیب مولانا عبدالعزیز کی اہلیہ امّ ِ احسان نے کی۔ اسلام آباد سے ہمارے نمائندے امتیاز گل کا کہنا ہے کہ لال مسجد کا مسئلہ ایک بار پھر سر اٹھا رہا ہے اور انتظامیہ کی بے عملی کسی نئے طوفان کا پیش خیمہ معلوم ہوتی ہے۔