جاپانی وزیر اعظم شینزو آبے نے ملک میں شدید بارشوں کے بعد آنے والے سیلابوں اور لینڈ سلائیڈنگ میں کم از کم ایک سو شہریوں کی ہلاکت کے بعد چار یورپی ممالک کا اپنا دورہ منسوخ کر دیا ہے۔ انہوں نے متاثرہ علاقوں کے دورے بھی کیے ہیں۔

شدید بارشوں کے بعد کئی علاقوں کے خشک ندی نالے اُبل پڑے اور مختلف دیہات اور قصبوں کو تیز رفتار پانی کے ریلوں کا سامنا کرنا پڑا۔ پولیس اچانک آنے والے اس سیلاب میں پھنس جانے والوں کو منتقل کرنے میں بھی مصروف رہی۔

موسلادھار بارشوں کے بعد مختلف شہروں کے نشیبی علاقوں میں پانی کھڑا ہو گیا اور اونچائی پر واقع مکانات کو بھی تباہی کا سامنا کرنا پڑا۔ موٹر کاریں تک بارشی پانی سے ٹوٹ پھوٹ کا شکار ہو گئیں۔

جاپان کے تاریخی شہر کوراشیکی میں تو ہر گلی کسی چڑھی ہوئی ندی کا روپ دھار گئی۔ پولیس، رضاکار اور فوج کے زمینی دستوں نے متاثرین کو محفوظ مقامات تک منتقل کرنے میں حصہ لیا۔

جاپانی علاقے کوراشیکی کے ایک قصبے مابی کا تقریباً ہر گھر بارش اور سیلابی پانی سے متاثر ہو چکا ہے۔ پانی اور کیچڑ میں گھرے ہوئے مکانات کے علاوہ گھریلو سامنا لوگوں کی بے بسی کا منظر پیش کرتا ہے۔

کوراشیکی کے مختلف نواحی علاقوں کو اچانک آنے والے سیلابوں نے شدید متاثر کیا ہے۔ سڑکوں پر کھڑی کاروں کو پانی کے ریلے بہا کر اپنے ساتھ لے گئے۔ پانی کی تیز بہاؤ نے انتہائی بڑے سامان بردار ٹرالرز کے منہ بھی موڑ دیے۔

جنوب مغربی جاپان میں موسلا دھار بارشوں اور پھر پانی کے ریلوں نے کئی شہروں اور قصبات کو تباہی سے دوچار کیا ہے۔ اوزُو نامی شہر کا ایک اندرونی منظر شدید بارش کے بعد۔

جاپانی حکومت نے متاثرہ علاقوں سے بے گھر افراد کو محفوظ مقامات پر منتقل کرنے کے بعد انہیں خوراک کے ساتھ پینے کے لیے صاف پانی کی فراہمی کا بھی عارضی انتظام کیا ہے۔ ہیروشیما کے علاقے میہارا میں لوگ پینے کا صاف پانی جمع کر رہے ہیں۔

جاپنی نیوز ایجنسی کیوڈو نے فضا سے ہیرو شیما کے علاقے کیورے میں لینڈ سلائیڈنگ کی تصویر لی۔ اس رہائشی علاقے میں کئی مکانات بہتے کیچڑ کے زد میں آ کر تباہ و برباد ہو گئے تھے۔

کوراشیکی کا شہر دریائے تاکاہاشی کے کنارے پر آباد ہے۔ دریا میں شدید سیلاب سے کئی علاقے زیر آب گئے۔ ایک علاقے میں واقع ایک گھر کے لوگ سیلاب کی انتہائی بلند سطح سے بچنے کے لیے اپنے مکان کی چھت پر بیٹھ کر امدادی کارکنوں کے منتظر ہیں۔

جاپان کے انتظامی علاقے جیفو میں دریا نگاراگاوا شدید بارشوں کے بعد اپنے کناروں سے باہر نکل پڑا۔ اس کی طغیانی نے سارے علاقے میں خوف و ہراس کی فضا قائم کر دی۔ اس کے بہاؤ کی شدت کے سامنے کنارے پر کھڑی کشتیاں بھی محفوظ نہ رہ سکیں۔

شدید بارشوں کی وجہ سے جاپان کے شہر ہیروشیما کے کئی نواحی اور قریبی علاقوں میں تباہی و بربادی دیکھی گئی۔ یاد رہے ہیروشیما وہ شہر ہے، جہاں امریکا نے سب سے پہلا ایٹم بم گرایا تھا۔