جرمن فوج کے تقریباً ساڑھے چار ہزار اہلکار افغانستان میں تعینات ہیں اور سترہ سو گاڑیاں اور سامان سے بھرے ہوئے چھ ہزار کنٹینرز ان کے علاوہ ہیں۔ 2014ء کے اختتام تک تمام سامان حرب کو جرمنی واپس لانا ہے۔

افغانستان سے انخلاء کے دوران جرمن فوجی سامان کی منتقلی کے حوالے سے ترک شہر ترابزون ایک مرکز کی سی حیثیت ہے۔ عسکری ساز و سامان کی ترسیل کے لیے اس شہر کی بندرگاہ کو استعمال کیا جا رہا ہے

افغانستان میں جرمن فوج کی تعیناتی کو گیارہ سال سے زائد کا عرصہ گزر چکا ہے۔ جرمن دستوں کی ایک بڑی تعداد شمالی افغانستان میں ہے۔ بہت سے فوجی کیمپ ختم کیے جا چکے ہیں اور بغلان کی فوجی چھاؤنی بند کرنے کا سلسلہ بھی جاری ہے۔

2014ء کے بعد بھی تقریباً 800 جرمن فوجی مقامی دستوں کو تربیت دینے کے لیے افغانستان میں موجود رہیں گے

جرمن فوج کے زیر استعمال رہنے والا کچھ سامان افغانستان میں ہی رہے گا۔ کچھ قابل استعمال اشیاء کو فروخت کیا جائے گا جبکہ کچھ ضائع بھی کر دیا جائے گا۔ اس دوران افغانستان کے اندر ساز و سامان کی منقلی شروع ہو گئی ہے۔

افغانستان کا چوتھا بڑا شہر مزار شریف سامان کی نقل و حمل کے حوالے سے بہت اہم ہے۔ تقریباً تمام سامان اس شہر میں قائم فضائی اڈےکے ذریعے ہی آگے بھیجا جاتا ہے

گاڑیوں کو واپس بھیجنے سے قبل انہیں جراثیم کش ادویات سے دھویا جاتا ہے۔ تاکہ خطرناک جراثیم دوسری جگہ منتقل نہ ہو سکیں۔

جرمن فوج کے پاس بھاری فوجی سامان کو فضائی راستے منتقل کرنے کے لیے مناسب انتظام نہیں ہے۔ اس وجہ سے جرمن حکام نے یوکرائن اور روس کی ایک کمپنی سے انتونوو 124 سامان بردار جہاز کرائے پر لیے ہیں۔ اس جہاز کے ذریعے ایک وقت میں 150 ٹن تک سامان منتقل کیا جا سکتا ہے۔

سلامتی کی وجوہات کی وجہ سے اسلحہ اور حساس نوعیت کے آلات مزار شریف سے براہ راست جرمنی بھیجے جاتے ہیں۔ جیسے کہ ہووٹزر 2000 ٹینک۔

اس کے علاوہ غیر فوجی سامان، جس میں گاڑیاں، ریڈیو، خیمے اور اسی طرح کی دیگر اشیاء شامل ہیں، ترکی کے بندرگاہی شہر ترابزون سے ہوتی ہوئی جرمنی پہنچتی ہیں۔

ترک شہر ترابزوں سے سامان جہازوں پر لادا جاتا ہے۔ پھر یہ بحری جہاز بحیرہ روم اور بحراوقیانوس کے ساحلوں اور شمالی سمندر سے ہوتے ہوئے دو ہفتوں بعد شمالی جرمنی کی بندرگاہوں تک پہنچتے ہیں۔