جرمنی میں ریل ملازمین کی یونین نے پیر کے روز سے دو روزہ ہڑتال شروع کی ہے، اس برس ان کی یہ دوسری ہڑتال ہے۔ تنازعے کی وجہ تنخواہوں کی شرح، پنشن، اور ''کورونا وائرس کے بونس'' جیسے امور پر اختلافات ہیں۔
تصویر: Reuters/Michaela Rehle
اشتہار
جرمنی میں ٹرین ڈرائیوروں کی یونین (جی ڈی ایل) نے اپنی دو روزہ ہڑتال کا آغاز 23 اگست پیر کی علی الصبح یعنی رات کے دو بجے ہی سے شروع کر دیا۔ ریل کمپنی ڈوئیچے بان (ڈی بی) نے اعلان کیا ہے کہ اس ہڑتال کا دائرہ مسافر ریل سروس تک وسیع کر دیا گیا ہے اس لیے بڑے پیمانے پر ریل خدمات کے متاثر ہونے کا خدشہ ہے۔
ریل یونین اور کمپنی کے درمیان تنخواہوں کی شرح، پینشن اور کام کرنے کے حالات جیسے کئی اہم امور پر اختلافات پائے جاتے ہیں۔ اس برس یہ دوسرا موقع ہے جب ریل کے بیشتر ملازمین اپنے مطالبات تسلیم کروانے کے لیے دوبارہ کام پر نہیں آئے ہیں۔
سرکار ی ملکیت والی ریل کمپنی نے بات چیت کے دائرے کو وسیع کرنے کے مقصد سے یونین کو بعض پیشکش کی تھی تاہم ملازمین کی انجمن نے انہیں مسترد کر دیا جس کے بعد ہڑتال کا آغاز ہوا۔
ڈرائیوروں کی ہڑتال کے ساتھ ہی محکمے کے دیگر ملازمین نے بھی ہڑتال میں شامل ہونے کا فیصلہ کیا ہے۔ یہ ہڑتال 48 گھنٹوں کے لیے ہے جو بدھ کی علی الصبح ختم ہو جائے گی۔
جرمن ریل سروس نے اپنے ایک بیان میں کہا، ''مضافاتی علاقوں میں ڈی بی کو 40 فیصد تک ریل ٹریفک کی توقع ہے، تاہم، علاقوں کے لحاظ سے ٹرینوں کی تعداد کافی مختلف ہو گی۔ اس کے اثرات کا صحیح اندازہ صبح کے وقت آپریشن کے آغاز کے بعد ہی ممکن ہے۔''
اس حوالے سے جی ڈی بی ایل کی ہڑتال سنیچر کے روز شروع ہوئی تھی جو پیر کی صبح تک جاری رہی، تاہم اس سے صرف مال برادار ٹرینیں ہی متاثر ہوئیں۔ اس سے قبل رواں ماہ کے اوائل میں دو روزہ ہڑتال سے طویل فاصلے کے سفر کے ساتھ ساتھ کئی بڑے شہروں کی مسافر ریل لائنیں بھی متاثر ہوئی تھیں۔
تصویر: Reuters/Michaela Rehle
’شرمناک پیشکش‘
اتوار کے روز سرکاری ریل کمپنی ڈی بی نے ہڑتال روکنے کے مقصد سے اپنی آخری کوشش کی۔ اس کے لیے اس نے ایک وقت کے لیے ''کورونا وائرس کا بونس اور وبائی امراض کے دوران کام کرنے کے لیے کا ایک پریمیم رقم دینے جیسے امور پر بات چیت کی پیشکش کی تھی۔
لیکن ریل ملازمین کی انجمن جی ڈی ایل نے اسے، ''شرمناک پیشکش قرار دیتے ہوئے'' اپنی ہڑتال منصوبے کے مطابق جاری رکھنے کا فیصلہ کیا۔ یونین کے ایک رہنما کلاز ویسلسکائی نے کہا، ''ڈوئچے بان کی پیشکش جس کاغذ پر لکھی ہے وہ اس سے بھی کمتر ہے۔''
ان کا کہنا تھا کہ جی ڈی ایل کو ایک پختہ تجویز پیش کرنے کی ضرورت ہے، ''صرف بات چیت کے مقصد سے کسی چیز کو سامنے رکھنے کی کوئی ضرورت نہیں ہے۔''
اشتہار
یونین کے مطالبات
یونین تنخواہ میں 3.2 فیصد اضافہ کا مطالبہ کر رہی ہے۔ اس کا کہنا ہے کہ کورونا وائرس کے بونس کے طور پر بھی ملازمین کو اضافی 700 ڈالر کی رقم ادا کی جائے اور کام کرنے کے لیے بہتر حالات مہیا کیے جائیں۔
تاہم فریقین کے درمیان ان امور پر شدید اختلافات پائے جاتے ہیں کہ اضافہ کس وقت سے کیا جائے اور کتنی مدت کے لیے کیا جائے۔ ریل کمپنی کا کہنا ہے کہ وہ فوری طور پر تو نہیں تاہم آئندہ برس جنوری سے تنخواہوں میں ایک اعشاریہ پانچ فیصد کا اضافہ کرنے کے لیے تیار ہے اور پھر 2023 مارچ سے ایک اعشاریہ 75 فیصد کا اضافہ کر سکتی ہے۔
اس کے علاوہ پینشن بھی ایک اہم مسئلہ ہے۔ ریل کمپنی کا کہنا ہے کہ کورونا وائرس کی وجہ سے اسے اس برس اربوں کا نقصان اٹھانا پڑا ہے جبکہ سیلاب کی وجہ سے اس کے بہت سے ٹریک تباہ ہو گئے ہیں جن کی مرمت پر بھی اسے بہت کچھ خرچ کرنا ہے۔
ص ز۔ ج ا (ڈی پی اے، اے ایف پی، روئٹرز)
جرمنی میں ہڑتال، روزمرہ زندگی متاثر
تصویر: picture-alliance/dpa
فرینکفرٹ ایئر پورٹ کی عملے کی طرف سے جعمرات کے دن کی جانے والی ہڑتال کے باعث وہاں متعدد پروازیں منسوخ کرنا پڑیں۔ جس کی وجہ سے مسافروں کو پریشانی بھی ہوئی۔ ایک مسافر تھکن کی حالت میں ایئر پورٹ کے مسافر لاؤنج میں بیٹھا، ہڑتال ختم ہونے کا منتظر ہے۔
تصویر: picture-alliance/dpa
تنخواہوں میں اضافے کا مطالبہ کرنے والے ہڑتالیوں نے جمعرات کے دن دوپہر ایک بجے تک کام نہ کرنے کا اعلان کیا تھا۔ فرینکفرٹ ایئر پورٹ میں سکیورٹی چیک اِن گارڈز کے علاوہ ڈرائیورز، لوڈرز اور دیگر عملے نے بھی اس ہڑتال میں حصہ لیا۔ ٹریڈ یونین تنظیموں کے مطابق فرینکفرٹ ایئر پورٹ پر کل پندرہ سو افراد نے ہڑتال میں شرکت کی۔
تصویر: picture-alliance/dpa
جمعرات کو جرمنی کے سات ہوائی اڈوں پر ہڑتال کی گئی۔ اگرچہ سب سے زیادہ متاثر فرینکفرٹ اور میونخ کے ہوائی اڈے ہوئے لیکن ہیمبرگ، ہینوور، ڈُسلڈورف، اشٹٹ گارٹ اور کولون/ بون ایئر پورٹس پر بھی معمول کی پروازیں متاثر ہوئیں۔
تصویر: Reuters
جمعرات کے دن اس ہڑتال کے موقع پر کولون/ بون ایئر پورٹ خاصا خالی خالی دکھائی دیا کیونکہ بہت سے مسافروں نے اس دن ہوائی اڈے کا رخ ہی نہ کیا۔ بہت سے مسافروں نے اس ہڑتال کے اثرات سے بچنے کے لیے یا تو ٹرین کا استعمال کیا یا پھر اپنی گاڑیاں استعمال کیں۔ کچھ مسافروں نے تو اپنے سفر کے منصوبوں کو منسوخ بھی کر دیا۔
تصویر: DW/N. Steudel
جرمنی کی سب سے بڑی ٹریڈ یونین VerDi نے اس امید کا اظہار کیا ہے کہ حکومتی وفد کے ساتھ آئندہ ہفتے شروع ہونے والے مذاکرات میں وہ اپنے مطالبات منوانے میں کامیاب ہو جائیں گے۔ ویردی کا کہنا ہے کہ سرکاری ملازمین بھی اقتصادی ترقی سے اپنا حصہ لینا چاہتے ہیں۔
تصویر: DW/N. Steudel
مزدور یونین تنظیموں کا مطالبہ ہے کہ حکومت وفاقی اور میونسپل پبلک سیکٹر میں خدمات سرانجام دینے والے تقریبا 2.1 ملین ملازمین کی تنخواہوں میں 3.5 فیصد کا اضافہ کرے اور انہیں ماہانہ سو یورو کا بونس بھی دے۔
تصویر: DW/N. Steudel
کولون بون ایئر پورٹ کےترجمان والٹر رؤمر سرکاری ملازمین اور حکومت کے مابین پیدا ہونے والے لیبر تنازعات کے حل کے ماہرتصور کیے جاتے ہیں۔ ان کا کہنا ہے کہ کمیونیکیشن کے اس جدید دور میں ہڑتالوں سے اب لوگ ویسے متاثر نہیں ہوتے جیسا کہ ماضی میں ہوا کرتا تھا۔
تصویر: DW/N. Steudel
فرانس کے دو تاجر جعمرات کی دوپہر تک واپس پیرس پہنچنا چاہتے تھے۔ تاہم فرینکفرٹ ایئر پورٹ کی ایک پرواز کی منسوخی کے بعد وہ وہیں پھنس کر رہ گئے۔ ان کا کہنا تھا کہ فرانس میں ہونے والی ہڑتالوں کی وجہ سے یہ بدنظمی ان کے لیے کوئی نئی بات نہیں ہے۔
تصویر: DW/N. Steudel
جرمنی میں جاری ہڑتالوں کے سلسلے سے صرف ایئر پورٹس ہی متاثر نہ ہوئے بلکہ متعدد شہروں میں پبلک ٹرانسپورٹ سے وابستہ اہلکاروں نے بھی کام بند کر دیا۔ ان میں بسوں اور مقامی سطح پر چلنے والی ٹرینوں کے ڈرائیورز بھی شامل تھے۔ یوں بون سمیت کئی شہروں کے رہائشی بھی اس ہڑتال سے شدید متاثر ہوئے۔
تصویر: picture-alliance/dpa
جرمن دارالحکومت برلن میں بھی ہڑتال کی گئی۔ تاہم وہاں ہڑتال کچھ مختلف تھی کیونکہ برلن میں کوڑا کرکٹ اٹھانے والے عملے نے کام کرنا بند کر دیا۔ یوں شہر کے رہائشیوں نے اس ’وارننگ ہڑتال‘ کے دوران شہر کی صفائی میں خود حصہ لیا۔ اگر ٹریڈ یونین تنظیموں اور حکومتی وفود کے مابین جاری مذاکرات ناکام ہوتے ہیں تو صورتحال ایک مرتبہ پھر بگڑ سکتی ہے۔
