جرمن حکومت  نے شمسی توانائی سے الیکٹرک کاروں کو چارج کرنے کے لیے ایک نئے سبسڈی پروگرام کا آغاز کیا ہے۔ اس منصوبے کے تحت  فوٹو وولٹک سسٹم اور سولر پاور اسٹوریج یونٹ کے حامل چارجنگ اسٹیشنوں کی خریداری اور تنصیب کے لیے پانچ سو ملین یورو کی رقم خرچ کی جائے گی۔

 وفاقی وزارت ٹرانسپورٹ اینڈ ڈیجیٹل انفراسٹرکچر (بی ایم ڈٰی وی) اور ریاستی ترقیاتی بینک( کے ایف ڈبلیو) کے مطابق رہائشی عمارتوں کے ان مالکان کے لیے 10,200 یورو تک کی سرمایہ کاری گرانٹ مہیا کی جائے گی، جن کے پاس پہلے سے ہی الیکٹرک کار ہے یا انہوں نے اس کی خریداری کے لیے آرڈر دے رکھا ہے۔

اس ضمن میں درخواستیں منگل سےکے ایف ڈبلیو کو آن لائن جمع کرائی جا سکتی ہیں۔ اس سلسلے میں ''پہلے آئیں، پہلے پائیں‘‘کا اصول لاگو ہو گا۔ بی ایم ڈی وی کی وزارت کے مطابق فنڈز کی زیادہ سے زیادہ رقم صرف وہی لوگ حاصل کر سکتے ہیں، جو اپنی گاڑی کی بیٹری کو بھی خالی ہونے دیتے ہیں۔ اس طرح بیٹری ریزرو کے ایک چھوٹے سے حصے کے طور پر کام کر سکتی ہے، جہاں سے بجلی واپس گرڈ میں جا سکتی ہے یا اگر ضرورت ہو تو اپنے گھر میں استعمال کی جا سکتی ہے۔

خیال رہے کہ جرمن حکومت ماحول دوست ایندھن کو رواج دینے کے لیے ایسے متعدد منصوبوں پر کام جاری رکھے ہوئے ہے، جن کے تحت جرمن شہریوں کو ایسی مراعات دی جاتی ہیں کہ ماحول کے لیے ضرر رساں ایندھن کا استعمال ترک کر دیں۔

ش ر⁄ ک م (ڈی پی اے)