چانسلر شپ کے لیے چوٹی کے دونوں امیدواروں کے درمیان ٹیلی وژن مباحثے کے بعد آج جرمن پارلیمان میں بھی زور دار بیانات کا تبادلہ ہوا۔ بدھ کے روز جرمن پارلیمنٹ میں یورپی قرضوں کے بحران پر بحث کے دوران چانسلر انگیلا میرکل نے اپنے انتخابی حریف کو خوب آڑے ہاتھوں لیا۔ گزشتہ اجلاسوں کے برعکس حالیہ اجلاس کے دوران ایوان کے دونوں جانب سے تلخ جملوں کا تبادلہ ہوا۔ تجزیہ کار اس صورت حال کو انتخابات سے چند روز قبل محض ایک دوسرے کو زیر کرنے کی کوشش قرار دے رہے ہیں۔

ایک ایسے وقت میں جب جرمن انتخابات کے انعقاد میں انتہائی کم دن باقی رہ گئے ہیں، دونوں بڑے امیدوار ایک دوسرے کو کڑی تنقید کا نشانہ بنا رہے ہیں۔ اس حوالے سے کوئی بھی موقع ہاتھ سے جانے نہیں دیا جارہا۔

یہاں یہ بات قابل ذکر ہے کہ انگیلا میرکل پر تنقید کے نشتر برسانے والے پیئر شٹائن بروک کی جماعت میرکل کی پچتی پالیسیوں کی عملی انداز میں حمایت اور مدد کرتی رہی ہے اور اب ان کی جانب سے یہ کہا جا رہا ہے کہ میرکل حکومت نے بحران کی شکار یورپی معیشتوں کو جس انداز میں قرضے فراہم کیے ہیں، اس سے جرمنی کو اقتصادی بحران کا سامنا ہو سکتا ہے۔

پارلیمنٹ میں بحث کے دوران پیئر شٹائن بروک کا کہنا تھا کہ میرکل نے معاشی بحران کے شکار یورپی ممالک کے لیے بچتی اقدامات پر تو بہت زیادہ توجہ مرکوز کی ہے لیکن اپنے ملک کی اقتصادی ترقی کی طرف ان کی توجہ انتہائی کم رہی ہے۔ اس حوالے سے ان کا مزید کہناتھا، ’’آپ طاقت کی معمار ہیں لیکن جرمنی کی معمار نہیں ہیں۔‘‘

میرکل بھی کہاں پیچھے رہنے والی تھیں، انہوں نے یورپی اقوام کو کہا کہ وہ اپنی پالیسی پر کاربند رہیں اور اپوزیشن کو شور مچانے دیں۔ ان کا کہنا تھا، ’’ جب ہر مسئلے کا حل کثرت رائے سے ووٹنگ کے بعد نکالا گیا ہو تو پھر اس طرح کے واویلے کی کوئی حیثیت نہیں رہتی۔‘‘

شٹائن بروک کے اعتراضات کا جواب میرکل نے ان الفاظ میں دیا، ’’مجھے تو سمجھ نہیں آتی کہ ان لوگوں کو خوشی کیوں نہیں ہو رہی۔ یہ اِن کا مسئلہ ہے کہ یہ جرمنی میں ہونے والی ترقی پر خوش نہیں ہو سکتے۔ عوام اس بات کو پسند نہیں کرتے۔‘‘

سوشل ڈیموکریٹک پارٹی اور اس کی اتحادی گرین پارٹی نے تقریباﹰ سبھی بیل آؤٹ پیکجز کی منظوری کے دوران میرکل حکومت کی مکمل حمایت کی تھی۔