ڈوئچے پوسٹ ڈاک کے شعبے کی سب سے بڑی جرمن کمپنی ہے، جو ماضی میں مکمل طور پر سرکاری انتظام میں کام کرتی تھی اور اسی لیے پوری طرح ملکی محکمہ ڈاک کا حصہ تھی۔ پھر کئی برس پہلے حکومت نے اس کی نج کاری کر دی تھی۔

ڈاکیے چاہے جرمن ہوں، کتے تو کاٹیں گے: سالانہ ڈیڑھ ہزار زخمی

ڈوئچے پوسٹ کی طرف سے جنوبی صوبے باویریا کے دارالحکومت میونخ میں بتایا گیا کہ کوئی عام خط بھیجنا، جسے جرمن زبان میں Standardbrief (یا اسٹینڈرڈ لیٹر) کہا جاتا ہے، ملکی صارفین کی طرف سے اس کمپنی کی سب سے زیادہ استعمال ہونے والی سروس ہے۔

اب تک ایک معیاری خط کے لیے ٹکٹ کی قیمت 0.85 یورو ہے، جو یکم جنوری 2025ء سے 10 سینٹ اضافے کے ساتھ 0.95 یورو کر دی جائے گی۔

ڈوئچے پوسٹ کا ’پیکٹ کاپٹر‘: ڈرون کے ذریعے ڈاک بھی

اسی طرح اب تک کوئی پوسٹ کارڈ صرف 0.7 یورو کی ٹکٹ لگا کر بھیجا جا سکتا تھا۔ آئندہ لیکن پوسٹ کارڈ کے لیے ٹکٹ کی مالیت بھی 95 سینٹ ہو گی۔

اضافے کے بعد بھی قیمت یورپی اوسط سے کافی کم

ڈوئچے پوسٹ کے اعلان کے مطابق نئے سال کے آغاز سے کسی عام خط کے لیے ٹکٹ کی قیمت اضافے کے بعد بھی ایسے ہی کسی خط کے لیے یورپی یونین کے رکن دیگر ممالک میں ادا کی جانے والی اوسط قیمت سے کافی کم  ہی رہے گی۔

یورپی یونین کے کسی رکن ملک میں مجموعی اوسط کے لحاظ سے کوئی پوسٹ کارڈ یا عام خط بھیجنے پر آنے والی لاگت 1.50 یورو ہوتی ہے۔

جہاں تک 50 گرام تک وزنی کسی خط کا تعلق ہے تو اس پر اگلے سال کے آغاز سے اب تک کے ایک یورو کے مقابلے میں 1.10 یورو لاگت آئے گی۔ اسی طرح کوئی بڑا خط اب 1.60 یورو کے بجائے 1.80 یورو کی ٹکٹ کے ساتھ بھیجا جا سکے گا۔

سانتا کلاز کے نام تیس ہزار خطوط، جرمن ڈاکخانے نے جواب دیے

اب تک پانچ کلو تک وزن والا کوئی بھی پارسل 6.99 یورو میں بھیجا جا سکتا تھا۔ آئندہ ایسے کسی پارسل کے لیے 7.69 یورو کی ٹکٹ درکار ہو گی۔

فیڈرل نیٹ ورک ایجنسی کی طرف سے منظوری باقی

ڈوئچے پوسٹ کا کہنا ہے کہ اس کی طرف سے اپنی پوسٹل سروسز کے نرخوں میں پچھلی مرتبہ اضافہ تین سال قبل کیا گیا تھا۔ لیکن اب یہ اضافہ اس لیے ناگزیر ہو گیا تھا کہ مجموعی طور پر مہنگائی بہت زیادہ ہو چکی ہے، کمپنی کے کارکنوں کی تنخواہوں میں کافی اضافہ بھی کرنا پڑا اور اب جرمنی میں صارفین میں ذاتی نوعیت کے رابطوں کے لیے خط لکھنے کا رجحان بھی کافی کم ہو چکا ہے، جس کا مطلب کمپنی کی آمدنی میں کمی ہے۔

ڈاکٹر روتھ فاؤ کی خدمات کا اعتراف، یادگاری ڈاک ٹکٹ جاری

کمپنی کے مطابق نئے پوسٹل سروس چارجز دو سالہ مدت کے لیے 31 دسمبر 2026ء تک مؤثر رہیں گے۔ یعنی 2027ء سے ان میں ممکنہ طور پر دوبارہ اضافہ کیا جا سکے گا۔ جہاں تک چند ہفتے بعد نئے سال سے نافذ ہونے والے مجوزہ نرخوں کا تعلق ہے، تو نگران محکمے کے طور پر فیڈرل نیٹ ورک ایجنسی نامی جرمن ادارے نے ابھی تک ان کی منظوری نہیں دی، جو قانوناﹰ لازمی ہے۔

ڈوئچے پوسٹ کی مالک کمپنی کا نام ڈی ایچ ایل (DHL) ہے، جو دنیا بھر میں کوریئر سروسز پیش کرنے والا ایک جرمن ادارہ ہے اور جس کے صدر دفاتر شہر بون میں جرمن نشریاتی ادارے ڈوئچے ویلے کے پہلو میں ہیں۔

م م / ش ر (روئٹرز، ڈی پی اے)