اب یہ بات یقینی ہے کہ انگیلا میرکل تیسری بار جرمن چانسلر بنیں گی اور سی ڈی یُو، سی ایس یُو اور ایس پی ڈی پر مشتمل ایک بڑی مخلوط حکومت کی قیادت کریں گی۔ اس کابینہ میں کرسچین ڈیموکریٹک یونین کے پانچ، سوشل ڈیموکریٹک پارٹی کے چھ جبکہ کرسچین سوشل یونین کے تین وُزراء شامل ہوں گے۔

وزیر محنت اور سات بچوں کے ماں اُرسلا فان ڈیئر لایَن کو وزارت دفاع کا قلمدان سونپنے کا اعلان ایک غیر متوقع پیشرفت قرار دی جا رہی ہے۔ جرمنی میں کئی حلقے فان ڈیئر لایَن کو جرمنی کی آئندہ چانسلر کے روپ میں بھی دیکھتے ہیں۔

وزیر دفاع کے طور پر تھوماس ڈے میزئر کو کافی تنقید کا سامنا رہا۔ اب انہیں ایک مرتبہ پھر وزیر داخلہ بنانے کا اعلان کیا گیا ہے۔ وہ اس عہدے پر 2009ء تا 2011ء بھی تعینات رہے تھے۔

جرمن پریس نے ایس پی ڈی کے چیئرمین زیگمار گابریل کو ’سُپر منسٹر‘ کا خطاب دیا ہے۔ ’سپر منسٹری‘ میں اقتصادیات کے ساتھ ساتھ اُس جرمن پروگرام کی نگرانی بھی شامل ہو گی، جس کے تحت جرمنی بتدریج جوہری توانائی ترک کرتے ہوئے آئندہ اپنی ضرورت کی تمام تر توانائی قابل تجدید ذرائع سے حاصل کرنا چاہتا ہے۔ گابریل نائب چانسلر بھی ہوں گے۔

سوشل ڈیموکریٹک پارٹی کے فرانک والٹر شٹائن مائر گزشتہ پارلیمان میں اپنی پارٹی کے حزب کے قائد تھے۔ وہ دو ہزار پانچ تا دو ہزار نو بھی میرکل کے وزیر خارجہ کی حیثیت سے کام کر چکے ہیں اور نئی مخلوط حکومت میں بھی اُنہیں یہی قلمدان سونپنے کا فیصلہ کیا گیا ہے۔ 2009ء میں چانسلر شپ کے امیدوار شٹائن مائر کو میرکل کے ہاتھوں شکست اٹھانا پڑی تھی۔

آندریا ناہلیس سوشل ڈیموکریٹک پارٹی کی سیکرٹری جنرل ہیں۔ اُنہیں محنت اور سماجی امور کی وزارت سونپی جا رہی ہے۔ وہ اپنی جماعت کے اندر بائیں بازو کے دھڑے کی نمائندہ سمجھی جاتی ہیں۔

ایس پی ڈی کے ہائیکو ماس نئی کابینہ کے غیر متوقع ناموں میں سے ایک ہیں اور اُنہیں امورِ انصاف کی وزارت کا قلمدان دیا گیا ہے۔ وہ ماہرِ قانون ہیں اور صوبائی سطح پر تو بہت سرگرم رہے ہیں لیکن وفاقی سطح پر سیاست کرنے کا یہ اُن کا پہلا تجربہ ہو گا۔

اُنتالیس سالہ مانوئیلا شویزِک جرمن میڈیا کی فیورٹ سیاستدان ہیں۔ اُنہیں نئی کابینہ میں خاندان، بزرگوں، خواتین اور نوجوانوں کے امور کا وزیر بنانے کا فیصلہ کیا گیا ہے۔ وہ اس سے پہلے جرمن صوبے میکلن برگ فور پومرن میں محنت، صنفی مساوات اور سماجی امور کی وزیر رہ چکی ہیں۔

باربرا ہینڈرکس ایس پی ڈی کے مالیاتی امور کی نگران کے طور پر اب تک زیادہ تر پس منظر میں رہی ہیں لیکن اب وزیر ماحول کے طور پر اُنہیں وفاقی سطح پر پہلی صف میں کارکردگی دکھانے کا موقع مل رہا ہے۔ ساتھ ساتھ وہ تعمیرات اور شہری ترقی کے امور کو بھی دیکھیں گی۔

اب تک کے وزیر ماحول پیٹر آلٹمائر کو چانسلر آفس کے نئے وزیر کا عہدہ سونپا گیا ہے۔ اُنہیں چانسلر میرکل کا سب سے قریبی ساتھی تصور کیا جاتا ہے۔ چانسلر آفس کے نئے وزیر کے طور پر جرمن خفیہ اداروں کے درمیان رابطہ کاری کی ذمے داریاں بھی اُنہی کے ہاتھوں میں ہوں گی۔

گزشتہ حکومت کی طرح نئی حکومت میں بھی سی ڈی یُو کے وولف گانگ شوئبلے ہی وزیر خزانہ ہوں گے۔ 71 سالہ شوئبلے کابینہ کے عمر رسیدہ ترین رکن ہوں گے۔ 1990ء میں ایک حملے کا نشانہ بننے کے بعد سے وہ اپنے فرائض ایک وہیل چیئر پر بیٹھ کر انجام دیتے ہیں۔

پروفیسر یوہانا وانکا وزیر تعلیم کے ہی عہدے پر برقرار رہیں گی۔ سرقہ بازی کے الزامات پر وزیر تعلیم آنیٹے شاوان کے مستعفی ہونے کے بعد یوہانا وانکا نے یہ منصب فروری 2013ء میں سنبھالا تھا۔

جرمنی کے نئے وزیر صحت ہیرمان گروہے ہوں گے۔ چانسلر میرکل کی سیاسی جماعت کرسچین ڈیموکریٹک یونین کے سیکرٹری جنرل گروہے یہ عہدہ فری ڈیموکریٹک پارٹی سے تعلق رکھنے والے ڈانیل باہَر کی جگہ سنبھالیں گے۔ گروہے حالیہ انتخابات میں چانسلر میرکل کی انتخابی مہم کے منیجر تھے۔ انہوں نے یہ مہم انتہائی کامیابی سے چلائی تھی۔

کرسچن سوشل یونین سے تعلق رکھنے والے الیگذانڈر ڈوبرنٹ کو وزیر برائے ڈیجیٹل انفراسٹرکچر بنایا جائے گا۔ وہ اب اس بات کو یقینی بنائیں گے کہ مستقبل میں شہری ترقی کے حوالے سے ترتیب دیے جانے والے منصوبہ جات مطلوبہ ثمرات لائیں۔

ہانس پیٹر فریڈرش اب وزارت داخلہ کے بجائے زراعت کی وزارت سنبھالیں گے۔ بطور وزیر داخلہ این ایس اے اسکینڈل کے دوران کرسچن سوشل یونین سے تعلق رکھنے والے اس سیاستدان کے ردعمل کو انتہائی تنقید کا نشانہ بنایا گیا تھا۔

گیرڈ ملر کو وزیر برائے ترقیاتی امور بنایا گیا ہے۔ کرسچن سوشل یونین سے تعلق رکھنے والے گیرڈ ملر پہلی مرتبہ برلن کے سیاسی منظر نامے پر جلوہ گر ہوں گے۔

اے ایف ڈی کا کہنا ہے کہ یورپی یونین کی بیرونی سرحدوں کو بند کر دینا چاہیے تاکہ غیر قانونی مہاجرین اس بلاک میں داخل نہ ہو سکیں۔ اس کا یہ بھی کہنا ہے کہ ملکی سرحدوں کی نگرانی بھی سخت کر دی جائے۔ اس پارٹی کا اصرار ہے کہ ایسے سیاسی پناہ کے متلاشی افراد کو فوری طور پر ملک بدر کر دیا جائے، جن کی درخواستیں مسترد ہو چکی ہیں۔

متبادل برائے جرمنی کا قیام سن دو ہزار تیرہ میں عمل میں لایا گیا تھا۔ اس وقت اس پارٹی کا بنیادی نکتہ یہ تھا کہ یورپی یونین کے ایسے رکن ریاستوں کی مالیاتی مدد نہیں کی جانا چاہیے، جو قرضوں میں دھنسی ہوئی ہیں۔ تب اس پارٹی کے رہنما بیرنڈ لوکے نے اس پارٹی کو ایک نئی طاقت قرار دیا تھا لیکن سن دو ہزار تیرہ کے انتخابات میں یہ پارٹی جرمن پارلیمان تک رسائی حاصل کرنے میں ناکام ہو گئی تھی۔

’جرمنی پہلے‘ کا نعرہ لگانے والی یہ پارٹی نہ صرف دائیں بازو کے انتہا پسندوں کی حمایت حاصل کرنے کی کوشش میں ہے بلکہ یہ ایسے افراد کو بھی اپنی طرف راغب کرنے کی خاطر کوشاں ہے، جو موجودہ سیاسی نظام سے مطمئن نہیں ہیں۔ کچھ ماہرین کے مطابق اے ایف ڈی بالخصوص سابق کمیونسٹ مشرقی جرمنی میں زیادہ مقبول ہے۔ تاہم کچھ جائزوں سے معلوم ہوتا ہے کہ یہ پارٹی جرمنی بھر میں پھیل چکی ہے۔

اے ایف ڈی جرمنی کی سولہ وفاقی ریاستوں میں سے چودہ صوبوں کے پارلیمانی اداروں میں نمائندگی کی حامل ہے۔ مشرقی جرمنی کے تمام صوبوں میں یہ پارٹی ایوانوں میں موجود ہے۔ ناقدین کے خیال میں اب یہ پارٹی گراس روٹ سطح پر لوگوں میں سرایت کرتی جا رہی ہے اور مستقبل میں اس کی مقبولیت میں مزید اضافہ ممکن ہے۔

اے ایف ڈی جمہوریت کی حامی ہے لیکن کئی سیاسی ناقدین الزام عائد کرتے ہیں کہ اس پارٹی کے کچھ ممبران نیو نازی ایجنڈے کو فروغ دے رہے ہیں۔ یہ پارٹی ایک ایسے وقت میں عوامی سطح پر مقبول ہوئی ہے، جب انتہائی دائیں بازو کے نظریات کی حامل پارٹیاں تاریکی میں گم ہوتی جا رہی ہیں۔ ان میں این پی ڈی جیسی نازی خیالات کی حامل پارٹی بھی شامل ہے۔

تقریبا پانچ برس قبل وجود میں آنے والی اس پارٹی کے اندر طاقت کی جنگ جاری ہے۔ ابتدائی طور پر اس پارٹی کی قیادت قدرے اعتدال پسندی کی طرف مائل تھی لیکن اب ایسے ارکان کو پیچھے دھکیل دیا گیا ہے۔ ناقدین کے مطابق اب اس پارٹی کے اہم عہدوں پر کٹر نظریات کے حامل افراد فائز ہوتے جا رہے ہیں۔ ان میں اس پارٹی کی موجودہ رہنما ایلس وائڈل بھی شامل ہیں۔

اے ایف ڈی اور مہاجرت مخالف تحریک پیگیڈا کے باہمی تعلقات بہتر نہیں ہیں۔ پیگیڈا مشرقی جرمن شہر ڈریسڈن میں باقاعدہ بطور پر احتجاج کا سلسلہ جاری رکھے ہوئے ہے۔ تاہم اے ایف ڈی نے پیگیڈا کے کئی حامیوں کی حمایت بھی حاصل کی ہے۔ تاہم یہ امر اہم ہے کہ پیگیڈا ایک سیاسی پارٹی نہیں بلکہ شہریوں کی ایک تحریک ہے۔

امریکی صدر ڈونلڈ ٹرمپ اور بریگزٹ رہنما نائیجل فاراژ کی طرح جرمن سیاسی پارٹی اے ایف ڈی کے رہنما بھی مرکزی میڈیا سے متنفر ہیں۔ اے ایف ڈی مرکزی میڈیا پلیٹ فارمز کے ساتھ دوستانہ تعلقات بنانے کے لیے کوشش بھی نہیں کرتی بلکہ زیادہ تر میڈیا سے پوچھے گئے سوالات کے جوابات دینا بھی مناسب نہیں سمجھتی۔