ڈنمارک کے دارالحکومت میں سائیکل سواری کے لیے ساڑھے تین سو کلومیٹر طویل نیٹ ورک موجود ہے۔ ٹریفک سگنلز پر سائیکل سواروں کے لیے ترجیحی اشارے موجود ہیں۔ سگنلز پر سبز اشارے کے انتظار کے لیے ’فٹ ریسٹ‘ بھی بنائے گئے ہیں۔ انگریزی میں ایک لفظ ’کوپین ہیگینائز‘ ماحول دوست شہروں کے لیے متعارف ہو چکا ہے۔

ہالینڈ کا شہر ایمسٹرڈم بھی یورپ میں سائیکل دوستی کے لیے شہرت رکھتا ہے۔ روزانہ کی بنیاد پر ایمسٹرڈم میں سائیکل سوار تقریباً بیس لاکھ کلومیٹر کا فاصلہ طے کرتے ہیں۔ اس شہر کی میدانی سطح بھی سائیکلنگ کے لیے مناسب ہے۔ ہالینڈ کے ایک اور شہر اتریخت میں سائیکلیں کھڑی کرنے کا سب سے بڑا گیراج موجود ہے۔ اس میں ساڑھے بارہ ہزار سائیکلیں کھڑی کرنے کی گنجائش ہے۔

بیلجیم کے شہر اینٹورپ میں سائیکلیں کھڑی کرنے کے بے شمار مقامات ہیں۔ اس شہر کو بھی ’کوپن ہیگینائزڈ‘ قرار دیا جاتا ہے۔ کرائے پر سائیکل حاصل کرنے کے نظام کو وسعت دینے کے علاوہ ساحل تک سائیکلنگ ٹریک کو توسیع دی جائے گی۔ پیدل چلنے والوں کے لیے بھی مختلف سڑکوں پر پل بنانے کا سلسلہ جاری ہے۔ اس کے باوجود شہر کی سڑکیں ٹریفک سے بھری رہتی ہیں۔

پیرس کی شہری انتظامیہ بتدریج سائیکل نیٹ ورک کو توسیع دینے کا سلسلہ جاری رکھے ہوئے ہے۔ اتوار کے دن تو کئی سڑکیں ٹریفک کے لیے بند اور سائیکل سواروں کے لیے کھلی ہوتی ہیں۔ بطور سیاح پیرس میں سائیکلنگ آسان ہے۔ کرائے پر سائیکل حاصل کرنے میں دشواری نہیں ہوتی۔ سائیکل دوستی ایک اور فرانسیسی شہر اسٹراسبرگ میں بھی دیکھی جا سکتی ہے۔ پورے فرانس میں پیرس کو سب سے زیادہ سائیکل دوست شہر قرار دیا جاتا ہے۔

سویڈن کے شہر مالمو کی شہری انتظامیہ سائیکلنگ کے فروغ کے لیے کثیر رقوم خرچ کر رہی ہے۔ اس مقصد کے لیے پانچ سو کلومیٹر طویل نیٹ ورک دستیاب ہے۔ راستے میں سائیکل میں ہوا بھرنے کی سہولت بھی فراہم کر دی گئی ہے۔ مالمو اور کوپن ہیگن کے درمیان ’بائیک فیری‘ بھی سیاحت کو فروع دینے کا سبب بن رہی ہے۔ مالمو میں بائیسکل ہوٹل بھی ہیں اور اپنی سائیکل ہوٹل کے کمرے کے باہر بھی کھڑی کی جا سکتی ہے۔

ناروے کے پہاڑی شہر ٹرونڈہائم میں لفٹ کے ذریعے پہاڑی حصے پر سائیکل سواروں کو پہنچایا جاتا ہے۔ شہر کے پہاڑی حصے میں 130 کلومیٹر لمبا سائیکل ٹریک موجود ہے اور اس پر تین سو افراد بیک وقت سائیکلنگ کر سکتے ہیں۔

جرمنی میں میونسٹر ایک ایسا شہر ہے، جہاں آبادی سے زیادہ سائیکلیں ہیں۔ یہ ویسٹ فیلیا نامی علاقے میں واقع ہے۔ اسی لیے یہ جرمنی کا وہ شہر بھی ہے، جہاں سائیکلوں کی چوری بھی بہت زیادہ ہے۔ ان چوریوں سے بھی مقامی شہری حوصلہ نہیں ہارے اور ہر چوری کے بعد نئی سائیکل خرید لیتے ہیں۔ شہر میں سائیکل چلانا آسان ہے۔ اونچ نیچ کے بغیر کھلے میدانی راستے میونسٹر کے سائیکل سواروں کو بہت پسند ہیں۔

سن 2002 سے ہسپانوی شہر بارسلونا میں سائیکل کرائے پر بھی حاصل کی جا سکتی ہے۔ اس شہر میں ڈیڑھ سو کلومیٹر سے بھی طویل سائیکل ٹریک نیٹ ورک ہے۔ شہر سائیکل سواروں کے لیے محفوظ قرار دیا جاتا ہے۔ سیاحوں کو بھی کرائے کی سائیکلیں لے کر ساحل اور دوسرے تاریخی مقامات تک جانے میں آسانی ہوتی ہے۔

سوئٹزرلینڈ کا شہر بازل بھی ایک وسیع میدانی علاقے میں واقع ہے۔ ایک جگہ سے دوسری جگہ تک جانے کے لیے فاصلے بھی زیادہ نہیں ہیں۔ اسی لیے یہ سائیکلنگ کے لیے بھی ایک آسان شہر ہے۔ گلیوں میں بھیڑ ہوتی ہے اور سائیکل سواروں کو بھی احتیاط کرنا پڑتی ہے۔ گرمیوں میں کئی سائیکل سوار سوئٹزرلینڈ کے مختلف شہروں میں سائیکل چلاتے ہوئے خوبصورت جھیلوں تک جانے کو ایک پرکشش تفریح سمجھتے ہیں۔

جرمنی میں بچے بہت چھوٹی عمر میں ہی سائیکل چلانا سیکھ لیتے ہیں، کئی مرتبہ تو چلنا سیکھنے سے بھی پہلے۔ بچے جب آٹھ یا نو برس کی عمر کو پہنچتے ہیں تو پولیس اہلکار اسکولوں میں آ کر ’سائیکل لائسنس‘ نامی پروگرام کے تحت انہیں سائیکل چلانے کے لیے ٹریفک کے اصول سکھاتے ہیں۔

جرمن صوبے نارتھ رائن ویسٹ فیلیا کے شہر میونسٹر (تصویر میں) کو سن 2015 میں سب سے بہتر ’سائیکل دوست‘ شہر قرار دیا گیا تھا۔ کارلسروہے اور فرائبرگ جیسے جرمن شہر بالترتیب دوسرے اور تیسرے نمبر پر آئے تھے۔ تاہم جرمنی کے بڑے شہر اس فہرست میں بہت نیچے رہے۔ بے تحاشا کاروں اور زیر تعمیر عمارتوں کے سبب برلن کا نمبر تیسواں رہا تھا۔

جرمنی بھر میں سائیکلوں کے لیے مختص راستوں کا جال بچھا ہوا ہے۔ باویریا کے جنگلوں سے لے کر شہروں کے نواح میں ’اربن جنگلوں‘ تک میں سائیکل چلانے کے لیے راستے ہیں۔ تصویر میں وادی احر دکھائی دے رہی ہے جہاں سائیکل سوار انگور کے کھیتوں کے درمیان سے گزرتے راستوں پر سائیکل چلا رہے ہیں۔ پیڈل چلاتے پاؤں تھک گئے، تو رک جائیے اور مقامی وائن سے لطف اندوز ہویے۔

صرف سائیکلوں کے لیے متعین راستے پر اگر کوئی پیدل چلنا شروع کر دے تو سائیکل سوار بُرا مانتے ہیں۔ علاوہ ازیں اگر آپ اپنی سائیکل تیز نہیں چلا رہے تو بہتر ہے کہ آپ سائیکل پکڑ کر فٹ پاتھ پر پیدل چلنا شروع کر دیں۔ ورنہ پیچھے سے آنے والے سائیکل سوار گھنٹیاں بجا بجا کر آپ پر غصہ نکالتے رہیں گے۔

جرمنی میں موسم بہار آتے ہی دن لمبے ہونا شروع ہو جاتے ہیں اور ساتھ سڑکوں پر سائیکل سواروں کی تعداد بڑھ جاتے ہے۔ اگر آپ سائیکل چلانے والوں کو ذرا غور سے دیکھیں تو آپ کو ایسا کم از کم ایک معمر جوڑا ضرور دکھائی دے گا، جنہوں نے ایک جیسی شرٹس پہن رکھی ہوں گی اور ایک ساتھ سائیکل چلا رہے ہوں گے۔ ایسا منظر دیکھ کر محبت پر یقین بڑھ جاتا ہے۔

کرسمس کے تہوار سے لے کر ایسٹر کے تہوار تک سرد موسم سے بچنے کی خاطر جرمن شہری بھاری اور گرم کپڑوں میں ملبوس دکھائی دیتے ہیں۔ سائیکل چلانے کے لیے پولیسٹر کے بنے کپڑے (Spandex) سردی سے تو نہیں بچاتے لیکن پسینہ آنے کی صورت میں یہ بہت کارگر ثابت ہوتے ہیں۔ سائیکل چلانے کے لیے موزوں لباس پہننا بھی اہم ہے۔

سب سے اہم اصول یہ ہے کہ نشے کی حالت میں گاڑی نہیں چلائی جا سکتی۔ بظاہر تو ایسی حالت میں سائیکل چلانا بہت خطرناک دکھائی نہیں دیتا، لیکن اگر خون میں الکحل کی مقدار مقررہ حد سے زیادہ ہو تو سائیکل چلانا نہ صرف آپ کے لیے بلکہ گاڑیاں چلانے والوں کے لیے بھی خطرناک ثابت ہو سکتا ہے۔ اسی لیے بہتر ہے کہ آپ سائیکل کہیں لاک کریں اور ٹیکسی لے لیں۔

سائیکل چلانے کا مطلب یہ نہیں کہ لوگ گاڑی خریدنے کی استطاعت نہیں رکھتے۔ نہ ہی محض ورزش کی خاطر سائیکل چلائی جاتی ہے۔ بلکہ یہ نقل و حرکت کا ایک باقاعدہ ذریعہ ہے، جو ماحول دوست بھی ہے۔ اگر کسی کی سائیکل خراب ہو گئی ہے، اور آپ اسے ٹھیک کرنا جانتے ہیں اور آپ کے پاس وقت بھی ہے تو دوسروں کی تھوڑی سی مدد ضرور کیجیے۔

اگر آپ سائیکل چلاتے تھک گئے ہیں تو جرمنی میں آپ اپنی سائیکل ٹرین، ٹرام یا پھر بس میں ساتھ لے جا سکتے ہیں۔ تاہم اس کے لیے آپ کو اضافی ٹکٹ چاہیے۔ علاوہ ازیں اگر پبلک ٹرانسپورٹ میں لوگ زیادہ ہیں اور آپ اپنی سائیکل سمیت اس میں سوار ہو رہے ہیں تو لوگوں کی غصیلی نظروں کا سامنا بھی کرنا پڑ سکتا ہے۔ فولڈ ہو جانے والی سائیکلیں اس حوالے سے آپ کے لیے اور دوسرے مسافروں کے لیے زیادہ بہتر رہیں گی۔