یہ سکہ آثار قدیمہ کی تاریخ میں ایک اہم دریافت قرار دیا جاتا ہے۔ اس سکے پر آسمان کی ایک تصویر کندہ ہے۔ کائناتی مظہر کی یہ تصوراتی نقش نگاری آسمانی رازوں کی قدیم ترین تصویر کشی ہے۔ دھات کا یہ سکہ صوبے سیکسنی میں آثار قدیمہ کی کھدائی کے دوران 1999 میں ملا تھا۔ اندازہ ہے کہ نیبرا نامی یہ سکہ کم از کم 36 سو سال پرانا ہے۔ اس پرنقش کائناتی مظاہر دراصل اُس وقت کے مذہبی عقائد کی دلالت کرتے ہیں۔

یہ قدیمی نمونہ سن 2008 میں جنوب مغربی جرمنی میں ایک غار سے دریافت کیا گیا۔ Venus of Hohle Fels نامی یہ فن پارہ انسانی صورت گری کا قدیم ترین شاہکار قرار دیا جاتا ہے۔ ہاتھی دانت کی بنی قریب چھ سینٹی میٹر کی اس انسانی شبیہ کے بارے میں یقین ہے کہ یہ تب تعویز کے طور پر استعمال کی جاتی تھی۔ یہ 40 ہزار سال پرانی ہے۔ یوں قبل از تاریخ کے عہد کا یہ نمونہ قدیم ترین معلوم انسانی صورت گری قرار دیا جاتا ہے۔

برلن میں جاری Restless Times: Archaeology in Germany نامی اس نمائش میں یہ طلائی کلاہ بھی رکھا گیا ہے۔ برنجی دور میں تخلیق کی گئی سونے کی چار ٹوپیوں میں سے تین برلن کی اس نمائش میں موجود ہیں۔ انہیں ایک ہزار سال قبل کے دور کے دیوتاؤں کی علامتوں اور خصوصیات سے منسلک کیا جاتا ہے، جو تب وسطی یورپ میں لوگوں کی ایک بڑی تعداد کے لیے انتہائی مقدس تھے۔

جرمنی سے دریافت ہونے والے ہزاروں قدیمی نوادرات پہلی صدی عیسوی کے ہیں۔ شہر کولون سے ملنے والے یہ دیے بھی برنجی دور کے ہیں۔ تاریخی حوالہ جات کے مطابق رومن سلطنت نے پہلی صدی عیسوی میں کولون میں ایک نئی آبادی بسائی تھی، جو تجارتی حوالے سے انتہائی اہم ثابت ہوئی۔ سن دو ہزار سات میں اسی شہر سے رومن دور کی ایک کشتی بھی دریافت ہوئی تھی، جس کی عمر انیس سو سال بنتی ہے۔

برلن کے Gropius Bau Museum میں جاری نمائش میں یہ زیور بھی موجود ہے۔ جرمنی کے شمالی شہر ہیربرٹنگن میں سن دو ہزار دس کے اختتام پر کیلٹک شہزادی کا ایک مقبرہ دریافت ہوا تھا۔ ساتھ ہی وہاں کانسی اور سونے کے بنے زیوارات بھی ملے تھے، جن سے ان شواہد کو تقویت ملتی ہے کہ چھٹی صدی قبل از مسیح میں بھی یورپ اور دیگر خطوں کے مابین تجارت ہوتی تھی۔

جرمن صوبے نارتھ رائن ویسٹ فیلیا کے شہر ہالٹرن میں رومن دور کا ایک مخصوص مقبرہ دریافت کیا گیا تھا۔ اس مقبرے سے ایک شخص کی جسمانی باقیات کے علاوہ ایک ایسا بیڈ بھی ملا تھا، جو اس دور میں مُردوں کے لیے مخصوص تھا۔ ماہرین کے مطابق ایسے بیڈ اٹلی سے جرمنی منتقل کیے گئے تاکہ کسی رومن شہری کی موت کے بعد بھی اس کے آرام کا خیال رکھا جا سکے۔ دریافت شدہ یہ بیڈ ایک ہزار نو سو سال پرانا ہے۔

یہ اوزار انسانی تاریخ میں سب سے زیادہ استعمال کیا گیا۔ یہ چھری یا کلہاڑی نما آلہ افریقہ میں دو ملین برس پہلے بھی پایا جاتا تھا۔ یورو ایشیائی ممالک میں البتہ اس اہم اوزار کی تاریخ چھ لاکھ برس سے زائد پرانی نہیں۔ یہ اوزار دراصل کاٹنے، مکس کرنے، مارنے یا پھینکنے کے لیے بھی استعمال کیا جاتا تھا۔ تصویر میں نظر آنے والا یہ پتھریلا اوزار 35 ہزار سال پرانا ہے۔

یہ کانسی کا بنا چھوٹا سا مجسمہ ان گیارہ مجسموں میں سے ایک ہے، جو سن دو ہزار دس میں برلن میں تاریخی مقامات کی کھدائی کے دوران دریافت ہوئے تھے۔ نازی دور حکومت میں ان مجسوں کو میوزیم سے اٹھا لیا گیا تھا اور ایک ڈپو میں منتقل کر دیا گیا تھا۔ دوسری عالمی جنگ کے دوران ہونے والی بمباری کی حدت اور تباہی نے اس مجسمے کے رنگ و روغن پر بھی منفی اثرات مرتب کیے۔

سن انیس سو نوے کے اواخر میں جرمن صوبے میکلن برگ بالائی پومیرانیا میں دریائے ٹولینزے کے کناروں پر جاری آثار قدیمہ کے لیے کھدائی کے دوران ہزاروں کی تعداد میں انسانی ہڈیاں اور مختلف قسم کے ہتھیار ملے تھے۔ اس مقام کو یورپ کا قدیم ترین جنگی میدان قرار دیا جاتا ہے، جہاں ہونے والے جنگی معرکے میں دیگر خطوں سے تعلق رکھنے والے جنگجو بھی شریک ہوئے تھے۔ اس میدان جنگ سے ملنے والی اشیا 33 سو برس پرانی ہیں۔

سن دو ہزار بارہ میں جرمن شہر وِٹن برگ میں ایک مکمل لیبارٹری دریافت کی گئی تھی۔ اس قدیمی لیبارٹری میں وہ تمام اہم آلات ملے، جو تجربہ گاہوں میں استعمال ہوتے ہیں۔ دریافت کے وقت اس لیبارٹری سے ملنے والے آلات اور برتن چھوٹے چھوٹے حصوں میں ٹوٹے ہوئے تھے۔ تاہم جب ماہرین نے انہیں جوڑا تو معلوم ہوا کہ یہ تو یورپ کی پہلی سائنسی تجربہ گاہ تھی۔ اندازہ ہے کہ یہ سن پندرہ سو بیس تا پندرہ سو چالیس کے دور کی ہے۔

جنوبی جرمن علاقے میں واقع جھیل کونسٹانس کے قریب ہی یہ قدیمی نمونہ ملا۔ اندازہ ہے کہ یہ نئے سنگی دور کا ہے۔ مٹی کے پلاسٹر پر بنائی گئی یہ تخلیق اس بات کی غمازی کرتی ہے کہ انسان چار ہزار سال قبل از مسیح بھی اپنے گھروں کو مختلف طریقوں سے سجاتے تھے اور ان کے آرائش کرتے تھے۔ اس نمونے میں دراصل اس زمانے کے خداؤں اور روایات کے مطابق گھر کو محفوظ بنانے والے طریقے استعمال کیے گئے ہیں۔

قرون وسطیٰ میں رومن کیتھولک مقدس مقامات کی زیارتوں کے دوران ان نمونوں کو بطور بیج یا زیبائش کے لیے اپنے بدن پر سجاتے تھے۔ کچھ لوگ تو ان بیجز کی مقدس حیثیت کی وجہ سے انہیں قبروں تک بھی لے جاتے تھے۔ یہ قدیمی بیج ہاربرگ (موجودہ جرمن شہر ہیمبرگ کا ایک علاقہ) سے ملا تھا۔ اندازہ ہے کہ ایسی عبادتی علامتیں تیرہویں اور چودہویں صدی میں اس علاقے میں لائی گئی تھیں۔ اس بیج میں ’یسوع مسیح گدھے پر سوار‘ ہیں۔

سن دو ہزار پانچ میں ایک کوہ پیما نے اپر لوساتیا میں اپنی ایک مہم کے دوران اتفاق سے چاندی کے یہ سکے ڈھونڈ نکالے تھے۔ ان میں سے زیادہ تر سکے گیارہویں صدی عیسوی کے ہیں۔ تجارتی عمل کے دوران یہ چاندی کے سکے دنیا کے مختلف علاقوں سے یورپ پہنچے، حتیٰ کہ کچھ سکے تو بغداد سے سفر کرتے ہوئے یہاں تک پہنچے۔ باقاعدہ کرنسی کی ایجاد سے قبل یہی سکے خرید و فروخت کے لیے استعمال ہوتے تھے

العلا کبھی خطے کے مختلف تجارتی راستوں کا مرکز ہوا کرتا تھا۔ اس مقبرے کی طرح یہ علاقہ آثار قدیمہ کے خزانے سے بھرا ہوا ہے۔

مدائن صالح سعودی عرب کے مشہور شہر مدینہ سے تقریبا چار سو کلومیٹر شمال مغرب میں واقع ہے۔ العلا کے مضافات میں واقع یہ آثار قدیمہ سن دو ہزار آٹھ سے عالمی ثقافتی ورثے کا حصہ ہیں۔ دو ہزار برس پہلے یہاں پتھروں کو تراشتے ہوئے ایک سو گیارہ مقبرے بنائے گئے تھے۔

قدیم دور میں یہ قوم الانباط کا مرکزی اور تجارتی علاقہ تھا۔ یہ قوم اپنی زراعت اور نظام آبپاشی کی وجہ سے مشہور تھی۔ یہ قوم نظام ماسيليات (ہائیڈرالک سسٹم) کی بھی ماہر تھی اور اس نے اس خشک خطے میں پانی کے درجنوں مصنوعی چشمے تیار کیے تھے۔

قدیم دور کا انسان کئی پیغامات پیچھے چھوڑ گیا ہے۔ یہ وہ جملے ہیں، جو دو ہزار برس پہلے کنندہ کیے گئے تھے۔ امید ہے سیاح انہیں نقصان نہیں پہنچائیں گے۔

سعودی ولی عہد نے فرانس کے ساتھ ایک معاہدہ کیا ہے، جس کے تحت دونوں ممالک مل کر ایسے قدیم شہروں کی حفاظت کریں گے تاکہ آئندہ نسلیں بھی ان کو دیکھ سکیں۔

اس کے تحفظ کے لیے اٹھائے جانے والے اقدامات سے پہلے اس سے متعلقہ تمام اعداد و شمار جمع کیے جا رہے ہیں۔ مارچ میں پیمائش کے دو سالہ پروگرام کا آغاز کیا گیا تھا۔ اس کے لیے سیٹلائٹ تصاویر، ڈرونز اور ہیلی کاپٹر استعمال کیے جا رہے ہیں۔

ابھی تک صرف مخصوص شخصیات کو ہی ان آثار قدیمہ تک جانے کی اجازت فراہم کی جاتی تھی۔ مثال کے طور پر سن دو ہزار پندرہ میں برطانوی پرنس چارلس کو العلا میں جانے کی اجازت دی گئی تھی۔ اب سعودی عرب تمام سیاحوں کی ایسے اجازت نامے فراہم کرنے کا منصوبہ رکھتا ہے۔

تین سے پانچ برسوں تک تمام سیاحوں کی رسائی کو العلا تک ممکن بنایا جائے گا۔ ابھی یہ شہر سیاحوں کی میزبانی کے لیے تیار نہیں ہے۔ فی الحال وہاں صرف دو ہوٹل ہیں، جن میں ایک سو بیس افراد قیام کر سکتے ہیں۔

سوات کے علاقے اوڈیگرام میں سلطان محمود غزنوی کے دور کی تعمیر کردہ مسجد شمالی پاکستان کی سب سے پرانی مسجد ہے جو 440 ھجری یعنی 1048 اور 1049 عیسوی کے درمیان تعمیر کی گئی تھی۔ 1985ء میں اٹالین آرکیالوجیکل مشن نے اس مسجد کو دریافت کیا تھا۔

اوڈیگرام کے ایک رہائشی اور ماہر آثار قدیمہ جلال الدین نے ڈوئچے ویلے کو بتایا کہ گیارہویں صدی کے دوران جب سلطان محمود غزنوی نے صوبہ سرحد (خیبر پختون خوا) پر حملہ کیا تو اُس کی فوج باجوڑ ایجنسی کے ذریعے سوات کی تاریخی وادی میں داخل ہوئی۔

سوات کی وادی میں داخل ہونے کے بعد علاقے کو فتح کرنے کے لیے سلطان محمود غزنوی نے اپنی فوج کو دو حصوں میں تقسیم کیا: ایک گروپ جس کی سربراہی وہ خود کر رہے تھے، دریا عبور کرنے کے بعد اس تاریخی علاقے میں داخل ہونے کے بعد اس وقت کے آخری بادشاہ راجہ گیرا کے ہیڈ کوارٹر پر حملہ آور ہوا۔ فتح حاصل کرنے کے بعد سلطان محمود غزنوی نے اس مسجد کی تعمیر کا حکم دیا اور اس وقت کے حاکم منصور نے یہ مسجد تعمیر کروائی۔

1985ء میں اس مسجد کو دریافت کرنے والے اٹالین آرکیالوجیکل مشن نے اس عبادت گاہ کی بوسیدہ دیواروں کو دوبارہ تعمیر کیا جبکہ مسجد کو جانے والے راستے اور وضو خانے بھی تعمیر کیے۔ ساتھ ساتھ اس مسجد کو چاروں طرف سے محفوظ بھی بنایا گیا۔

اوڈیگرام میں پہاڑوں کے دامن میں 1984ء میں مسجد کے احاطے سے ایک کتبہ دریافت ہوا، جس پر درج تھا کہ محمود غزنوی نے اپنے بھتیجے حاکم منصور کو مسجد کی تعمیر کا حکم دیا تھا۔ حاکم منصور نے اپنے سپہ سالار نوشتگین کے زیر نگرانی مسجد تعمیر کروائی، جس کا مقصد علاقے میں اسلام کا فروغ تھا۔

ایک اور ماہر آثار قدیمہ فضل خالق کے مطابق مسجد کے مقام پر بدھ مت کے دور کے آثار بھی نمایاں ہیں۔ یہ آثار مسجد کی تعمیر سے پہلے بھی یہاں موجود تھے، جنہیں توڑا گیا اور پھر اُنہی پتھروں کو استعمال کرتے ہوئے یہ مسجد تعمیر کی گئی۔

اوڈیگرام (سوات) کی سلطان محمود غزنوی مسجد قدیم اسلامی فن تعمیر کی عکاسی کرتی ہے۔ مسجد میں 30 فٹ چوڑی دیوار، عام کمرے، طالب علموں کے کمرے، ان کے پڑھنے کی جگہ، قبرستان اور صحن میں پانی کا ایک تالاب بھی موجود ہے۔

کافی بلندی پر واقع اس مسجد تک جانے کے لیے ایک کشادہ راستہ تعمیر کیا گیا ہے۔ مسجد کی تعمیرِ نو کا کام 2011ء میں اٹالین آرکیالوجیکل مشن کی نگرانی میں انجام پایا اور اس پر دو ملین یورو کی لاگت آئی۔ اٹالین آرکیالوجیکل مشن پاکستان کے ڈائریکٹر ڈاکٹر لوکا ماریا الویری کے مطابق مسجد کی تزئین و آرائش پاکستان اور روم حکومت کے درمیان 2006ء میں طے ہونے والے سو ملین ڈالر کے ایک آرکیالوجیکل معاہدے کا حصہ ہے۔

اٹلی کے آرکیالوجیکل مشن کے تحت اوڈیگرام میں مسجد کے آثار کی کھوج کا کام 1985ء سے لے کر 1999ء تک جاری رہا۔ اطالوی حکومت وادیء سوات میں قدیم ورثے کی حفاظت کے کئی دیگر منصوبوں پر بھی کام کر رہی ہے۔

مسجد سے نیچے وادی میں دیکھنے پر یہ خوبصورت منظر دکھائی دیتا ہے۔ پہاڑوں کے دامن میں واقع یہ قدیم اور تاریخی مسجد اب سیاحوں اور عام لوگوں کے لیے کھولی جا چکی ہے اور دور دراز علاقوں سے لوگ اس مسجد کو دیکھنے کے لئے جاتے ہیں۔ یہاں اب باقاعدگی سے نمازِ جمعہ کا بھی اہتمام کیا جاتا ہے۔

تیرہویں صدی عیسوی میں تعمیر کردہ یہ کیھیڈرل قرون وسطیٰ کا ایک اعلیٰ تعمیراتی نمونہ ہے۔ اس کی خاص بات وہ بڑے بڑے مجسمے بھی ہیں، جو ناؤم برگ کے نامعلوم مجسمہ سازوں نے تخلیق کیے۔ یُوٹا فان ناؤم برگ کو قرون وسطیٰ کی خوبصورت ترین خاتون تصور کیا جاتا ہے۔ اگر مجسمہ سازوں کو معلوم ہوتا کہ ایک دن اس کیتھیڈرل کو عالمی ثقافتی ورثہ قرار دے دیا جائے گا، تو شاید وہ اس خاتون کے چہرے پر مسکراہٹ بھی بکھیر دیتے۔

گوئبیکلی ٹیپے انسانی تاریخ کے قدیم ترین معبد قرار دیے جاتے ہیں۔ ماہرین آثار قدیمہ کے مطابق یہ قریب بارہ ہزار برس پرانے ہیں۔ یوں یہ مقام انگلینڈ میں پتھر کے دور اور اہرام مصر سے بھی زیادہ پرانے ہیں۔ جنوب مشرقی اناطولیہ کے علاقے میں واقع ان قدیمی معبدوں کو دیکھنے کے لیے سیاح دور دور سے اس خطے کا رخ کرتے ہیں۔

برسوں کے استحصال اور ظلم و ستم کے باوجود جنوبی کوریا میں مخروطی طرز کی چار بودھ خانقاہیں ابھی تک محفوظ ہیں۔ ٹونگ ڈوسا، بسوکسا، بوبجسا اور ڈہاونگسا نامی چار خانقاہیں جنوبی کوریا میں ساتویں صدی عیسوی کی بودھ روایات کی عکاس ہیں۔ تصویر میں نظر آنے والی پانچ منزلہ مخروطی خانقاہ قریب تین ہزار بودھ بھکشوؤں کا مسکن تھی۔

قرطبہ کے خلیفہ عبد الرحمان الثالث نے اس شاندار شہر کی تعمیر کا حکم سن 936ء میں دیا تھا۔ اس شاہی شہر کی تعمیر میں چالیس برس کا عرصہ لگا تھا۔ عبدالرحمان نے اسے اپنی لونڈی الزھرا کے نام سے منسوب کیا تھا۔ یہ شہر اپنی تعمیر کے چوالیس برس بعد دشمنوں کے حملوں میں تباہ ہو گیا تھا۔ قرطبہ کے نواح میں واقع مدینہ الزھرا کی باقیات آج بھی مسلمانان اندلس اور اسپین کی تاریخ کا ایک اعلیٰ نمونہ ہیں۔

نویں صدی عیسوی میں وائکنگ عہد میں ہائٹابُو کا یہ تجارتی مرکز تعمیر کیا گیا تھا۔ اس تجارتی مرکز کی حفاظت کی خاطر تیس کلومیٹر طویل ایک دیوار بھی تعمیر کی گئی تھی، جسے ڈانےوِرکے کے نام سے جانا جاتا ہے۔ جرمن صوبے شلیسوگ ہولشٹائن میں ہائٹابُو اور ڈانےوِرکے کی باقیات آج بھی ایک قدیمی اثاثہ قرار دی جاتی ہیں۔

ایمازون کے جنگلات میں واقع چیری بیکیتے نیشنل پارک کو عالمی ثقافتی ورثے کا اعزاز دیا گیا ہے۔ اس کی وجہ وہاں واقع ثقافتی مقامات کے علاوہ اس پارک کا قدرتی حسن بھی ہے۔

پتھر کے اوپر پتھر رکھ کر یہ دیواریں بنائی گئی تھیں۔ پانچ سو سال پرانی ان دیواروں کو پختہ کرنے کی خاطر کوئی مواد استعمال نہیں کیا گیا تھا لیکن یہ دیواریں آج بھی اپنی جگہ کھڑی ہوئی ہیں۔ یہ دیواریں مشرقی افریقہ میں پائے جانے والے انتہائی اہم آثار قدیمہ میں شمار ہوتی ہیں۔ کہا جاتا ہے کہ یہ دیواریں حملہ آوروں سے بچاؤ کی خاطر بنائی گئی تھیں اور کسی زمانے میں ان دیواروں کے اندر انسانی بستیاں بھی تھیں۔

جاپان میں ناگاساکی کے علاقے میں مسیحیوں کے خفیہ مقامات میں ایک کیتھیڈرل، ایک قلعہ اور دس گاؤں سترہویں اور انیسویں صدی عیسوی کے دوران وہاں اس مذہبی برادری کے استحصال کا پتہ دیتے ہیں۔ یہ جاپانی مسیحی باشندے اس دور میں ایک دور دراز جزیرے کی طرف فرار ہو گئے تھے اور وہاں انہوں نے اپنے مذہبی عقیدے کو زندہ رکھا تھا۔

عمان کا شمال مغربی شہر قلھات چودہویں اور پندرہویں صدی عیسوی میں ایک اہم تجارتی مرکز تھا۔ اس شہر میں واقع بی بی مریم کا مزار اس شہر کی قدیمی روایات کا عکاس بھی ہے۔ سن دو ہزار دس کے اعداد و شمار کے مطابق اس شہر کی مجموعی آبادی قریب گیارہ سو بنتی تھی۔

طرز تعمیر یورپی لیکن ہندوستانی رنگ نمایاں، بھارتی شہر ممبئی کے اس علاقے والے حصے کی یہی خاص پہچان ہے۔ اس علاقے میں تعمیر کردہ عمارات میں انیسویں صدی عیسوی کا وکٹورین طرز تعمیر تو نمایاں ہے ہی لیکن بیسویں صدی عیسوی میں اس میں آرٹ ڈیکو کی آمیزش نے اسے اور بھی دیدہ زیب بنا دیا تھا۔ اب اس علاقے کو بھی عالمی ورثہ قرار دے دیا گیا ہے۔

وسیع تر جنگلات، دریاؤں اور قدرتی حسن سے مالا مال پیماچیئووِن آکی نامی علاقہ سات ہزار برس قبل انیشینابیگ لوگوں کا مسکن تھا۔ پیماچیئووِن آکی کا مطلب ہے، ’ایسا دیس جو زندگی بخشتا ہے‘۔ مقامی لوگوں کے لیے آج بھی اس مقام کو محفوظ بنانا ان کی ثقافت اور عقیدے کا ایک اہم جزو ہے۔ یہ باشندے جانتے ہیں کہ قدرت کے ساتھ ہم آہنگ کس طرح ہوا جا سکتا ہے۔