اسکول کی سطح پر طالبعلموں کی کار کر دگی پر اُن کا سماجی پس منظر بہت زیادہ اثر انداز ہوتا ہے۔ جرمن اسکولوں کے61 فیصد ٹیچرز کہتے ہیں کہ سماجی طور پر کمزور گھرانےکے بچوں کو اسکولوں میں تعلیم حاصل کرنے کے بہتر مواقع میسر نہیں ہیں۔ 54 فیصد کے مطابق اقتصادی طور پرسب سے مضبوط اس یورپی ملک میں گزشتہ پانچ سے دس سال کے دوران اسکول کے عملے کے بچوں کے ساتھ تعلقات میں واضح ابتری آئی ہے۔ ملکی سطح پر تیار کیے گئے اس جائزے کا عنوان ہے،’ سماجی پس منظر ایک رکاوٹ ‘ ۔

اس سلسلے میں 16سال سے کم عمر تقریباً دو ہزار بچوں اور تعلیم حاصل کرنے کے اہل بچوں کے 543 والدین کو بھی شامل کیا گیا۔ اس کے نتائج سے پتہ چلا کہ جرمنی میں مختلف سماجی طبقات سے تعلق رکھنے والے گھرانوں کے بچوں کی تعلیمی کار کردگی میں فرق روز بروز بڑھتا جا رہا ہے۔ ماہرین کا کہنا ہے کہ یہ حالات اس بات کے متقاضی ہیں کہ اسکول جانے والے بچوں کے والدین کی تعلیم اور ان کے روز گار کے مواقع پر بھی توجہ دی جائے۔ ساتھ ہی اسکولوں اور خاندانوں کے مابین تعلیمی اور تربیتی نوعیت کے تعاون کو فروغ دیا جائے۔

جرمنی میں والدین اور اساتذہ کی طرف سے معیاری اسکولوں سے جو توقعات وابستہ کی جاتی ہیں، یہاں کے اسکول ان پر پورے نہیں اترتے۔ ایک معیاری اسکول سے کیا مراد ہو سکتی ہے، اس بارے میں اساتذہ اور والدین متفق نظر آتے ہیں۔ ان میں سے92 فیصد کا خیال ہے کہ تعلیمی معیار کا دار ومدار ماہرین تعلیم پر ہے۔

دوسری جانب تعلیمی نظام اور اساتذہ کے رویے سے طالبعلموں کی بھی مخصوص توقعات وابستہ ہوتی ہیں۔ مثال کے طور پر 75 فیصد بچے یہ چاہتے ہیں کہ اساتذہ اپنے کام سے لطف اندوز ہوں۔ قریب 70 فیصد طالبعلموں کی خواہش ہے کہ اساتذہ ہر ایک طالبعلم کو انفرادی طور پر وقت دیں۔

اسکول کی سطح کے تعلیمی نظام کو جانچنےکے لیےکروائے گئے اس سروے کے مطابق جرمنی کے ہر دوسرے اسکول میں درس و تدریس کے چند گھنٹوں میں ذہنی یا جسمانی طور پر معذور بچوں کو دیگر بچوں کے ساتھ اکھٹا تعلیم دی جاتی ہے۔ زیادہ تر اساتذہ کا خیال ہے کہ معذور بچوں کو مخصوص اسکولوں کے بجائے عام اسکولوں میں بہتر طور سے تعلیم و تربیت دی جا سکتی ہے تاہم اساتذہ کی اکثریت اس امر کا اعتراف کرتی ہے کہ عام اسکولوں میں معذور بچوں کے انضمام کی راہ میں بہت سی رکاوٹیں پائی جاتی ہیں اور اس ضمن میں بہت سے حل طلب مسائل موجود ہیں۔ بنیادی مسائل ایسے کمروں کی کمی ہے جہاں معذور بچوں کے لیے سہولیات میسر ہوں دوسرے یہ کہ ایسے تربیت یافتہ عملے کا بھی فقدان پایا جاتا ہے جو جانتا ہو کے معذور بچوں کے ساتھ کس طرح کا رویہ اختیار کیا جانا چاہیے۔

km/ai(ots)