ہوا کی قوت کا استعمال صدیوں سے کیا جا رہا ہے۔ انیسویں صدی میں یورپ میں ہزاروں پن چکیاں یا وِنڈ ٹربائن نصب کیے جا چکے تھے۔ ڈچ لوگوں نے دلدلی علاقوں کو خشک کرنے کے لیے بھی انہیں استعمال کیا۔ اس وقت ہوا سے بجلی پیدا کرنے کو ماحول دوست خیال کیا جاتا ہے۔ گلوبل وارمنگ کے دور میں ہوا سے بجلی کے حصول کو اہم خیال کیا جا رہا ہے۔

وِنڈ ٹربائن سستی ترین بجلی پیدا کرنے کا ذریعہ ہے۔ کوئلے یا جوہری پلانٹ سے بجلی پیدا کرنا دو سے تین گنا مہنگا ہے۔ خشکی پر ہوا سے بجلی پیدا کرنا خاصا سستا ہے۔ سمندروں میں ہوا مسلسل چلتی ہے اور مختلف خالی مقامات پر ٹربائن لگانے کی ضرورت ہے۔ یہ درست ہے کہ ہوا سے بجلی کا حصول انتہائی سستا ہے۔

شمالی جرمنی میں ولہلمز ہاون میں نصب ایک بڑے وِنڈ ٹربائن سے چھ ہزار کلو واٹ بجلی پیدا ہوتی ہے اور یہ دس ہزار لوگوں کی ضرورت پوری کرتا ہے۔ پچیس برس پرانے بڑے ٹربائن صرف پانچ سو کلو واٹ ہی بجلی پیدا کر سکتے تھے۔ ہوا سے چلنے والے جدید ٹربائن کی بلندی بھی اب ایک سو اسی میٹر تک جا پہنچی ہے۔ جتنے یہ بلند ہوں گے اتنی زیادہ ہوا حاصل کر سکتے ہیں۔

سمندروں میں ہوا مسلسل اور تیز ہوتی ہے۔ پانچ فیصد بجلی سمندروں میں نصب ٹربائن مہیا کرتے ہیں۔ نیدرلینڈز میں بھی سمندروں میں وِنڈ ٹربائن کا ایک پارک ہے۔ سمندر سے بجلی کا حصول سن 2025 تک بڑھ کر پندرہ ہزار کلوواٹ ہو جائے گا جو چالیس ہزار لوگوں کی ضروریات پوری کرے گا۔ سمندروں میں ٹربائن کی تنصیب ایک مہنگا عمل ہے۔

اس وقت سب سے زیادہ وِنڈ ٹربائن کی تنصیب چین میں جاری ہے۔ سن 2020 کے دوران چین میں نصب کیے جانے والے وِنڈ ٹربائنز سے 52 گیگا واٹس بجلی حاصل کی جا رہی ہے۔ یہ بجلی 50 جوہری پاور پلانٹ سے حاصل ہونے والی بجلی کے برابر ہے۔ وِنڈ انرجی کی شروعات کرنے والے ممالک جرمنی اور ڈنمارک ہیں۔ ڈنمارک وِنڈ انرجی سے اپنی 50 فیصد بجلی کی ضرورت پوری کر رہا ہے جب کہ جرمنی صرف 25 فیصد اپنی ضروریات ہوا سے حاصل کر رہا ہے۔

دنیا بھر میں وِنڈ انرجی انڈسٹری سے وابستہ افراد کی تعداد تیرہ لاکھ کے قریب ہے۔ ان میں ساڑھے پانچ لاکھ افراد کو چین میں جب کہ امریکا میں ایک لاکھ دس ہزار اور نوے ہزار جرمنی میں اس شعبے میں کام کرتے ہیں۔ بھارت میں وابستہ افراد کی تعداد پینتالیس ہزار اور برازیل میں چالیس ہزار ہے۔ ونڈ انرجی کے ٹربائن کو نصب کرنے پر کوئلے کے پلانٹ سے کم خرچ آتا ہے اور اس میں ترقی سے روزگار کے زیادہ مواقع جنم لیں گے۔

کئی شہروں میں پہلے پہل وِنڈ ٹربائن نصب کرنے میں لوگوں نے مزاحمت کی لیکن اب حالات تبدیل ہو رہے ہیں۔ کئی شہروں میں لوگ ٹربائن نصب کرنے میں سرمایہ کاری کر کے منافع میں حصہ دار بھی ہیں۔ ایسے شہروں میں جرمن قصبہ اشٹارکن بُرگ بھی شامل ہے۔ فرینکفرٹ کے نواح میں واقع اس قصبے میں لوگوں نے وِنڈ انرجی کے توسیعی سلسلے میں سرمایہ کاری کرنے کا سلسلہ جاری رکھا ہوا ہے اور انہیں منافع میں بھی شامل کیا گیا ہے۔

ماضی کی طرح اب بھی سمندروں میں مال بردار بحری جہاز ڈیزل انجن کے ذریعے سفر جاری رکھتے ہیں۔ اب ان جہازوں کو وِنڈ ٹربائن کے ساتھ جوڑنے کی پلاننگ کی جا رہی ہے۔ اس عمل سے مال برداری کے کرایوں میں تیس فیصد کی کمی ممکن ہے۔ مستقبل میں مال بردار بحری جہاز ماحول دوست سبز ہائیڈروجن کا بھی استعمال کر سکیں گے۔

سمندروں کو وِنڈ انرجی کا بڑا ماخذ خیال کیا جاتا ہے لیکن کئی مقامات پر سمندر بہت زیادہ گہرے ہیں اور ایسی جگہوں پر وِنڈ ٹربائن نصب کرنا انتہائی مشکل ہے۔ اب اس کا ‌حل تیرتے ٹربائن پلیٹ فارم میں ڈھونڈا گیا ہے۔ ان تیرتے ٹربائن پلیٹ فارمز کو زنجیروں سے جوڑ دیا جائے گا۔ ایسے تیرتے پلیٹ فارم یورپ اور جاپان میں قائم کیے جا چکے ہیں اور مستحکم ہیں۔

ایک سو سینتالیس میٹر بلند وِنڈ ٹربائن مستقبل میں توانائی فراہم کریں گے اور یہ دیکھنے میں بھی خوبصورت لگتے ہیں۔ تصویر میں نظر آنے والا ٹربائین لندن میں نصب ہے۔ کئی ٹربائن گھروں پر بھی نصب ہو سکیں گے اور یہ کمرشل مقاصد کے لیے نہیں ہوں گے۔ عام طور پر شہروں میں ہوا کی رفتار کم ہوتی ہے اور گھروں میں وولٹائی سیلوں یا شمسی توانائی ایک مفید ذریعہ ہے بجلی حاصل کرنے کا۔

تنصیب کے تین سے گیارہ مہینوں کے دوران وِنڈ ٹربائن سے ضرورت کے مطابق بجلی کا حصول شروع ہو جاتا ہے۔ اس عمل میں کاربن ڈائی آکسائیڈ گیس کا اخراج صفر ہے۔ توانائی کا یہ ذریعہ فطرت سے جڑا ہے۔ جرمن ماحولیاتی ایجنسی کے مطابق ایک وِنڈ ٹربائن پر لاگت کوئلے سے چلنے والے پلانٹ سے ستر فیصد کم ہے۔

ہوا اور شمسی توانائی سے دنیا بھر کی توانائی کی ضروریات پوری ہو سکتی ہیں۔ وِنڈ ٹربائن سے بجلی کی ترسیل اس وقت شروع ہوتی ہے جب ہوا کی رفتار دس کلومیٹر فی گھنٹہ ہو جاتی ہے۔ جہاں سورج کی روشنی زیادہ میسر ہوتی ہے وہاں فوٹو وولٹائی سیلوں سے سستی بجلی حاصل ہو سکتی ہے۔ خطِ استوا کے قریب ہوا اور سورج کی روشنی سے بجلی کا حصول ممکن ہے۔ جن علاقوں میں ہوا تیز چلتی ہے، وہاں وِنڈ انرجی بڑا توانائی کا ذریعہ ہے۔