فرینکفرٹ کی اسکائی لائن انتہائی انوکھی ہے۔ جرمنی میں اتنی اونچی عمارتیں کہیں اور نہیں ہیں۔ یہاں سو میٹر اونچی عمارت پر آپ رپلنگ کر سکتے ہیں۔ یہ چیلنج مکمل کر لیں گے، تو زندگی کا کوئی بھی دوسرا چیلنج آپ کو کبھی دھمکا نہیں پائے گا۔

میونخ کے اولمپک اسٹیڈیم کی پلیکسی گلاس کی چھت ایک عجیب پہچان حاصل کر چکی ہے۔ یہاں زپ لائن پر دو سو میٹر کی اونچائی سے آپ تیزی سے نیچے کی طرف اترتے ہیں۔ اونچائی کے مقام سے آپ پورے اسٹیڈیم کا نظارہ کر سکتے ہیں اور مطلع صاف ہو تو آپ کو دور ایلپس کے پہاڑ بھی دکھائی دے سکتے ہیں۔

آپ خود کو سیباستیان فیٹل جیسا دیکھنا چاہتے ہیں؟ آئفل کے خطے میں واقع نیوربرگ رنگ میں ایسا ممکن ہے۔ آپ فارمولا ون ٹریک پر چاہیں تو خود ڈرائیو کریں اور چاہیں تو شریک پائلٹ بن جائیں۔ عام دنوں میں آپ شمالی لوپ میں ڈرائیونگ کا مزہ لے سکتےہیں اور ایسٹر پر تو یہاں گراں پری ٹریک بھی عام ریسرز کے لیے کھول دیا جاتا ہے۔

مہم جو کشتی ران بھرپور موجوں والے پانی کی تلاش میں ہوتے ہیں۔ ایلپس کے قریب ایسا پانی موجود ہے۔ پانی کی سطح اونچی ہو تو یہاں لہریں ایک مشکل چیلنج بن جاتی ہیں۔ آبشاریں اور ڈھلوانیں عبور کرنا آپ کو کینیڈا میں کشتی رانی جیسا لطف دے سکتا ہے۔

گارمِش پارٹن کِرشن کے علاقے سے ایلپس کے لیے ٹرین لیجیے۔ یہاں سے آپ ماؤنٹ وانک پہنچ جائیں گے، جہاں ایک انتہائی خوبصورت منظر آپ کا منتظر ہو گا۔ سترہ سو پچاس میٹر کی بلندی پر پہنچ کر تھرمل فلائٹ لیں، تو وہ ممکن ہے آپ کو گھنٹوں اڑاتی پھرے۔

کانسل وَنڈ پہاڑ سر کرتے ہوئے پانچ سو پچاس میٹر کی ایک عمودی دیوار آتی ہے۔ اوپر پہنچنے کے بعد رسی کا ایک پل عبور کرنا پڑتا ہے۔ یہ درست معنوں میں دل دہلا دینے والا سفر ہوتا ہے۔ کانسل وَنڈ ایلپس کے علاقے اوبرسٹ ڈورف کی دو ہزار اٹھاون میٹر اونچی چوٹی ہے۔

مہم کے لیے آپ کو ایک چوٹی پر پہنچ کر اپنا حوصلہ آزمانا ہوتا ہے۔ رَپ بوڈن وادی میں سو میٹر اونچا ٹائٹن آرٹی پل ایسا ہی ایک مقام ہے۔ یہیں چار سو پچاسی میٹر لمبا جرمنی کا رسی کا سب سے طویل پل بھی ہے۔ آپ پل کے ساتھ ساتھ زپ لائن پر سفر کر سکتے ہیں۔

مؤنگسٹن پل کا سو میٹر اونچا اسٹیل کا ڈھانچا جسے آپ قدم بہ قدم چل کر عبور کر سکتے ہیں۔ اوپر پہنچنے پر آپ کے سامنے دریائے وُوپر کا ایک انتہائی خوبصورت منظر ہوتا ہے۔ یہ پل اپنی طرز کا پورے یورپ کا سب سے انوکھا پل ہے۔ یہ پل صنعتی انقلاب کی ایک یادگار بھی ہے اور ممکن ہے کہ جلد ہی اسے یونیسکو کے عالمی ورثے کی فہرست میں بھی شامل کر لیا جائے۔

فالکن شٹائن غار میں داخلے کا واحد راستہ آبی ہے۔ یہاں گائیڈڈ ٹورز کا بھی اہتمام ہوتا ہے۔ یہاں نہ بجلی ہے اور نہ ہی ہم وار راستے۔ بعض مقامات پر یہ راستہ اتنا تنگ ہے کہ آپ کو غوطہ لگا کر آگے بڑھنا پڑتا ہے۔ یہ چودہ گھنٹوں کا دورہ ہوتا ہے اور اس میں آپ ساڑھے تین ہزار میٹر گہرائی میں جاتے ہیں۔

چودہ طبق روشن کرنے کے لیے ہمیشہ دوڑ دھوپ کی ضرورت نہیں ہوتی۔ آپ ایلپس پکس کی اس نظارہ گاہ پر کھڑے ہو کر بھی اپنے ذہن کو چونکا سکتے ہیں۔ گارمِش پارٹن کِرشن کے قریب یہ نظارہ گاہ ایک ہزار میٹر کی بلندی سے آپ کو ایک وادی کا مکمل منظر دکھاتی ہے۔ آپ یہاں کھڑے ہوں گے، تو ممکن ہے کہ آپ کی ٹانگیں کانپنے لگیں۔

امپیریل کیتھیڈرل، لٹل وینس ڈسٹرکٹ یا زبردست آرائش والے نیو ریذیڈنس پیلس جیسے مقامات کے ساتھ، یونیسکو کے عالمی ثقافتی ورثے کی فہرست میں شامل شہر بامبرگ ایک سیاحتی مقناطیس ہے۔ موسم سرما میں برف باری کے دوران یہ خاص طور پر باروک اور گوتھک فن تعمیر کے رومانوی مزاج کا شاہکار نظرآتا ہے۔ اس قابل دید منظر سے لطف اندوز ہوتے ہوئے بہت سےافراد سردی کے تدارک کے لیے یہاں موجود بہت سے شراب خانوں کا رخ کرتے ہیں۔

شویبِش گمیُنڈ صوابین آلب کے پہاڑی سلسلے کے دامن میں واقع ہے۔ اس کے مرکز میں واقع تاریخی عمارات غیر معمولی خصوصیات کی حامل ہیں۔ گرجا گھروں، راہب خانوں اور خوبصورت چوراہوں سے مزین یہ شہر اپنے ارد گرد کے مناظر کے ساتھ اور بھی خوبصورت نظارے پیش کرتا ہے اور سرمائی کھیلوں کے شائقین اور پیدل سفر کرنے والوں میں بہت مقبول ہے۔

اشٹٹ گارٹ کے نزدیک لُڈوِگزبُرگ کا سابق شاہی قلعہ واقع ہے۔ یہ رہائشی محل یورپ کی سب سے بڑی ’محفوظ ‘ باروک عمارات میں سے ایک ہے۔ سیاح سال بھر اس محل کو دیکھنے آ سکتے ہیں۔ اس شہر کے قدیمی حصے میں بہت سی دلکش گلیاں اور باروک گرجا گھر موسم کے اتار چڑھاؤ کے باوجود شائقین کے لیے مقناطیسی کشش کے حامل ہیں۔

جرمنی کے علاقے رُوہر کا دورہ سیاحوں کو ماضی میں لے جاتا ہے۔ بل کھاتی گلیاں اور جزوی طور پر لکڑی کے بنے قریب ڈیڑھ سو مکانوں کے پاس سے گزرتے ہوئے شہر کا وہ مرکزی حصہ آتا ہے، جہاں سینٹ جارج چرچ قائم ہے۔ رُوہر کی رومانوی وادی کے ارد گرد کے دیہی علاقے بھی اتنے ہی دلکش مناظر پیش کرتے ہیں۔ اس علاقے میں قرونِ وسطیٰ کے قلعے اِیزنبُرگ، بلانکن اشٹائن اور ہاؤس کیمناڈے غیر معمولی کشش کے حامل ہیں۔

یہ شہر موسم سرما کی ناقابل تردید خوبصورتی کا مظہر ہے۔ اٹھارہ ہزار باشندوں پر مشتمل یہ قصبہ کولون سےایک گھنٹے کی مسافت پر واقع ہے اورکچھ عرصہ پہلے تک ایک خوابیدہ گاؤں سمجھا جانے والا یہ قصبہ انسٹاگرام پر ایک ہاٹ اسپاٹ بن گیا۔ اس کے سپا پارک سے آپ کو فروئڈن برگ کے پرانے حصے کا ایک بہت ہی خوبصورت نظارہ دیکھنے کو ملتا ہے، جس میں 17 ویں صدی کے 80 کے قریب اورجزوی طور پر لکڑی کے بننے گھر بھی نظر آتے ہیں۔

ہارٹس کی پہاڑیاں سیکسنی انہالٹ کا ایک نسبتاً زیریں پہاڑی سلسلہ ہے، جو موسم سرما کے کھیلوں کے ایسے شائقین کو اپنی طرف متوجہ کرتا ہے، جو اسکیئنگ اور ہائکنگ وغیرہ کے لیے یہاں آتے ہیں اور ان ڈھلوانوں پر پیدل سفر کرنے کا لطف بھی اٹھاتے ہیں۔ اس علاقے کی قدرتی صفات کے علاوہ یہاں سرمائی تفریحات سے بھرپور جگہیں بھی ہیں۔ متعدد حسین مقامات مثلاﹰ ویرنی گیروڈے یا شہر ہارٹس انتہائی خوبصورت جگہیں ہیں۔

جرمنی میں کرسمس کا تصوراس علاقے کی مخصوص سجاوٹ کے بغیر کرنا مشکل ہے، جیسے کہ نٹ کریکر اور ’کرسمس اہرام‘ وغیرہ انتہائی منفرد چیزیں ہیں جن کے بارے میں بہت کم لوگ جانتے ہیں کہ یہ کرسمس کے تہوار سے جڑی خاص چیزیں ہیں۔ یہ خصوصی اشیاء پہاڑوں میں واقع قصبے زائفن میں بنائی جاتی ہیں۔ جب کرسمس کا سیزن ختم ہو جائے، تب بھی زائفن ایک قابل دید مقام ہے۔ اس علاقے میں اسکیئنگ اور پیدل سفر کے بھی کافی مواقع ہیں۔

سیکسنی کے قدیم ترین شہروں میں سے ایک اور دریائے ایلبے کے کنارے واقع شہر ڈریسڈن سے 25 کلومیٹر شمال مغرب میں واقع ہے مائسن کا شہر۔ سردیوں میں پانی پر چمکنے والا انوکھا شہر، جہاں ایک سے بڑھ کر ایک رومانوی کشش کے حامل علاقہ موجود ہے۔ اس تاریخی حد تک پرانے شہر کا دورہ یہاں کے ریستوراں اور کیفے دیکھے بغیر مکمل نہیں ہو سکتا۔ البریشٹسبرگ کاسل اور شلوسبرگ ہل پر قائم کیتھیڈرل بھی غیر معمولی کشش کے حامل ہیں۔

جرمن سٹی اسٹیٹ ہیمبرگ کے قریب واقع لیونےبُرگ شہر ایک ہزار سال پہلے نمک کی تجارت کی بدولت بہت امیر ہوا۔ اس کی سابقہ شان و شوکت کے آثار اب بھی پرانے شہر کو اس کے تاجروں کے مکانات، بل کھاتی گلیوں اور تاریخی واٹر ٹاورز کے علاوہ دیگر تعمیراتی شاہکاروں کی شکل میں نمایاں کرتے ہیں۔ جو کوئی پرسکون فطرت کا خواہش مند ہو، وہ قریبی Lüneburg Heath کا پیدل دورہ موسم سرما میں بھی کر سکتا ہے۔

بحیرہ بالٹک کے کنارے واقع شہر اشٹرالزُنڈ اینٹوں سے بنی شاندار عمارتوں کی انوکھی خوبصورتی کی بدولت یونیسکو کی عالمی ثقافتی میراث کی فہرست میں شامل ہے۔ یہاں خوبصورت فن تعمیر کے شاہکار گھروں، گرجا گھروں اور منفرد ٹاؤن ہال کی خوبصورتی سے لطف اندوز ہوا جا سکتا ہے۔ فطرت کا نظارہ اور اس میں بہترین سفر و سیاحت ۔ جرمنی کے سب سے بڑے جزیرے ریُوگن کے نیشنل پارک اور ساحلوں کو دیکھنا بھی انوکھا تجربہ ہوتا ہے۔

قلعوں اور محلات کے اس راستے (کاسل روڈ) پر سب سے پہلے ہائیڈل برگ کیسل آتا، جو دریائے نیکر کے کنارے واقع ہے۔ سترہویں صدی کے دوران جنگوں سے اس کو بہت نقصان پہنچا تھا۔ آج اس کے کھنڈرات کو محفوظ بنا لیا گیا ہے۔ رومانوی دور کے مصوروں نے اسے اپنی پینٹنگز کے ذریعے امر کر دیا ہے۔

اسی راستے پر مزید آگے جائیں تو آپ کو نیکر شٹائن آخ میں چار قلعے ایک ساتھ ملتے ہیں۔ کیسل روڈ پر ایک چھوٹے قصبے کا یہ ’غیر سرکاری ریکارڈ‘ ہے۔ ان میں سے دو قلعے آج بھی بہتر حالت میں ہیں بلکہ آباد ہیں۔ وہاں رہنے والے خاندانوں کی اجازت سے انہیں اندر جا کر بھی دیکھا جا سکتا ہے۔

نیکر سِیمرن علاقے میں واقع ہورنبیرگ قلعے کو دریائے نیکر کے کنارے واقع سب سے قدیم اور بڑا قلعہ سمجھا جاتا ہے۔ جرمنی کے مشہور ادیب گوئٹے نے 1773ء میں اپنے اولین ڈراموں میں سے ایک یہاں ہی لکھا تھا۔ گوئٹے نے اپنی زندگی کے 45 برس یہاں بسر کیے۔ اب اس قلعے کو ایک ہوٹل اور ریستوران میں تبدیل کر دیا گیا ہے۔

کاسل روڈ پر مزید آگے جائیں تو آپ کو جرمنی کے خوبصورت ترین قلعوں میں سے ایک نوئن شٹائن نظر آئے گا۔ اس محل میں نادر پینٹگز کے ساتھ ساتھ کئی دیگر قدیم اشیاء بھی موجود ہیں۔ آپ ایک ایسی جوتی کی تعریف بھی کر سکتے ہیں، جو کبھی روسی مہارانی کیتھرین دا گریٹ کی تھی۔

یاگسٹ وادی کے بلند ترین مقام پر لانگن بُرگ قلعہ واقع ہے۔ یہ محل 13ویں صدی سے ہوہن لوہے کے شاہی خاندان کی ملکیت ہے اور یہ آج بھی ان کی رہائش گاہ ہے۔ اس قلعے میں ایک کیفے کے ساتھ ساتھ ایک کار میوزیم بھی موجود ہے۔

آنس باخ ڈسٹرکٹ میں واقع لیشٹن آؤ قلعہ قرون وسطیٰ میں تعمیر کیا گیا تھا۔ سولہویں اور سترہویں صدی کی مقامی جنگوں میں یہ تباہ ہو گیا تھا۔ بعدازاں اس کی تعمیرنو اطالوی ڈچ قلعوں کی طرز تعمیر پر کی گئی۔

یہ قلعہ سترہویں صدی سے شینک فان شٹاؤفن برگ خاندان کی ملکیت میں ہے۔ اسی خاندان کے کرنل کلاؤز شینک گراف فان شٹاؤفن برگ نے 1944ء میں آڈولف ہٹلر پر قاتلانہ حملہ کیا تھا۔ نتیجتاﹰ یہ قلعہ جلا دیا گیا تھا تاہم بعدازاں اس کی تعمیر نو کی گئی۔

بامبرگ کی سات پہاڑیوں میں سے اونچی ترین پر آلٹن بُرگ قلعہ واقع ہے۔ تاریخ میں پہلی مرتبہ اس کا ذکر 1109ء میں ملتا ہے۔ چودہویں سے سولہویں صدی تک یہ بشپ آف بامبرگ کی رہائش گاہ رہا۔ تاہم انیس سو اسی کی دہائی میں اسے سیاحوں کے لیے کھول دیا گیا تھا۔

کو بُرگ قلعہ شہر کا ایک دلکش نظارہ پیش کرتا ہے۔ یہ 167 میٹر کی پہاڑی پر تعمیر کیا گیا تھا۔ اس کا شمار جرمنی کے ان قلعوں میں ہوتا ہے، جو آج بھی اپنی بہترین حالت میں موجود ہیں۔ 1530ء میں کلیسا میں اصلاحات کے بانی مارٹن لوتھر نے چھ ماہ تک یہاں ہی قیام کیا تھا۔

جرمن سرحد کے اندر واقع کاسل روڈ کا آخری سٹاپ کروناخ شہر میں بنتا ہے۔ روزنبرگ قلعے کی 750 سالہ تاریخ میں کبھی بھی اس پر حملہ نہیں کیا گیا۔ آج اس کے ایک حصے کو میوزیم میں تبدیل کر دیا گیا ہے، جہاں تیرہویں سے سولہویں صدی کی پینٹنگز رکھی گئی ہیں۔ اس کے بعد کاسل روڈ جمہوریہ چیک میں سے ہوتا ہوا پراگ تک جاتا ہے۔