کولون میں منائے جانے والے کارنیوال میں گلابی پیر کی پریڈ میں طنز و مزاح پر مبنی کئی فلوٹس شامل ہوتے ہیں جن میں سیاسی تبصرے بھی کیے جاتے ہیں۔ اس فلوٹ میں مصور بینکسی کا کام دیکھا جاسکتا ہے۔ یہاں انگیلا میرکل کی تصویر دیکھی جا سکتی ہے۔ انہوں نے اکتوبر 2018ء میں اعلان کیا تھا کہ وہ چوتھی اور آخری مرتبہ جرمنی کی چانسلر بن رہی ہیں۔

انگیلا میرکل کی جانب سے مستقبل میں اپنے عہدے کو چھوڑنے کے اعلان کے بعد ان کا عہدہ حاصل کرنے کی دوڑ لگ گئی ہے۔ اسی موضوع کوکارنیوال کے اس فلوٹ میں بھی پیش کیا گیا ہے۔ یہاں میرکل کی پارٹی سی ڈی یو کی موجودہ سربراہ آنے کرامپ کارن باؤر ’میرکل برٹ‘ کی بوتل کھولتی نظر آرہی ہیں۔ وہ اپنے حریف ژینز سپاہن اور فریڈرش میرز کے ساتھ نظر آرہی ہیں۔

یہاں سوشل ڈیموکریٹک پارٹی کی سربراہ آندریا ناہلیس اپنی سیاسی جماعت سے تعلق رکھنے والے اولاف شولز کے ساتھ ٹائی ٹینیک کے مشہور زمانہ منظر میں دیکھے جاسکتے ہیں۔ 2018ء کے علاقائی انتخابات میں ایس پی ڈی انتخابات میں زیادہ بہتر کارکردگی کا مظاہرہ نہیں کر سکی تھی، اسی صورتحال کو یہاں یہاں ڈوبتے ہوئے ٹائی ٹینیک کے طور پر پیش کیا گیا ہے۔

امریکی صدر ڈونلڈ ٹرمپ گولف کھیل کے شوقین ہیں۔ اس فلوٹ میں بھی وہ گولف کھیلتے ہوئے دیکھے جاسکتے ہیں۔ ان کی پیٹھ پر تحریر ہے، ’’مجھے اپنے آپ سے محبت ہے‘‘۔ ٹرمپ نیٹو اور ڈبلیو ٹی او جیسے اداروں کی طرف نشانہ لگا رہے ہیں۔

گزشتہ دو سالوں میں کارنیوال کے کئی فلوٹس میں بریگزٹ کے موضوع کو مختلف انداز میں پیش کیا گیا ہے۔ برطانیہ کی یورپی یونین سے الگ ہونے کی تاریخ اب قریب ہی ہے۔ اس فلوٹ میں دیکھا جا سکتا ہے کہ ایک شخص بریگزٹ کو مکے کے طور پر اپنے ہی منہ پر مار رہا ہے۔ اس کے دانتوں پر لکھا ہوا ہے ’ذمہ داریاں‘۔

بیلجیم کے جوہری پلانٹ میں دراڑوں کی خبرمنظر عام آنے کے بعد جرمن ریاست ’نارتھ رائن ویسٹ فیلیا‘ نے کسی حادثے کی صورت میں اپنے شہریوں کے لیے آیوڈین کی گولیوں کا آرڈر دیا تھا۔ یہاں لکھا دیکھا جا سکتا ہے، ’’اب تک سب کچھ صحیح ہو رہا تھا۔‘‘ لیکن اس جملے میں لفظ 'joot' یعنی درست کو 'jod' سے بدل دیا گیا ہے جس کا مطلب آئیوڈین ہے۔

اس فلوٹ میں دیکھا جاسکتا ہے کہ ایک سیاست دان کاروں کی صنعت سے نکلنے والی ضرر رساں گیس کو اپنے جسم میں ڈال رہا ہے۔ اس کے علاوہ دکھایا گیا ہے کہ کوئلہ اور آتش بازی بھی آلودگی کا باعث بنتے ہیں۔