بلند فشار خون یا ہائی بلڈ پریشر کو کم کرنے کے لیے چقندر کا استعمال انتہائی مفید خیال کیا جاتا ہے۔ نائٹریٹ سے مالا مال چقندر جسم میں خون کی گردش کو بہتر بناتا ہے۔ امریکا میں نیشنل لائبریری آف میڈیسن کے ایک مطالعاتی جائزے کے مطابق روزانہ ایک کپ چقندر کا جوس پینے سے بلڈ پریشر قابو میں رہتا ہے۔

انسانی جسم کے لیے سرخ چقندر میں انتہائی اہم غذائی اجزاء شامل ہوتے ہیں، جیسے کہ وٹامن بی، فولاد، میگنیشیم اور پوٹاشیم وغیرہ۔ وٹامن بی خون میں کولیسٹرول کی سطح کو کم کرتا ہے اور اس سے دل کی بیماریوں سے بچنے میں مدد مل سکتی ہے۔

چقندر میں شامل نائٹرک آکسائڈ انسانی دماغ کی رگوں میں خون کی روانی کو بہتر کرتا ہے۔ انسانوں کی بڑھتی ہوئی عمر کے ساتھ ساتھ جسم میں نائٹروجن آکسائیڈ تیار کرنے کی صلاحیت میں کمی ہوتی جاتی ہے۔ سن 2010 کے ایک مطالعے کے مطابق نائٹریٹ سے بھرپور خوراک کا استعمال کرنے والے افراد زیادہ دھیان اور منظم طریقے سے اپنے کام انجام دیتے ہیں۔

دنیا بھر میں اسپورٹس ایتھلیٹس چقندر سے مستفید ہوتے ہیں۔ اس میں موجود نائٹریٹس جسم کو کام کرنے کے لیے توانائی فراہم کرتے ہیں۔ فزیالوجی کے ماہرین کے خیال میں ورزش سے پہلے چقندر کا جوس پینے سے جسمانی صلاحیت میں نمایاں طور پر بہتری لائی جاسکتی ہے۔

چقندر کا روزانہ استعمال انسانی جسم میں جگر کی کارکردگی کو مؤثر بنانے میں انتہائی معاون ثابت ہوسکتا ہے۔ چقندر میں شامل بائٹین سے جگر میں کولیسٹرول اور چربی کی مقدار کم کرنے میں مدد ملتی ہے۔ چقندر میں بیٹلینز نامی روغن کی اعلیٰ مقدار سوزش ختم کرنے والی خصوصیات کی بدولت دائمی بیماریوں کو قابو کرنے میں بھی معاون ہوتی ہے۔

چقندر ہاضمہ بہتر بنانے کے لیے بھی مفید ہے اور اس میں شامل فائبرز ہاضمے سے جڑی بیماریوں کو پیدا ہی نہیں ہونے دیتے۔ روزانہ ایک گلاس سرخ چقندر کا جوس قبض، بواسیر، آنتوں کی سوزش اور پیٹ اور انتڑیوں کی کئی دیگر بیماریوں کے خطرات کو کم کرنے میں بھی مدد دیتا ہے۔

انگور میں بہت سے اہم اجزا ایسے ہیں جو انسانی جسم اور اعضا کی تطہیر میں اہم کردار ادا کرتے ہیں۔ انگور اینٹی آکسیڈینٹ ہونے کے علاوہ کولیسٹرول کم کرنے اور خون کی تطہیر میں بھی ہماری مدد کرتے ہیں۔ لیکن بغیر بیجوں والے انگور کھانے میں احتیاط کریں، کیوں کہ ان میں چینی کی مقدار اوسط سے زیادہ ہوتی ہے۔

ٹماٹر وٹامن سی اور اینٹی آکسیڈینٹ سے بھرپور ہوتے ہیں۔ ٹماٹر انسانوں میں مدافعتی نظام مضبوط بناتے ہیں ٹماٹروں میں موجود وٹامن سی جگر سے پیدا ہونے والی رطوبت (انزائم) بڑھاتی ہے۔ نکوٹین، نائٹرسائیمائن جیسے فاسد مادوں کو بے اثر کرنے میں وٹامن سی کا کردار اہم ہے۔

ٹماٹروں کی طرح لیموں میں بھی وٹامن سی کی بڑی مقدار موجود ہوتی ہے۔ لیموں معدے اور بڑی آنت کی صفائی میں بھی معاون ثابت ہوتے ہیں۔

اجوائن کے پتے اور بیج جسم کو فاسد مادوں سے پاک کرنے کے لیے بہترین قدرتی اینٹی آکسیڈینٹ ہیں۔ ان میں پائے جانے والے کچھ اجزا کو سرطان کا موجب بننے والے سیلز سے انسانی جسم کو بچاتے ہیں۔ اجوائن خاص طور پر تمباکو نوشی کے باعث جسم میں شامل مسموم مادوں کے خاتمے میں بھی مدد کرتی ہے۔

مارچوبہ کو جرمن زبان مین سپارگیل اور انگریزی مین اسپاراگس کہتے ہیں۔ جرمن شہری اسے شوق سے کھاتے ہیں اور اسے انسانی جسم اور اعضا کے لیے بہترین اینٹی آکسیڈینٹ قرار دیا جاتا ہے۔

انگریزی زبان کا محاورہ ہے کہ ایک دن میں ایک سیب، ڈاکٹروں کو دور رکھتا ہے۔ لذت سے بھرپور سیب عام انسانوں کو مرغوب ہوتے ہیں لیکن یہ ثابت شدہ ہے کہ انسانی معدہ اور آنتیں بھی سیب کو پسند کرتی ہیں۔ سیب خون کو فاسد مادوں سے بھی پاک کرتا ہے۔

پیاز میں موجود سلفر انسانی آنتوں کو صحت مند بناتا ہے اور جسم سے فاسد مادے ختم کرنے میں معاون ثابت ہوتا ہے۔ پیاز ہمارے جگر کے لیے بھی مفید ہے، اور جگر ہی خون کو زہریلے اور فاسد مادوں سے بچاتا ہے۔

جگر کی مجموعی صلاحیت کو بہتر بنانے میں انار نہایت اہم خیال کیا جاتا ہے۔ یہ کہنا بھی غلط نہ ہو گا کہ انار جگر کے لیے ایک طرح سے ویسے ہی معاون سے جیسے گاڑی کے لیے ایندھن۔

ہلدی جنوبی ایشیا میں ہزاروں برسوں سے دوا کے طور پر استعمال کی جا رہی ہے اور اب سائنسی طور پر اس کی افادیت ثابت ہو چکی ہے۔ کئی نظام انہضام اور کئی دیگر فوائد کے علاوہ ہلدی ایک بہترین اینٹی آکسیڈینٹ بھی ہے۔ اسے قدیمی اینٹی بائیوٹکس بھی قرار دیا جاتا ہے۔

لہسن خاص طور پر انسانی آنتوں اور خون کو خطرناک بیکٹیریا اور وائرس سے محفوظ رکھنے میں معاون ہے۔ لہسن میں موجود اینٹی آکسیڈینٹ انسانی اعضا کو فاسد اور زہریلے مواد سے بھی بچاتا ہے۔