برلن کی ٹیکنیکل یونیورسٹی کے طلبہ تجربہ گاہ میں موجود ہیں اور اس کمرے میں کمپیوٹر کے بارے میں بنیادی آگاہی دی جا رہی ہے۔ یہ ورکشاپ برلن کے ایک جمنازیم کے دس طلبہ کے لیے کرایا جا رہا ہے۔ تمام طلبہ کی نظرین دیوار پر نصب اسکرین پر لگی ہوئی ہیں۔ لیبارٹری انچارج کلاؤڈیا ایرمل کی نگرانی میں یہ نوجوان مشہور زمانہ کمپیوٹر گیم ’پیک مین‘ بنانے کی کوششوں میں مصروف ہیں۔

پروگرامنگ کی یہ ورکشاپ گیارہویں جماعت کے بچوں کے لیے خصوصی طور پر تیار کی گئی تھی۔ لیبارٹری انچارج کلاؤڈیا ایرمل نے بتایا کہ اس ورکشاپ میں انہی طلبہ کو فوقیت دی گئی ہے، جنہوں نے ماحول دوست ٹیکنالوجی میں اپنی دلچسپی ظاہر کی تھی۔ ہماری کوشش ہے کہ الیکٹریکل اور انفارمیشن ٹیکنالوجی کے طلبہ کو اس جانب راغب کیا جائے کیونکہ صنعتی پیمانے پر ان دونوں شعبوں کے فارغ التحصیل طلبہ کی مانگ بہت زیادہ ہے۔ ان شعبوں میں ماہرین کی قلت کے حوالے سے صورتحال بہت زیادہ ڈرامائی ہے۔

برلن کی ٹیکنیکل یونیورسٹی کے طلبہ نے کوشش کی کہ الیکٹریکل انجینئرنگ، انفارمیشن ٹیکنالوجی اور ریاضیات کے شعبوں کے طلبہ بھی ماحول دوست ٹیکنالوجی میں دلچسپی لینا شروع کریں۔ اس دوران ان سے یہ سوال بھی پوچھے گئے کہ انفارمیشن ٹیکنالوجی یا ریاضیات کا تحفظ ماحول کے ساتھ کیا تعلق بنتا ہے۔

ٹیکنکل یونیورسٹی برلن کا شمار ماحول دوست تعلیمی اداروں میں ہوتا ہے۔ اس یونیورسٹی میں تحقیق کے سلسلے میں تحفظ ماحول کے اصولوں کو بنیادی اہمیت دی جاتی ہے۔ کلاؤڈیا نے مزید بتایا کہ جرمن اسکولوں میں بچوں کو الیکٹریکل اور انفارمیشن ٹیکنالوجیز کے بارے میں بہت کم ہی معلومات فراہم کی جاتی ہیں۔ گرین ڈے کے دوران ٹیکنیکل یونیورسٹی برلن نے انٹرمیڈیٹ کرنے والے طلبہ کے علاوہ نچلی جماعتوں کے بچوں کو بھی اس بارے میں معلومات فراہم کیں۔ اس سلسلے میں چھٹی جماعت کے بچوں کو مثلاً یہ سمجھایا گیا کہ کوئی گاڑی اسی وقت ماحول دوست کہلائے گی، جب اس میں قابل تجدید توانائی استعمال ہو گی۔ ’’ اور پوٹیٹو یا آلو بیٹری بھی ماحول دوست منصوبے میں شامل ہے۔ کیونکہ یہ بیٹریاں آلو سے بنائی جاتی ہیں اور انہیں ایک کیلکولیٹر چلانے کے لیے استعمال کیا جا سکتا ہے‘‘۔

گرین ڈے میں موجود ایک استانی نے بتایا کہ کوشش کی جا رہی ہے کہ زیادہ سے زیادہ لڑکیاں اس منصوبے میں شامل ہوں کیونکہ ان دونوں شعبوں میں خواتین کی شدید کمی ہے۔ ’’مجھے یہ دیکھ کر افسوس ہوتا ہے کہ بہت کم لڑکیاں الیکٹریکل انجینئرنگ کی تعلیم حاصل کرتی ہیں اور ایسا نہ کرنے کی کوئی وجہ بھی نہیں ہے‘‘۔

جرمنی میں گرین ڈے اس سال دوسری مرتبہ منایا گیا ہے۔ ماہرین کا کہنا ہے کہ ماحول دوست ٹیکنالوجی میں تربیت کے مواقع اور تعلیم یافتہ لوگوں کی کمی کو پورا کرنے میں گرین ڈے اہم کردار ادا کر سکتا ہے۔