پناہ کے مسترد درخواست گزار کی جانب سے خود سوزی کا یہ واقعہ منگل انتیس مئی کے روز جرمن شہر گیوپینگن میں پیش آیا۔ ایران سے تعلق رکھنے والے ایک پینتیس سالہ شخص نے شہری انتظامیہ کے سامنے خود کو آگ لگا لی جس کے باعث وہ شدید جھلس گیا۔

تفصیلات کے مطابق یہ تارک وطن شہری انتظامیہ کے دفتر میں داخل ہوا اور وہاں موجود اہلکاروں سے جرمنی میں جمع کرائی گئی اپنی سیاسی پناہ کی درخواست کے بارے میں مدد طلب کی۔ اس ایرانی شہری کی جرمنی میں سیاسی پناہ کی درخواست مسترد کی جا چکی تھی۔ شہری انتظامیہ کے دفتر میں موجود خاتون اہلکار نے اس سے وعدہ کیا کہ وہ اس صورت حال کا جائزہ لے کر اس کی مدد کی کوشش کرے گی۔ تاہم یقین دہانی کرائے جانے کے باوجود ایرانی تارک وطن شدید غصے میں آ گیا۔

اسی دوران مشتعل تارک وطن نے اپنی جیب سے ایک بوتل نکالی اور اس میں موجود آتش گیر مادہ خود پر چھڑک کر آگ لگا لی۔ پولیس کا کہنا ہے کہ خاتون اہلکار بروقت مدد طلب کر کے آگ بجھانے میں کامیاب رہی۔ دفتر میں موجود دیگر اہلکاروں نے فوری طور پر تولیے اور صفائی کے لیے استعمال کی جانے والی بالٹیوں کی مدد سے آگ بجھا دی، تاہم اتنی دیر میں یہ تارک وطن شدید جھلس چکا تھا۔ پولیس کے مطابق جھلسنے کے بعد اس تارک وطن کو فوری طور پر ہسپتال منتقل کر دیا گیا، جہاں اس کا علاج کیا جا رہا ہے۔

جرمن نیوز ایجنسی ڈی پی اے سے گفتگو کرتے ہوئے اسی دفتر کے ایک اہلکار گُنٹر سٹولز نے بتایا کہ اس واقعے کے باعث ملازمین کو شدید صدمہ پہنچا۔ ان کا کہنا تھا، ’’بہت سے افراد نے اس شخص کی چیخیں سنیں۔‘‘

اس دوران عمارت کے ایک حصے کو فوری طور پر خالی کروا لیا گیا جب کہ بعد میں سرکاری دفتر کو باقی دن کے لیے بند کر دیا گیا۔

ش ح / ا ب ا (ڈی پی اے)