خبر رساں ادارے اے پی کے مطابق باؤٹسن پولیس کے ترجمان تھامس کناؤپ نے بتایا ہے کہ گزشتہ رات شہر کے مارکیٹ اسکوائر میں اسّی کے قریب جرمن افراد اور بیس تارکین وطن کے درمیان لڑائی شروع ہو گئی تھی۔ پولیس نے دونوں گروپوں کو الگ کرنے کے لیے مداخلت کی تو چند پناہ گزینوں کی جانب سے ان پر بوتلوں سے حملہ بھی کیا گیا۔ انتہائی دائیں بازو سے تعلق رکھنے والے یہ جرمن مظاہرین قوم پرست نعرے لگاتے ہوئے پناہ گزینوں کو ان کے کیمپ کی جانب دھکیلنے کی کوشش کر رہے تھے۔ بعد ازاں چند مظاہرین کی طرف سے کیمپ میں موجود ایک زخمی مہاجر کو ہسپتال لے جانے کے لیے آنے والی ایمبولینس پر پتھراؤ بھی کیا تاکہ وہ کیمپ تک نہ پہنچ سکے۔

معروف جرمن نیوز ویب سائیٹ اشپیگل آن لائن کے مطابق دونوں گروہوں میں زبانی بد کلامی کے علاوہ ہاتھا پائی بھی ہوئی۔ اخبار لکھتا ہے کہ باؤٹسن میں حالیہ چند مہینوں میں اس نوعیت کے واقعات میں اضافہ ہوا ہے۔ جرمن میڈیا کے مطابق منگل کے روز باؤٹسن کا ایک بتیس سالہ رہائشی ایک مہاجر کی جانب سے بوتل پھینکے جانے کے سبب زخمی ہو گیا تھا۔ رواں برس فروری میں باؤٹسن کے شہر میں جرمن تماشائی اٰس سابق ہوٹل کو جلتے دیکھ کر لطف اندوز ہوتے رہے تھے جسے مہاجرین کے کیمپ میں تبدیل کیا جا رہا تھا۔