آج جرمن دارالحکومت برلن میں ایس پی ڈی کے ہیڈ کوارٹرز میں تالیوں کی گونج میں پارٹی کے سربراہ زیگمار گابریل نے 2013ء کے انتخابات کے لیے پیئر شٹائن بروک کو پارٹی کی جانب سے چانسلر امیدوار نامزد کرنے کا اعلان کیا۔

اس موقع پر پیئر شٹائن بروک نے کہا کہ وہ یہ چیلنج قبول کرتے ہیں اور انہیں یقین ہے کہ آئندہ سال وہ انتخابات میں کامیابی حاصل کرتے ہوئے انگیلا میرکل کی جگہ یہ عہدہ سنبھال سکیں گے۔ایس پی ڈی کے پارلیمانی حزب کے قائد فرانک والٹر شٹائن مائر نے کہا: ’’آج ایس پی ڈی کے لیے ایک اچھا دن ہے۔ مجھے اس بات کا پختہ یقین ہے کہ پیئر شٹائن بروک بہترین امیدوار ہی نہیں ہیں بلکہ وہ ہمارے ملک کے لیے صحیح چانسلر بھی ثابت ہوں گے۔‘‘

65 سالہ پیئر شٹائن بروک میرکل کے پہلے دور حکومت میں وزیر خزانہ کے طور پر خدمات سرانجام دیتے رہے اور دونوں نے اُس اقتصادی بحران پر قابو پانے کے لیے ایک دوسرے کے ساتھ قریبی تعاون کیا تھا، جس نے 2008ء میں امریکی انویسٹمنٹ بینک لیہمن برادرز کے دیوالیہ  ہو جانے کے نتیجے میں جنم لیا تھا۔

ایس پی ڈی میں چانسلر شپ کے لیے تین امیدوار میدان میں تھے، جن میں پارٹی کے چیئر مین زیگمار گابریل کے ساتھ ساتھ سابق وزیر خارجہ فرانک والٹر شٹائن مائر بھی شامل تھے، جنہوں نے 2009ء کے انتخابات میں انگیلا میرکل کا مقابلہ کیا تھا اور ہار گئے تھے۔

رائے عامہ کے جائزوں کے مطابق پیئر شٹائن بروک چانسلر انگیلا میرکل اور وزیر خزانہ وولف گانگ شوئبلے کے بعد ملک کے تیسرے اہم ترین سیاستدان ہیں تاہم چانسلر بننے کے لیے انہیں ابھی بہت کام کرنا ہو گا۔

رائے عامہ کے جائزوں کے مطابق ایس پی ڈی میرکل کے قدامت پسندوں سے دَس پوائنٹس پیچھے ہے اور کسی بھی جماعت کے روایتی حکومتی اتحادی ساتھی اتنے طاقتور نہیں ہیں کہ وہ اُن کے ساتھ مل کر حکومت بنا سکیں۔ اس کا مطلب یہ ہو گا کہ قدامت پسند یونین جماعتیں اور اپوزیشن ایس پی ڈی ممکنہ طور پر مل کر ایک بڑی مخلوط حکومت بنائیں گے۔ جرمنی میں اگلے انتخابات 2013ء میں ستمبر یا اکتوبر میں منعقد ہوں گے۔

(aa/mm(afp