جرمن بسکٹ کمپنی باہلزن ’نازی دور میں جبری مشقت‘ کراتی رہی
21 اگست 2024![جرمن صوبے لوئر سیکسنی میں باہلزن کی فیکٹری](https://static.dw.com/image/48778396_800.webp)
مؤرخین کی جانب سے کی گئی ایک تحقیق کے نتیجے میں یہ بات سامنے آئی ہے کہ نازی دور میں بسکٹ اور کیک بنانے والی جرمن کمپنی باہلزن میں نہ صرف بڑے پیمانے پر جبری مشقت کرائی جاتی رہی بلکہ تب نازی حکومت کے ساتھ قریبی تعلقات ہونے کی وجہ سے اس کمپنی کو فائدہ بھی پہنچا تھا۔
دو مؤرخین، مانفریڈ گرِیگر اور ہارٹموٹ بیرگ ہوف کی مکمل کردہ اس تحقیق کے مطابق لائبنٹز اور پک اپ نامی بسکٹ بنانے والی اس کمپنی کے کاروبار میں نازی دور میں بڑی حد تک اضافہ ہوا تھا۔
اس تحقیق کے نتائج کے مطابق 135 سال پرانی اس کمپنی میں 1940ء سے لے کر 1945ء تک 800 مزدوروں سے جبری مشقت کرائی جاری رہی، جن میں اکثریت یوکرین اور پولینڈ سے تعلق رکھنے والی خواتین کی تھی۔
اس تاریخی تحقیق میں کہا گیا ہے کہ ان مزدوروں کے لیے مخصوص کپڑے کے ٹکڑے یا 'پیچز‘ پہننا ضروری تھا، جن کے ذریعے ان کی بطور غیر ملکی شناخت کی جاتی تھی اور نتیجتاﹰ ان کے ساتھ تفریق آمیز سلوک کیا جاتا تھا۔
تحقیق کی وجہ کیا بنی؟
یہ تحقیق باہلزن کی وارث ویرینا باہلزن کے 2019ء میں دیے گئے اس بیان کے بعد کی گئی، جس میں انہوں نے دعویٰ کیا تھا کہ نازی دور میں ان کی کمپنی میں جبری مشقت کرنے والے مزدوروں کے ساتھ ''اچھا سلوک‘‘ کیا جاتا تھا۔
ان کے اس بیان کی جرمنی میں شدید مذمت اور ساتھ اس پر تنقید بھی کی گئی تھی، جس کے بعد ویرینا باہلزن نے معافی مانگتے ہوئے اپنے اس بیان کو غلطی قرار دیا تھا۔
اس واقعے کے بعد کی جانے والی تحقیق کو باہلزن نے ہی کمیشن کیا تھا اور اس ریسرچ کے لیے فنڈز بھی اسی کمپنی نے فراہم کیے۔
اس ریسرچ کے نتائج کی اشاعت سے قبل باہلزن فیملی نے ایک بیان میں کہا تھا، ''ہم اس کمپنی کی تاریخ سے متعلق زیادہ تفصیل نہیں جانتے اور سچ تو یہ ہے کہ ہم نے اس بارے میں (کسی سے) پوچھا بھی نہیں۔‘‘
یہ تحقیق 600 صفحات پر مشتمل ایک کتاب کی شکل میں شائع ہوئی ہے، جس میں 1911ء سے لے کر 1974ء تک کے عرصے سے متعلق باہلزن کی تاریخ بیان کی گئی ہے۔
اس ریسرچ کے مصنفین کے مطابق اس کتاب کے مواد کے حوالے سے باہلزن کی جانب سے کوئی شرائط عائد نہیں کی گئیں تھیں اور اس کی تصنیف کے دوران مؤرخیں ویرینا باہلزن اور ان کے والد ویرنر باہلزن کے ساتھ رابطے میں بھی رہے۔
م ا ⁄ م م (ڈی پی اے)