دنیا میں صرف چیک جمہوریہ کے لوگ ہی جرمنوں سے زیادہ بیئر پیتے ہیں۔ ایسا نہیں ہے کہ ہر جرمن کو ہی بیئر اچھی لگتی ہے، مگر سماجی طور پر ایسا ہی مشہور ہے۔ اگر ایک بزرگ خاتون دوپہر کے وقت نصف لٹر بیئر پی رہی ہوں تو انہیں شرابی تصور نہیں کیا جائے گا۔ اور بیئر کے ایک جرمن شوقین کے پاس بوتل کھولنے والی چابی کے بغیر بوتل کھولنے کے کئی تخلیقی طریقے موجود ہوتے ہیں۔

کاغذوں کو ایک ساتھ رکھنے والا ’بائنڈر‘ جرمن ایجاد ہے اور یہ اس بات کی بھی دلیل ہے کہ جرمن باشندے ریکارڈ رکھنے کے کس قدر شوقین ہیں۔ یہاں تک کہ کوئی انتہائی غیر منظم شخص بھی کسی سرکاری کام کے لیے ضروری کاغذ فوراﹰ ڈھونڈ لے گا۔ اصل میں جرمنی میں کاغذات کی ضرورت بھی آپ کے خیال سے بڑھ کر ہی پڑتی ہے۔ ڈیجیٹل ریکارڈز کے باوجود جرمن بیوروکریسی حیران کُن طور پر کاغذی ریکارڈ رکھنے کا سلسلہ جاری رکھے ہوئے ہے۔

جرمنی ایک ایسا ملک ہے جہاں کم داموں پر اشیاء فروخت کرنے والے اسٹور اکثر معاشرے کے تمام طبقوں کے لیے سپر مارکیٹ بن جاتے ہیں۔ ایسے لوگ جو ہمیشہ بہترین قیمتوں پر اشیاء ضرورت کی خریداری کی تلاش میں رہتے ہیں، انہیں جرمن زبان میں ’شنَیپشن ژےگر‘‘ یعنی کم قیمتوں کے شکاریوں کا نام دیا جاتا ہے۔ یہ سوچ اس قدر پختہ ہے کہ جرمنی میں ایڈورٹائزنگ کا ایک نعرہ ’گائز اِسٹ گائل‘ یعنی ’بچت سیکسی ہے‘ انتہائی مقبول ہے۔

اگر آپ کسی سیاحتی مقام مثلاﹰ مشرق وُسطیٰ وغیرہ میں ایسے سیاحوں سے ملتے ہیں جو ہائیکنگ کے لیے جدید اشیاء سے لیس ہوں، تو بہت ممکن ہے کہ وہ درمیانی عمر کے جرمن ہی ہوں گے۔ سفر کے شوقین جرمن ہر جگہ آپ کو ملیں گے۔ تاہم ان میں سے زیادہ تر طے شدہ عادات کے حامل ہوں گے۔ جرمنوں کی ایک پسندیدہ سیاحتی منزل اسپین کے کیناری جزائر ہیں۔

جرمنی میں چھوٹے چھوٹے باغوں پر مشتمل کالونیاں بہت معروف ہیں۔ ملک بھر میں 1.4 ملین ’شریبر گارٹن‘ موجود ہیں۔ یہ دراصل ایسی چھوٹی کالونیاں ہوتی ہیں، جن میں لوگ باغبانی کے لیے چھوٹے چھوٹے پلاٹ کرائے پر لے لیتے ہیں۔ یہاں لوگ پھول اور پودے اگا سکتے ہیں، بار بی کیو کر سکتے ہیں اور ایسے باغیچوں کو اپنے ذاتی باغوں کی طرح سجا سکتے ہیں۔ تاہم یہ باغیچے کرائے پر لینے کے قوانین کافی سخت ہیں۔

ایک بالغ شخص کے طور پر آپ یہ خطرہ مول لے سکتے ہیں کہ جب سڑک پر کوئی کار نہ ہو تو آپ ٹریفک کے سُرخ سگنل پر بھی سڑک پار کر لیں۔ لیکن جرمنی میں اگر آپ ایسا کریں تو حیران مت ہوں، جب کوئی چیخ کر آپ کو کہے کہ ’ابھی سگنل سُرخ ہے‘۔ عام طور پر سائیکل سوار، پیدل چلنے والے، کار ڈرائیور اور باقی تمام لوگ بھی اسے اپنی ذمہ داری سمجھتے ہیں کہ وہ کسی بھی سڑک پر موجود دیگر لوگوں کی تربیت کریں۔

جرمن سماجی روایت ’شٹَم ٹِش‘ کا کوئی لغوی ترجمہ اگر ہو سکتا ہے، تو وہ ’گروہی میز‘ ہے۔ شٹَم ٹِش ابتدا میں پب یا کسی کلب میں صارفین کے لیے کسی میز کو مختص کرنے کو کہا جاتا تھا، جہاں وہ بیٹھ کر کارڈ گیمز کھیلتے یا گپ شپ اور بحث و مباحثے کرتے۔ یہ بحث تاہم زیادہ وسیع نہیں ہوتی تھی۔ شٹَم ٹِش اب مختلف گروپوں کی طرف سے باقاعدہ ملاقاتیں منظم کرنے کو بھی کہا جاتا ہے۔

ہر اتوار کی شام قریب 10 ملین جرمن، ٹیلی وژن پر ’ٹاٹ اَورٹ‘ نامی ٹی وی سیریز دیکھتے ہیں۔ ٹاٹ اَورٹ کا جرمن زبان میں مطلب ہے ’جائے وقوعہ‘۔ یہ سیریز 1970ء سے مسلسل جاری ہے۔ علاقائی پبلک براڈکاسٹر باری باری اس سیریز کی مختلف قسطیں تیار کرتے ہیں، لہٰذا مختلف جرائم کی تفتیش کا عمل ہر بار کسی الگ شہر میں دکھایا جاتا ہے۔ کئی پب بھی اس سیریز کو دکھانے کا اہتمام کرتے ہیں۔

’کافے اُنڈ کُوخن‘ یعنی ’کافی اور کیک‘ نامی روایت کے تحت جرمن باشندے ہر سہ پہر کیک کھا سکتے ہیں۔ اب زیادہ تر اختتام ہفتہ پر ہی اس روایت پر عمل کیا جاتا ہے۔ اگر آپ کی سالگرہ ہے، تو پھر آپ سے توقع کی جاتی ہے کہ آپ اپنے کام کی جگہ پر بھی کیک لے کر جائیں۔ بچے کبھی کبھی ناشتے کا آغاز بھی کیک سے ہی کرتے ہیں اور اسکول میں کھانے کے لیے بھی اپنے ساتھ کیک ہی لے جاتے ہیں۔

ایک عرصے تک جرمنی میں ڈائس یا چھکے کو ’شیطانی‘ علامت کے طور پر دیکھا جاتا تھا، تاہم اس کا استعمال قمار بازی وغیرہ میں چلتا رہا۔ اب ڈائس سے وابستہ کھیل جرمنی میں عام ہیں۔

سن 1225 تا 1274 تھوماس اکوئناس نے بطور فلسفی اور مذہبی اسکالر کھیلوں کی اہمیت پر زور دیا۔ ان کا اصرار تھا کہ کھیل دماغی راحت کا باعث بنتے ہیں۔ ان کو یقین تھا کہ کھیل بنیادی انسانی ضرورت ہیں۔ انہوں نے چرچ سے وابستہ افراد کے ساتھ ساتھ خود کو بھی کھیلوں سے جوڑے رکھا۔

فرانسِسکن راہب جان کاپیسترانو نے سن 1386 تا 1456 کھیلوں کو گناہ سے تعبیر کیا۔ انہوں نے عوامی سطح پر کھیلوں کو شدید تنقید کا نشانہ بنایا۔ نیورمبرگ میں 1452 میں تختے کے کھیل، ڈائس اور کارڈ گیمز متعارف کرائی گئیں تاہم کاپیسترانو نے اپنے خطبات میں ان کی سخت مخالفت کی۔

فرانسیسی رنگوں سے مزین حکم، چڑیا، اینٹ اور دل کے نشانات والے تاش کے پتے جرمنی میں استعمال ہونے لگے۔ اس سے قبل جرمن شہری تاش کے پتوں میں اینٹ کی جگہ گھنٹی، حکم کی جگہ پتا اور چڑیا کی بجائے بادام کی علامتیں استعمال کرتے تھے۔

15 ویں صدی میں کارڈز بنانے والوں کا کاروبار خوب عروج پر تھا۔ کارڈز کے ڈیزائن لکڑیوں میں کھود کر بعد میں ان سے چھپائی کا کام لیا جاتا تھا۔ 16 ویں اور 17 ویں صدی میں مخصوص جرمن پتوں کو فرانس تک میں پذیرائی حاصل تھی۔

4 ستمبر 1813 کو پہلی مرتبہ اسکاٹ کھیل کا آغاز ہوا۔ شاف کوپف، الٹنبرگ اور تھیورنگیا کے جرمن علاقوں میں یہ کھیل سب سے پہلے کھیلا جانے لگا۔ تاش کے اس کھیل کو ابتدا میں اسکاٹ الٹنبرگ کا نام دیا گیا۔ اب بھی اسکاٹ کی بین الاقوامی کمیٹی الٹنبرگ ہی میں قائم ہے۔

19 صدی میں جرمنی میں کئی نئے کھیل متعارف کرائے گئے۔ ان میں سے کئی کھیل مختلف ناموں سے آج بھی کھیلے جاتے ہیں۔ کبھی کبھی پہلے سے موجود کھیلوں میں معمولی تبدیلی کر کے انہیں جرمنی میں کھیلا جانے لگا۔ ہندوستان میں کھیلا جانے والا لوڈو ایسا ہی ایک کھیل ہے۔

بورڈ گیمز صرف تفریح کے لیے ہی نہیں ہوتیں بلکہ کھلاڑیوں کی معلومات میں اضافے کا بھی باعث بنتی ہیں۔ اس لیے تاریخ اور سفر کی معلومات سے آراستہ کھیل بھی متعارف کرائے گئے۔ 20 ویں صدی میں جرمن بورڈ گیمز کی برآمد کا سلسلہ شروع ہوا، جو آج بھی جاری ہے۔