جرمن میگزین 'شٹیرن‘ کی جانب سے کرائے گئے ایک عوامی سروے میں 61 فیصد جرمن عوام نے غزہ میں اسرائیلی فوجی آپریشن کی مخالفت کی۔ اس سروے کے مطابق جرمنی میں اسرائیل کے لیے عوامی حمایت میں نمایاں کمی ہوئی ہے۔

اسرائیل کی امداد روکنے کے لیے جرمنی پر قانونی دباؤ

جرمنی غزہ میں مبینہ نسل کشی میں ملوث نہیں، برلن حکومت

سات اکتوبر کے حملے کے بعد 62 فیصد جرمن عوام نے غزہ میں حماس کے خلاف اسرائیلی عسکری مشن کی حمایت کی تھی جب کہ اب یہ شرح فقط 33 فیصد دیکھی گئی ہے۔ غزہ میں گزشتہ قریب آٹھ ماہ سے اسرائیلی عسکری آپریشن جاری ہے، جب کہ جرمنی میں اس آپریشن کے لیے حمایت مسلسل کم ہوتی جا رہی ہے۔

غزہ کی جنگ کا آغاز گزشتہ برس سات اکتوبر کو جنوبی اسرائیلی میں فسلطینی عسکریت پسند تنظیم حماس کے دہشت گردانہ حملے میں تقریباﹰ بارہ سو اسرائیلی شہریوں کی ہلاکت اور قریب ڈھائی سو کے مغوی بنا کر غزہ پٹی لے جائے جانے کے بعد ہوا تھا۔

غزہ پٹی میں حماس کے زیرانتظام کام کرنے والی وزارت صحت کے مطابق اسرائیل کی جانب سے شدید نوعیت کی فضائی اور زمینی عسکری کارروائیوں کے نتیجے میں اب تک وہاں چھتیس ہزار چار سو سے زائد افراد ہلاک ہو چکے ہیں۔

جرمن جریدے 'شٹیرن‘ کے سروے کے لیے تیس اور اکتیس مئی کو ایک ہزار تین افراد کی ٹیلی فون کے ذریعے رائے لی گئی۔

ع ت / م م (ڈی پی اے)