جرمن قومی فٹ بال لیگ کا دسواں میچ ڈے اختتام پذیر
5 نومبر 2012![](https://static.dw.com/image/16355103_800.webp)
اتوار کو جرمن قومی فٹ بال لیگ کے دسویں میچ ڈے کے آخری اور تیسرے روز مجموعی طور پر دو میچ کھیلے گئے۔ پہلے میچ میں لیور کوزن کی ٹیم نے ڈوسلڈورف کو دو کے مقابلے میں تین گول سے شکست دی۔ اپنی اس جیت کے ساتھ ہی لیور کوزن کی ٹیم پوائنٹس ٹیبل پر چوتھے نمبر پر آ گئی ہے جبکہ ڈوسلڈورف کی ٹیم 10 پوائنٹس کے ساتھ پندرہویں نمبر پر چلی گئی ہے۔
دوسرا میچ بریمن اور مائنز کی ٹیموں کے مابین ہوا۔ ان دونوں ٹیموں کے درميان میچ کا آغاز انتہائی جارحانہ انداز میں ہوا۔ گیم کے اختتام تک دونوں ٹیمیں ایک دوسرے کو مات دینے کی سر توڑ کوششیں کرتی رہیں لیکن جیت بریمن کے حصے میں آئی۔ اس میچ میں مائنز کی ٹیم نے صرف ایک گول کیا جبکہ بریمن کی ٹیم دو گول کرنے میں کامیاب رہی۔ پوائنٹس ٹیبل پر ویردر بریمن کی پوزیشن ساتویں جبکہ مائنز کی ٹیم آٹھویں نمبر پر براجمان ہے۔
دسویں میچ ڈے کا دوسرا دن
بنڈس لیگا یعنی جرمن فیڈرل فٹ بال لیگ کے دسویں دن کے دوسرے روز ہفتے کو مجموعی طور پر چھ میچ کھیلے گئے۔ ان میچوں میں ہوفن ہائم کی ٹیم نے شالکے کو دو کے مقابلے میں تین گول سے شکست دی جبکہ ڈورٹمنڈ کی ٹیم اشٹٹ گارٹ سے اپنا میچ برابر کر بیٹھی۔ اسی طرح تیسرے میچ میں میونخ نے ہیمبرگ کو مات دے کر اپنے پہلے نمبر کی پوزیشن کو مزید مستحکم بنایا۔
ہفتے کے دن کھیلے گئے دیگر میچوں میں فرائی برگ اور مؤنشن گلاڈ باخ کا میچ ایک ایک گول سے برابر رہا جبکہ نیورنمبرگ نے وولف برگ کو ایک صفر سے مات دی۔ بنڈس لیگا کے دسویں میچ ڈے کے دوسرے روز ہینوور نے آوگسبرگ کو دو صفرسے ہرایا۔
دسویں میچ ڈے کا پہلا دن
جمعے کے روز بنڈس لیگا کے رواں سیزن کے دسویں میچ ڈے کے آغاز پر صرف ایک میچ کھیلا گیا۔ یہ کھیل آئنٹراخٹ فرینکفرٹ (Eintracht Frankfurt) اور گروئتھرفیُورتھ (Greuther Fuerth) کے درمیان ایک ایک گول سے برابر رہا۔
بنڈس لیگا کا پہلا حصہ وسط دسمبر میں مکمل ہو گا۔ اس لحاظ سے پہلے مرحلے ميں سات میچ ڈیز رہ گئے ہیں۔ پہلے مرحلے کی ٹاپ ٹیم کو موسم خزاں کی چیمپئن قرار دیا جاتا ہے۔ ابھی تک بائرن میونخ کی ٹیم گولڈن جوبلی سیزن کو جیتنے کی جانب گامزن ہے۔
بائرن میونخ کے اس وقت ستائیس پوائنٹس ہو چکے ہیں جبکہ دوسرے نمبر کی ٹیم شالکے اور تیسرے نمبر پر براجمان فرینکفرٹ کی ٹیم کے پوائنٹس بیس بیس ہیں۔
ia / as (DW)