جنوبی جرمن صوبے باویریا کے دارالحکومت میونخ سے اتوار سات اپریل کو ملنے والی رپورٹوں کے مطابق روس میں صدر پوٹن کے ناقد اور باہمت اپوزیشن رہنما سمجھے جانے والے آلیکسی ناوالنی اور ان کی بیوہ جولیا ناوالنایا کو یہ اعزاز اس لیے دیا جائے گا کہ انہوں نے روس میں جمہوریت اور جمہوری حقوق کے لیے گراں قدر خدمات انجام دیں۔

روسی صدر پوٹن کے ناقد الیکسی ناوالنی کی تدفین

ناوالنایا 19 اپریل کو میونخ کے ایک نواحی شہر میں منعقد ہونے والی سالانہ تقریب میں یہ فریڈم پرائز ذاتی طور پر وصول کریں گی۔

یہ اعزاز ہر سال منعقد ہونے والی ایک ایسی تقریب میں دیا جاتا ہے، جو 'لُڈوِگ ایرہارڈ سمٹ‘ کہلاتی ہے۔ لُڈوِگ ایرہارڈ ایک ایسے قدامت پسند جرمن سیاستدان تھے، جو 1960 کی دہائی میں وفاقی جرمن چانسلر کے منصب پر فائز رہے تھے۔

سخاروف پرائز، روسی صدر کے ناقد ناوالنی کے نام

جرمن میڈیا کے فریڈم پرائز کی اہمیت

جمہوریت کے لیے نمایاں خدمات انجام دینے والی عوامی سطح کی کسی بھی ملکی یا غیر ملکی شخصیت کو یہ جرمن اعزاز اظہار رائے کی آزادی، مکالمت اور جمہوریت کے لیے مسلسل کوششوں کے اعتراف میں دیا جاتا ہے۔ اسی لیے عرف عام میں اس منفرد اعزاز کو 'جرمن ڈیموکریسی پرائز‘ بھی کہا جاتا ہے۔

یورپی یونین: ناوالنی کی موت پر روس کے خلاف نئی پابندیاں زیر غور

گزشتہ برس یہ انعام روس ہی کے ایک سیاستدان اور شطرنج کے سابق عالمی چیمپئن گیری کاسپاروف کو دیا گیا تھا۔ اس کے علاوہ ماضی میں یہ فریڈم پرائز یوکرینی صدر وولودیمیر زیلنسکی اور سابق سوویت یونین کے صدر رہنے والے آنجہانی میخائل گورباچوف کو بھی دیا جا چکا ہے۔

ناوالنی کو بعد از مرگ اور ناوالنایا کو ان کی زندگی میں مشترکہ طور پر جرمنی کا یہ پرائز جس تقریب میں دیا جائے گا، اس میں ان دونوں کی خدمات کا اعتراف کرتے ہوئے مرکزی خطاب جرمنی کی قدامت پسند اپوزیشن کے رہنما فریڈرش مَیرس کریں گے۔

روس میں ناوالنی کا سوگ منانے والے 400 سے زائد افراد گرفتار

پرائز کی جیوری کا موقف

اس پرائز کی جیوری نے رواں سال کے لیے یہ اعزاز ناوالنی اور ان کی بیوہ کو دینے کا اعلان کرتے ہوئے ایک بیان میں کہا، ''جولیا ناوالنایا روس میں جمہوری مزاحمت کی ایک بہادر رہنما ہیں۔ اس سال 16 فروری کو سائبیریا کی ایک جیل میں روسی صدر ولادیمیر پوٹن کے کارندوں کے ہاتھوں اپنے شوہر آلیکسی ناوالنی کی ہلاکت کے بعد ناوالنایا ہی روس میں جمہوری بیداری کے عمل کی قیادت کر رہی ہیں۔‘‘

روسی اپوزیشن لیڈر ناوالنی کی ناگہانی موت پر عالمی تشویش

آلیکسی ناوالنی اور ان کی اہلیہ جولیا ناوالنایا روس میں کئی برسوں تک جمہوری حقوق کے لیے جدوجہد کرنے والے نمایاں ترین اپوزیشن سیاسی کارکن تھے۔

جرمن میڈیا کے فریڈم پرائز کی جیوری نے اپنے بیان میں مزید کہا، ''یہی وہ چہرے ہیں، جو نئے، بہتر، آزاد اور جمہوری روس کی پہچان ہیں۔‘‘

م م / ع آ (ڈی پی اے)