کینوس پر بکھرے گہرے رنگوں میں ڈوبی پھول پتیاں اور موسم کی منظر کشی ٹرک آرٹ کا خاصہ رہا ہے۔ مغربی ممالک میں اس طرح کی پینٹنگز کو کافی مقبولیت حاصل ہو رہی ہے۔

برلن میں واقع پاکستان ہاؤس میں منعقدہ نمائش میں رکھے گئے فن پاروں میں عام ڈیزائنوں کے ساتھ ساتھ جرمنی کی مشہور عمارتوں اور مقامات کی بھی منظر کشی کی گئی ہے۔

‍‍‍زیر نظر پینٹنگ میں جرمنی کے دارلحکومت میں قائم مشہور تاریخی برانڈن برگ گیٹ کی منظر کشی کی گئی ہے۔

اس نمائش میں مختلف فن پاروں کو نمائش میں آنے والوں کی نظر کرنے کے لیے ایک ایسے ماحول میں سجایا گیا تھا جہاں قدرتی سبزے اور ہرے بھر درختوں کی موجودگی میں یہ اور بھی جا‌زب نظر لگ رہے تھے۔

ٹرک آرٹ کا نام ہی اس بات کی علامت ہے کہ یہ بنیادی طور پر پاکستان میں مال برداری کے لیے استعمال ہونے والے ٹرکوں کی تزئین و آرائش سے شروع ہوا تھا لیکن اب یہ دنیا کے مختلف ممالک میں گھریلو استعمال کی اشیا سے لے کر نجی گاڑیوں اور سائیکلوں پر بھی نظر آتا ہے۔

پاکستانی سفارت کار اور سفارت خانے دنیا کے مختلف ممالک میں ایسی نمائشوں کا انعقاد کراتے رہتے ہیں جہاں پر صرف ٹرک آرٹ سے مزین اشیا کو شائقین کے لیے پیش کیا جاتا ہے۔ اس آرٹ کی بیرون ملک مقبولیت میں نے اس کی پاکستان میں دم توڑتی صنعت میں ایک نئی روح پھونک دی ہے اور اب نئے لوگ بھی اس آرٹ کو سیکھنے میں دلچسپی لے رہے ہیں۔

گھریلو اور دفتری استعمال کی اشیا پر گہرے رنگوں پر مشتمل ٹرک آرٹ ایک جداگانہ تاثر چھوڑتا ہے جو دیکھنے والوں کو اپنی طرف کھینچ لیتا ہے۔ اس فن کی خاص بات یہ ہے کہ آپ اسے کھانے پینے کے برتنوں سے لیکر کپڑوں جوتوں کے علاوہ گھر کے دروازوں، الماریوں اور دیواروں کو بھی سجا سکتے ہیں۔

اس طرح کی نمائشوں سے ناصرف بیرون ملک پاکستان کا ایک سافٹ امیج ابھرنے میں مدد مل رہی ہے بلکہ یہ پاکستانی ٹرک آرٹ کے فنکاروں کو کام کے زیادہ مواقع مہیا کر رہا ہے جو ان کی حوصلہ افزائی کا سبب بنتا ہے۔

پاکستانی سفارتکاروں کے مطابق ٹرک آرٹ بیرون ملک پاکستان کی ثقافت کا ایک بڑا سفیر بن چکا ہے۔ برلن میں پاکستانی سفیر ڈاکٹر فیصل کا کہنا تھا کہ ٹرک آرٹ کو جدید طرز پر متعارف کروانے سے دنیا پاکستان کے اصل رنگوں کو بہتر طور پر جان پاۓ گی۔

جرمن دارالحکومت برلن میں قائم یہ ٹی وی ٹاور اس کی اہم ترین نشانیوں میں سے ایک ہے۔ کراچی سے آنے والی پھول پتی ٹیم کے ٹرک آرٹسٹوں نے جرمنی کے قومی نشان عقاب کو بھی خوبصورتی سے ایک فن پارے کا حصہ بنایا ہے۔

پاکستانی سفارت خانے کے مطابق اس نمائش کا مقصد پاکستانی ٹرک آرٹسٹوں کی فنکارانہ صلاحیتیوں کو بین الاقوامی شائقین کے سامنے پیش کرنے کی ایک کاوش ہے۔ تاکہ ان پر واضح ہو سکے کہ ٹرک آرٹ کے روایتی نمونے ہمارے ارد گرد موجود روز مرہ کی اشیاء کو منفرد اور خوبصورت بنا سکتے ہیں۔