جرمن کارکنوں نے گزشتہ برس 1.3 بلین گھنٹے اوور ٹائم کیا
10 مئی 2024![2023ء میں جرمنی میں ہر کارکن نے اوسطاﹰ 31.6 گھنٹے اوور ٹائم کیا](https://static.dw.com/image/65921178_800.webp)
جرمن دارالحکومت برلن سے موصولہ رپورٹوں کے مطابق یہ اعداد و شمار وفاقی حکومت کی طرف سے مہیا کردہ تازہ ترین ڈیٹا سے پتہ چلے۔
جرمنی میں گھر سے کام کا طریقہ رائج ہی رہے گا، نیا جائزہ
جرمن پارلیمان کے ایوان زیریں بنڈس ٹاگ میں اس بارے میں ایک سوال بائیں بازو کی سیاسی جماعت ڈی لِنکے کی ایک رکن سوزانے فیرشل کی طرف سے پوچھا گیا تھا۔ اس کے جواب میں وفاقی وزارت محنت نے اپنے تحریری جواب میں بتایا کہ 2023ء میں جرمنی میں ہر کارکن نے اوسطاﹰ 31.6 گھنٹے اوور ٹائم کیا۔
ان اضافی اوقات کار میں سے فی کس سالانہ بنیادوں پر 18.4 گھنٹے اوور ٹائم ایسا تھا، جس کا متعلقہ کارکن کو کوئی اوور ٹائم الاؤنس نہیں ملا تھا۔
جرمنی میں تین روزہ ہڑتال کے بعد ریلوے نظام دوبارہ معمول پر
آجرین کے اربوں یورو بچ گئے
وفاقی وزارت محنت کی طرف سے جواب ملنے کے بعد ڈی لِنکے نامی لیفٹ پارٹی کی رکن پارلیمان فیرشل نے کہا، ''گزشتہ برس جرمنی میں آجرین نے بغیر کسی اضافی معاوضے کے کیے جانے والے اس اوور ٹائم کی وجہ سے کارکنوں کی اجرتوں کی مد میں اربوں یورو بچائے۔ مگر کارکنوں کو مقررہ سے زیادہ اوقات کار کے منفی نتائج کا سامنا بھی کرنا پڑا اور ساتھ ہی ان سے یہ مسلسل مطالبات بھی کیے جاتے رہے کہ وہ اپنے کام کے اوقات کے حوالے سے زیادہ لچک دار رویوں کا مظاہرہ کریں۔‘‘
جرمنی میں ہنر مند افراد کی امیگریشن کے قوانین پر عملدرآمد شروع
وزارت محنت کے جواب میں اسی سال فروری میں سامنے آنے والے اس ڈیٹا کا حوالہ بھی دیا گیا ہے، جو انسٹیٹیوٹ برائے ایمپلائمنٹ ریسرچ (آئی اے بی) نے تیار کیا تھا۔ یہ ڈیٹا سب سے پہلے جرمن روزنامے 'رائنیشے پوسٹ‘ نے شائع کیا تھا۔
ڈیٹا سے مزید کیا پتہ چلا؟
وفاقی جرمن پارلیمان کو مہیا کردہ اس سرکاری ڈیٹا سے مزید کئی حقائق بھی واضح ہو گئے۔ مثلاﹰ پچھلے برس جرمن کارکنوں نے بامعاوضہ یا بلامعاوضہ جتنا بھی اوور ٹائم کیا، اس کی مجموعی طوالت سال بھر کے دوران آٹھ لاکھ پینتیس ہزار کل وقتی ملازمتوں کے برابر بنتی ہے۔
جرمنی میں پینشن کے لیے سڑسٹھ برس کی عمر بھی ناکافی ہو گی، صوبائی وزیر خزانہ
مزید یہ کہ 2023ء میں جرمن کارکنوں نے ملک گیر سطح پر جتنا بھی اوور ٹائم کیا، اس کا دورانیہ 2022ء میں کیے جانے والے اوور ٹائم سے تقریباﹰ 100 ملین گھنٹے کم تھا۔
2022ء میں جرمن کارکنوں نے جتنا اوور ٹائم کیا تھا، اس کا مجموعہ 1.4 بلین گھنٹے بنتا تھا۔
م م / ک م (ڈی پی اے)