’مزید سبسڈی کے لیے پیسے نہیں ہیں‘، جرمن وزیر خزانہ
15 جنوری 2024
برلن میں کسانوں کے بہت بڑے مظاہرے کے سبب کاروبار زندگی بُری طرح مفلوج ہو کر رہ گیا۔ شہر کی مرکزی شاہراہ پر قریب دس ہزار کسان ٹرکوں اور ٹریکٹروں سمیت سراپا احتجاج بنے ہوئے ہیں۔ قریب ایک ہفتے سے کسان مظاہرے کر رہے ہیں۔
تصویر: Sean Gallup/Getty Images
اشتہار
جرمن کسانوں کی طرف سے ٹیکسوں میں کمی اور سبسڈی میں اضافے کا مطالبہ زور پکڑتے پکڑتے برلن کے قلب میں عام زندگی کو مفلوج کر دینے والے غیر معمولی احتجاجی مظاہروں کا سبب بن گیا۔ برلن کے مشہور زمانہ تاریخی مقام برانڈنبرگ گیٹ پر دس ہزار کا مجمع اور کسانوں کے ٹریکٹر اور ٹرکوں نے ایک بحران پیدا کر دیا ہے۔ دریں اثناء جرمن وزیر خزانہ نے سخت سردی میں برانڈنبرگ گیٹ کے سامنے بننے ہوئے اسٹیج پر چڑھ کر کسانوں سے خطاب کیا۔ اس موقع پر ان کا کہنا تھا، ''میں آپ کو وفاق سے مزید ریاستی امداد کا وعدہ نہیں کر سکتا لیکن ہم آپ سب مل کر آپ سب کے لیے لڑ سکتے ہیں تاکہ آپ کو اپنے کاموں کے لیے زیادہ آزادی اور احترام سے لطف اندوز ہونے کا موقع میسر ہو۔‘‘
اشتہار
حکومتی اتحاد پر دباؤ
جرمنی میں کسانوں کی طرف سے جاری احتجاج اور بڑے مظاہروں کے ذریعے جرمن چانسلر اولاف شولس کے حکومتی اتحاد پر بھی دباؤ بڑھ رہا ہے۔ حکومتی اتحاد بجٹ کے نقائص دور کرنے اور دائیں بازو کے گروہوں کو تسلی دلانے کی کوشش کر رہا ہے۔
کھیتوں میں کاشت کاری کرتے ایگریکلچرل روبوٹ
02:13
This browser does not support the video element.
حکومت کی طرف سے زرعی ڈیزل پر ٹیکس کا وقفہ ختم کرنے کے اعلان کے بعد سے کسانوں کی طرف سے احتجاج میں شدت آگئی ہے۔ وفاقی حکومت کو 2024ء کے بجٹ کا توازن برقرار رکھنے کے لیے آئینی عدالت کے اس فیصلے کے تحت اپنے اخراجات کے منصوبوں پر نظر ثانی کرنا پڑا جو گزشتہ نومبر میں آئینی عدالت کے فیصلے کی شکل میں سامنے آیا تھا۔
برلن میں برانڈنبرگ گیٹ کے سامنے کسانوں کا احتجاجتصویر: Nadja Wohlleben/REUTERS
حکومت پہلے ہی کہہ چُکی ہے کہ وہ نئی زرعی گاڑیوں پر ٹیکس برقرار رکھے گی جبکہ زرعی ڈیزل سبسڈی کا خاتمہ آئندہ کئی سالوں پر محیط منصوبے کے تحت ہوگا۔
لیکن اپوزیشن کی حمایت کے ساتھ قدامت پسندوں اور انتہائی دائیں بازو کی حمایت حاصل کرنے والے کسانوں کا کہنا ہے کہ یہ کافی نہیں ہے۔ کسانوں کی یونین کے سربراہ یوآخم رُکویڈ نے کہا، ''میں ہر اس سیاست دان کا احترام کرتا ہوں، جو ہمارے پاس آنے کے لیے تیار ہے۔‘‘
کسانوں کی یونین کے سربراہ نے جرمن وزیر خزانہ کے خطاب کے دوران کسانوں کی طرف سے بہت زیادہ شور اور خلل کو روکنے کے لیے وزیر خزانہ سے مائیکرو فون لے کر کسانوں سے خاموش رہنے اور وزیر خزانہ کی تقریر سننے کا مطالبہ کرتے ہوئے کہا، ''وزیر خزانہ یہاں موجود ہیں اور انہیں یہاں سے بھگانے کا کوئی فائدہ نہیں۔‘‘
جرمن وزیر خزان اور کسانوں کی یونین کے سربراہ تصویر: Monika Skolimowska/dpa/picture alliance
حکومتی حلقے میں تقسیم
حکمران جماعتیں اس بات پر منقسم ہیں کہ کسانوں کے مطالبات کس طرح بہترین طریقے سے پورے کیے جائیں۔ گرین پارٹی سے تعلق رکھنے والے وزیر زراعت چم اُزدیمیر نے نرم دلی اور انسانیت کے تقاضے پورے کرتے ہوئے مویشی پالنے کے لیے مالی اعانت اور انعامات کی تجویز پیش کی جبکہ کچھ سوشل ڈیموکریٹس زیادہ پیداوار کی قیمتیں پیش کرنا چاہتے ہیں، اور وزیر مالیات لنڈنر کی فری ڈیموکریٹک پارٹی کے سیاستدان 'ایڈمنسٹریٹیو اوور ہیڈز‘ کو کم کرنا چاہتے ہیں۔ برلن میں کسانوں کے احتجاجی مظاہرے کے سبب کئی بسوں اور ٹرام لائنوں کو بند کر دیا گیا جبکہ مظاہرے کے دوران لاء اینڈ آرڈر برقرار رکھنے کے لیے تقریباً 1,300 پولیس اہلکار تعینات کیے گئے۔
جرمن زرعی شعبے کو درپیش مشکلات
جرمن کسان ملکی منڈی میں اپنی مصنوعات کی کم قیمت کی وجہ سے مسائل کا شکار ہیں۔ ان کسانوں کو ماحول اور جانوروں کے تحفظ کے لیے کام کرنے والی تنظیموں کی تنقید بھی سننا پڑتی ہے۔ جرمنی میں زرعی شعبے میں اصلاحات کی اشد ضرورت ہے۔
تصویر: picture-alliance/dpa/P. Schulze
دودھ کی وافر پیداوار لیکن خریدار کم
یورپی یونین کی جانب سے دودھ کا کوٹہ ختم کیے جانے کے بعد سے دودھ کا کاروبار کرنے والی کمپنیوں کے مابین ایک مقابلہ جاری ہے۔ گوالے نئی منڈیوں تک رسائی کی امید لگائے ہوئے ہیں۔ روس کے خلاف عائد پابندیاں اور چینی معیشت میں سست روی ان کے خواب پورا نہیں ہونے دے رہے۔ آج کل دودھ اور اس سے تیار کردہ مصنوعات کی رسد ان کی طلب سے زیادہ ہے۔ ااس صورتحال میں یورپی یونین کو گوالوں کی مالی مدد کرنا پڑ رہی ہے۔
تصویر: picture-alliance/dpa/J. Büttner
وجود کو خطرہ
جرمنی میں کسانوں کی تنظیم ’ ڈی بی وی‘ کے صدر یوآخم رکوائڈ کے مطابق زرعی شعبے کا ایک بڑا حصہ اپنی بقا کے خطرے سے دوچار ہے۔ وہ کہتے ہیں 2003ء سے 2013ء کے دوران جرمنی میں مختلف فارموں یا کھیتوں میں 32 فیصد تک کی کمی ہوئی ہے۔ ان کے مطابق، ’’خاص طور پر چھوٹے پیمانے پر کھیتی باڑی کرنے والے کسان اقتصادی مسائل کا شکار ہیں۔‘‘
تصویر: picture-alliance/dpa/U. Zucchi
ایک اہم آجر
جرمنی میں زرعی شعبے سے کوئی چھ لاکھ افراد منسلک ہیں۔ کسانوں کی تنظیم ’ڈی بی وی‘ کے مطابق یہ جرمنی کا ایک بہت اہم آجر شعبہ ہے۔ اس سلسلے میں رواں برس ہینوور میں ہونے والے کسانوں کے ملکی کنوینشن کا موٹو ہے، ’’مضبوط زراعت، اچھے مستقبل کی ضمانت۔‘‘
تصویر: picture-alliance/dpa/J. Büttner
تصورات اور خیالات
سر سبز مرغزار، ان میں گھومتے ہوئے صحت مند مویشی اور دلکش کھیت۔ کسی بھی شخص سے اگر کھیتی باڑی کی بات کی جائے تو اس کے ذہن میں کچھ ایسی ہی تصویر بنتی ہے۔ 2013ء میں کرائے گئے ایک جائزے کے مطابق 80 فیصد جرمن شہری ملکی زراعت کو جرمنی اور جرمن روایات کا لازمی حصہ سمجھتے ہیں۔
زرعی شعبے میں کئی حقائق عمومی تصورات سے مختلف ہیں۔ مثلاﹰ آج کل زرعی شعبے میں بھی صنعتی پیمانے پر مصنوعات کی پیداوار دیکھنے میں آتی ہے۔ اس کے علاوہ کیڑے مار ادویات کے بے پناہ استعمال کی وجہ سےبھی عام کسانوں کی پیداواری مصنوعات کی مانگ کم ہو رہی ہے۔
تصویر: Reuters
کھیتی باڑی ماحول کے لیے نقصان دہ بھی
تحفظ ماحول کی تنظیموں کے مطابق کھیتی باڑی بھی ضرر رساں گیسوں کے اخراج کا سبب بنتی ہے۔ زمین کو نرم کرنے کے لیے استعمال کیے جانے والے کیمیکل سے’لافنگ گیس‘ پیدا ہوتی ہے اور یہ کاربن ڈائی آکسائیڈ سے بھی 300 گنا زیادہ نقصان دہ ہے۔ اس کے علاوہ جرمنی میں 43 لاکھ دودھ دینے والی گائیں میتھین گیس خارج کرتی ہیں۔ 2014ء میں جرمنی میں ضرر رساں گیسوں کے اخراج کی دوسری سب سے بڑی وجہ ملکی زرعی شعبہ تھا۔
تصویر: picture alliance/F. May
گوشت کی مانگ میں اضافہ
جرمنی کو یورپ کا مذبحہ خانہ کہا جا سکتا ہے۔ جرمنی میں 2015ء کے ابتدائی چھ ماہ کے دوران 30 ملین سؤر، 1.7 ملین گائیں اور 325 ملین مرغیاں گوشت کے لیے استعمال کی گئیں۔ اس کے علاوہ بھی لوگ چھپ کر جانوروں کو ذبح کرتے ہیں۔ پھر اس خدشے کے پیش نظر کہ جانور کہیں ایک دوسرے کو زخمی نہ کر دیں، خنزیروں اور گائیوں کی دمیں کاٹ دی جاتی ہیں جبکہ مرغیوں کے چوزوں کی چونچیں بھی آگے سے تراش دی جاتی ہیں۔
تصویر: Getty Images
یورپی یونین کی جانب سے اعانت
ابھی کچھ سال پہلے تک یورپی یونین کی جانب سے زرعی شعبے کے کارکنوں اور اداروں کو دی جانے والی مالی اعانتیں بےضبط انداز میں تقسیم کی جاتی تھیں۔ مثال کے طور پر جتنا بڑا کھیت یا فارم ہو گا،اتنی ہی زیادہ رقم ملے گی۔ اس پالیسی کی وجہ سے چھوٹے کاشتکار مسابقت کی دوڑ میں پیچھے رہ گئے۔
تصویر: picture-alliance/dpa/P. Pleul
پالیسی میں تبدیلی
2014ء میں یورپی یونین نے اپنی زرعی پالیسی میں اصلاحات متعارف کرائیں۔ اب مالی اعانت کے حق دار صرف ماحول دوست کاشتکار قرار پاتے ہیں۔ اس طرح عام کسانوں نے کھیتی باڑی کے دوران کیمیائی مادوں کا استعمال کم کر دیا ہے اور مویشیوں کی دیکھ بھال کا طریقہ کار بھی تبدیل کر دیا گیا ہے۔
تصویر: picture-alliance/dpa/S. Gollnow
بائیو مصنوعات کی بڑھتی ہوئی مانگ
جرمنی میں گزشتہ دہائی کے دوران بائیو یا تحفظ ماحول کا خیال رکھتے ہوئے کی جانے والی کاشتکاری میں نمایاں اضافہ ہوا ہے۔ ایک اندازے کے مطابق بائیو فارمز کی تعداد ان دس سالوں میں پہلے کے مقابلے میں ایک تہائی بڑھی ہے۔ جرمنی میں کل زرعی رقبے کا چھ فیصد حصہ بائیو فارمنگ کے لیے استعمال کیا جا رہا ہے جبکہ آسٹریا میں یہ شرح بیس فیصد ہے۔