جرمن کپ: بائرن میونخ فتح مند
2 جون 2013![](https://static.dw.com/image/16853729_800.webp)
ہفتے کی شام دارالحکومت برلن کے اولمپک اسٹیڈیم میں کھیلے گئے جرمن کپ کے فائنل میں بائرن میونخ کا مقابلہ اشٹٹ گارٹ کے ساتھ تھا۔ اس میچ میں بائرن میونخ کو دو کے مقابلے میں تین گول سے کامیابی حاصل ہوئی۔
جرمن کپ کو جیت کر بائرن میونخ نے اپنی کامیابیوں کی ہیٹ ٹرک کو باوقار انداز میں مکمل کیا۔ اس ماہ کے آخر میں سبکدوش ہونے والے کوچ ژُوپ ہینیکس (Jupp Heynckes) کی قیادت میں بائرن میونخ کی ٹیم نے پہلے بنڈس لیگا کی چیمپئن شپ جیتی اور اس کے بعد اس نے لندن میں چیمپئنز لیگ کا فائنل ڈورٹمنڈ کو ہرایا اور اب جرمن کپ کے فائنل میں اشٹٹ گارٹ کو مات دے کر ایک اور اعزاز حاصل کر لیا۔
جرمن کپ کے فائنل میں بائرن کی جانب سے دو گول ماریو گومیز نے کیے۔ میچ کا پہلا گول تھوماس مُولر نے پہلے ہاف کے سینتیسویں منٹ میں کیا۔ یہ گول پینلٹی کِک کے ذریعے کیا گیا۔ پہلا ہاف ختم ہونے سے تین منٹ قبل ماریو گومیز نے دوسرا گول کر کے اپنی ٹیم کی سبقت کو مُستحکم کر دیا۔ یہ امر اہم ہے کہ کچھ عرصہ قبل تک ماریو گومیز اشٹٹ گارٹ کی جانب سے کھیلا کرتے تھے۔ اسی برتری یعنی بائرن میونخ کے دو گول پر پہلا ہاف ختم ہوا۔
دوسرے ہاف کے شروع ہونے کے سولہ منٹ بعد ماریو گومیز نے فائنل میچ میں اپنی ٹیم کا تیسرا اور اپنا دوسرا گول کر کے میونخ کی جیت کو یقینی بنا دیا۔ اشٹٹ گارٹ نے بھی حملوں کا سلسلہ جاری رکھا۔ آسٹریا سے تعلق رکھنے والے مارٹِن ہارنِک (Martin Harnik) نے دوسرے ہاف کے چھبیسویں منٹ میں پہلا گول کر کے بائرن میونخ کی تین گول کی سبقت میں کمی پیدا کر دی۔
میچ جوں جوں اپنے اختتام کی جانب بڑھ رہا تھا توں توں بائرن میونخ کے کھلاڑیوں نے دفاعی کھیل پیش کرنا شروع کر دیا۔ ایسا دکھائی دیتا تھا کہ وہ مزید گول کرنے کے بجائے اب میچ کو جیتنے کی کوشش میں تھے۔ ایسے میں ایک مرتبہ پھر مارٹِن ہارنِک نے چیمپئن ٹیم کے دفاع کو توڑتے ہوئے اپنی ٹیم کے لیے دوسرا گول کر دیا۔ یہ گول میچ ختم ہونے سے دس منٹ قبل ہوا۔ بائرن میونخ نے اگلے دس منٹوں میں اشٹٹ گارٹ کو گول کرنے کا کوئی موقع نہیں دیا اور میچ جیت لیا۔
بنڈس لیگا، چیمپئنز لیگ اور جرمن کپ کو جیتنے والا بائرن میونخ پہلا جرمن فٹ بال کلب بن گیا ہے۔ اس سے قبل کیلنڈر ایئر میں ایسا سات مرتبہ ہو چکا ہے۔ بائرن میونخ سے قبل اسکاٹ لینڈ کے فٹ بال کلب کیلٹک (Celtic) نے سن 1967 میں، ہالینڈ کے کلب اجاکس (Ajax) نے سن 1972میں، ولندیزی فٹ بال کلب اینڈ ہوفن (Eindhoven) نے سن 1988 میں، برطانیہ کے مشہور کلب مانچیسٹر یونائٹِڈ نے سن 1999 میں، ہسپانوی فٹ بال کلب بارسلونا نے سن 2009 میں اور اطالوی کلب انٹرمیلان نے سن 2010 میں اپنے ممالک کے دو اہم ٹورنامنٹوں میں کامیابی کے ساتھ ہی چیمپئنز لیگ جیت کر ایسا ہی کارنامہ سرانجام دیا تھا۔
جرمنی کے تاریخ ساز فٹ بال کلب بائرن میونخ نے سولہویں مرتبہ جرمن کپ کو جیتا ہے۔ اسی طرح اسی کلب نے بنڈس لیگا کو 23 مرتبہ جیتنے کا بھی اعزاز حاصل کر رکھا ہے۔
(ah/ab(AP