جنوبی کوریا کے منیجرز سب سے پہلے اس صنعتی زون میں قائم فیکٹریوں کا معائنہ کریں گے اور اس بات کا تعین کریں گے کہ ان میں کتنی جلدی کام بحال ہو سکتا ہے۔

خبر رساں ادارے ڈی پی اے کے مطابق یونہاپ نیوز ایجنسی نے قبل ازیں جنوبی کوریا کی یونیفیکیشن منسٹری کے حوالے سے بتایا کہ کیسونگ صنعتی زون میں قائم 123میں سے نصف سے زائد کمپنیوں نے آزمائشی طور پر کام شروع کرنے کے منصوبے کا عندیہ دیا ہے۔

سیئول اور پیونگ یانگ حکومت کے درمیان اس انڈسٹریل زون کی بحالی پر اتفاق گزشتہ ہفتے منگل کو ہوا تھا۔ اس صنعتی زون تک آسان رسائی دینا بحالی کے معاہدے کا حصہ ہے۔

شمالی کوریا نے سیول کا یہ مطالبہ بھی منظور کیا ہے کہ کیسونگ میں غیرملکی سرمایہ کاری کی حوصلہ افزائی کے لیے کوششیں کی جائیں گی۔ خبر رساں ادارے اے ایف پی کے مطابق سیئول حکومت سمجھتی ہے کہ کیسونگ میں بیرونی مفادات شامل ہونے سے آئندہ کشیدہ حالات کے دوران شمالی کوریا کے لیے اسے بند کرنا مشکل ہوگا۔

اس صنعتی زون کے لیے جنوبی کوریا کے شریک چیئرمین کِم کی وونگ کے مطابق مستقبل میں ہونے والی بات چیت میں اس بات کو یقینی بنایا جائے گا کہ کیسونگ بین الاقوامی سطح پر مسابقتی بن جائے۔

ان کا کہنا ہے: ’’یہ مقصد حاصل کرنے کے لیے فیکٹری پارک کھُلنے کے باوجود ابھی کچھ حل طلب مسائل باقی ہیں۔‘‘

کیسونگ صنعتی زون دونوں ملکوں کے درمیان کشیدگی کے باعث پانچ ماہ قبل بند کر دیا گیا تھا۔ شمالی کوریا نے اس زون سے اپنے 53 ہزار ورکرز نکال لیے تھے اور جنوبی کوریا کو بارہا جوہری حملے کی دھمکی دی تھی۔

دونوں ملکوں نے انڈسٹریل زون کی بندش کا الزام ایک دوسرے پر عائد کیا تھا۔ پیونگ یانگ حکام کا کہنا تھا کہ امریکا کے ساتھ مشترکہ فوجی مشقوں سمیت جنوبی کوریا کی ’جارحانہ سرگرمیوں‘ نے انہیں اس فیصلے پر مجبور کیا۔

یہ صنعتی زون دونوں ملکوں کی سرحد سے دس کلومیٹر شمالی کوریا کے اندر واقع ہے۔ کشیدگی کے بادل چھٹنے پر دونوں ملکوں نے گزشتہ ماہ کیسونگ کی بحالی کے لیے مل کر کام کرنے پر اتفاق کیا تھا۔ یہ صنعتی پارک 2004ء میں اس وقت قائم کیا گیا جب دونوں ملکوں کے درمیان تعلقات بہتر ہو رہے تھے۔