انگیلا میرکل ہیلموٹ کوہل کے بعد پہلی مرتبہ کرسچن ڈیموکریٹک یونین کی نگران سربراہ بنی تھیں۔ انہیں اس سیاسی پارٹی کی قیادت کو اب تقریبا سترہ برس ہو چکے ہیں جبکہ انہوں نے سن دو ہزار پانچ میں پہلی مرتبہ جرمن چانسلر کا عہدہ سنبھالا تھا۔

’میں جرمنی کی خدمت کرنا چاہتی ہوں‘، بائیس نومبر 2005 کو انگیلا میرکل نے یہ کہتے ہوئے پہلی مرتبہ چانسلر شپ کی ذمہ داریاں سنبھالی تھیں۔ انہیں جرمنی کی پہلی خاتون چانسلر بننے کا اعزاز تو حاصل ہوا ہی تھا لیکن ساتھ ہی وہ اس عہدے پر فائز ہونے والی ایسی پہلی شخصیت بھی بنیں، جس کا تعلق سابقہ مشرقی جرمنی سے تھا۔

میرکل نے بطور چانسلر اپنے دور کا آغاز انتہائی عجزوانکساری سے کیا تاہم جلد ہی انہوں نے اپنی قائدانہ صلاحیتوں کو لوہا منوا لیا۔ 2007ء میں میرکل نے دلائی لامہ سے ملاقات کی، جس سے بیجنگ حکومت ناخوش ہوئی اور ساتھ ہی جرمن اور چینی تعلقات میں بھی سرد مہری پیدا ہوئی۔ تاہم میرکل انسانی حقوق کو مقدم رکھتے ہوئے دیگر تمام تحفظات کو نظر انداز کرنا چاہتی تھیں۔

میرکل نہ صرف مضبوط اعصاب کی مالک ہیں بلکہ وہ منطق کا دامن بھی کبھی نہیں چھوڑتیں۔ تاہم روسی صدر پوٹن جرمن چانسلر کا امتحان لینا چاہتے تھے۔ میرکل کتوں سے خوفزدہ ہوتی ہیں، یہ بات پوٹن کو معلوم ہو گئی۔ سن 2007 میں جب میرکل روس کے دورے پر سوچی پہنچیں تو پوٹن نے اپنے کتے کونی کو بلاروک ٹوک میرکل کے قریب جانے دیا۔ تاہم میرکل نے میڈیا کے موجودگی میں مضبوط اعصاب دکھائے اور خوف کا کوئی ردعمل ظاہر نہ کیا۔

جرمن چانسلر انگیلا میرکل مسائل کے باوجود بھی پرسکون دکھائی دیتی ہیں۔ سن 2008 میں جب عالمی مالیاتی بحران پیدا ہوا تو میرکل نے یورو کو مضبوط بنانے کی خاطر بہت زیادہ محنت کی۔ اس بحران میں ان کی حکمت عملی نے میرکل کو’بحرانوں کو حل کرنے والی شخصیت‘ بنا ڈالا۔ میرکل کی کوششوں کی وجہ سے ہی اس بحران میں جرمنی کی معیشت زیادہ متاثر نہیں ہوئی تھی۔

ستائیس ستمبر 2009ء کے انتخابات میں جرمن چانسلر انگیلا میرکل کی سیاسی جماعت کرسچن ڈیموکریٹک یونین نے ایک مرتبہ پھر کامیابی حاصل کر لی۔ اس مرتبہ میرکل نے فری ڈیموکریٹک پارٹی (ایف ڈی پی) کے ساتھ اتحاد بنایا اور دوسری مرتبہ چانسلر کے عہدے پر منتخب کی گئیں۔

انگیلا میرکل کوالیفائڈ ماہر طبیعیات ہیں، غالبا اسی لیے وہ حتمی نتائج کے بارے میں زیادہ سوچتی ہیں۔ تاہم انہوں نے فوکو شیما کے جوہری حادثے کے بارے میں نہیں سوچا تھا۔ جاپان میں ہوئے اس خطرناک حادثے کے بعد جرمنی میں جوہری توانائی کے حامی فوری طور پر ایٹمی توانائی کے مخالف بن گئے۔ یوں میرکل کو بھی جرمن جوہری ری ایکٹرز کو بند کرنے کا منصوبہ پیش کرنا پڑا۔

ان کو کون پہچان سکتا ہے؟ یہ انگیلا میرکل کے شوہر یوآخم زاؤر ہیں، جو برلن کی ہیمبولٹ یونیورسٹی میں طبیعیات اور تھیوریٹیکل کیمسٹری کے پروفیسر ہیں۔ ان دونوں کی شادی 1998ء میں ہوئی تھی۔ عوامی سطح پر کم ہی لوگ جانتے ہیں کہ یوآخم زاؤر دراصل جرمن چانسلر کے شوہر ہیں۔

امریکی خفیہ ایجسنی این ایس اے کی طرف سے جرمن سیاستدانون کے ٹیلی فونز کی نگرانی کا اسکینڈل سامنا آیا تھا۔ یہ بھی کہا گیا کہ امریکا نے جرمن چانسلر انگیلا میرکل کے فون بھی ریکارڈ کیے۔ اس اسکینڈل پر جرمنی اور امریکا کے دوستانہ تعلقات میں بھی اتار چڑھاؤ دیکھا گیا۔ لیکن میرکل نے اس نازک وقت میں بھی انتہائی سمجھداری سے اپنے تحفظات واشنگٹن تک پہنچائے۔

انگیلا میرکل کے قدامت پسند اتحاد نے سن دو ہزار تیرہ کے وفاقی انتخابات میں واضح اکثریت حاصل کی اور سوشل ڈیموکریٹک پارٹی کے ساتھ مل کر حکومت سازی کی۔ ان انتخابات میں ان کی سابقہ اتحادی فری ڈیموکریٹک پارٹی کو شکست ہوئی اور وہ پارلیمان تک رسائی حاصل کرنے میں ناکام ہو گئی۔

میرکل دنیا بھر میں انتہائی مقبول ہیں لیکن یونان میں صورتحال کچھ مختلف ہے۔ سن 2014 میں جب یونان کا مالیاتی بحران شدید تر ہو چکا تھا تو جرمنی اور یونان کی ’پرانی دشمنی‘ کی جھلک بھی دیکھی گئی۔ لیکن میرکل اس وقت بھی اپنی ایمانداری اورصاف گوئی سے پیچھے نہ ہٹیں۔ بچتی کٹوتیوں اور مالیاتی اصلاحات کے مطالبات پر ڈٹے رہنے کی وجہ سے یونانی عوام جرمنی سے زیادہ خوش نہیں ہیں۔

انگیلا میرکل زیادہ تر اپنے جذبات آشکار نہیں ہونے دیتی ہیں۔ تاہم دیگر جرمنوں کی طرح انگیلا میرکل بھی فٹ بال کی دلدادہ ہیں۔ جب جرمن قومی فٹ بال ٹیم نے برازیل منعقدہ عالمی کپ 2014ء کے فائنل میں کامیابی حاصل کی تو میرکل اپنے جذبات کو قابو میں نہ رکھ سکیں۔ جرمن صدر بھی یہ میچ دیکھنے کی خاطر میرکل کے ساتھ ریو ڈی جینرو گئے تھے۔

حالیہ عرصے میں مہاجرین کی ایک بڑی تعداد جرمنی پہنچ چکی ہے۔ دوسری عالمی جنگ کے بعد یورپ کو مہاجرین کے سب سے بڑے بحران کا سامنا ہے۔ میرکل کہتی ہیں کہ جرمنی اس بحران سے نمٹ سکتا ہے۔ لیکن جرمن عوام اس مخمصے میں ہیں کہ آیا کیا جرمنی واقعی طور پر اس بحران پر قابو پا سکتا ہے۔ ابھی اس کے نتائج آنا باقی ہیں۔

تیرہ نومر کو پیرس میں ہوئے دہشت گردانہ حملوں کی وجہ سے فرانس بھر میں ہنگامی حالت نافذ کر دی گئی۔ انگیلا میرکل نے اپنے ہمسایہ ملک کو یقین دلایا ہے کہ برلن حکومت ہر ممکن تعاون کرے گی۔ کوئی شک نہیں کہ پیرس حملوں کے بعد کی صورتحال میرکل کے دس سالہ دور اقتدار میں انہیں پیش آنے والے چیلنجوں میں سب سے بڑا چیلنج ہے۔

انگیلا میرکل نے بیس نومبر سن دو ہزار سولہ کو اعلان کیا کہ وہ چوتھی مرتبہ بھی چانسلر بننے کے لیے تیار ہیں۔ انہیں اپنی پارٹی کی طرف سے مکمل حمایت حاصل رہی اور ان کا قدامت پسند اتحاد چوبیس ستمبر کے وفاقی انتخابات میں سب سے بڑی سیاسی طاقت بن کر ابھرا۔ یوں میرکل کے چوتھی مرتبہ بھی چانسلر بننے کی راہ ہموار ہو گئی۔

مارچ دو ہزار سترہ میں امریکی صدر ڈونلڈ ٹرمپ سے اپنی پہلی ملاقات میں جرمن چانسلر انگیلا میرکل نے انتہائی مہذب انداز میں ان سے پوچھا کہ کیا ہم صحافیوں کے سامنے ہاتھ ملا لیں؟ میزبان ٹرمپ نے منہ ہی دوسری طرف پھیر لیا۔ بعد میں ٹرمپ کا کہنا تھا کہ انہیں سوال سمجھ ہی نہیں آیا تھا۔

سن دو ہزار سترہ میں جی ٹوئنٹی اجلاس کے موقع پر انگیلا میرکل نے بہت کوشش کی کہ ٹرمپ عالمی ماحولیاتی معاہدے سے نکلنے کی اپنی ضد چھوڑ دیں۔ مگر ایسا نہ ہو سکا اور اس اہم موضوع پر ان دونوں رہنماؤں کے اختلافات ختم نہ ہوسکے۔

جرمن چانسلر انگیلا میرکل اور سابق امریکی صدر باراک اوباما ایک دوسرے پر اعتماد کرتے تھے اور ایسا باراک اوباما کے بطور صدر الوداعی دورہ جرمنی کے دوران واضح طور پر محسوس کیا جا سکتا تھا۔ باراک اوباما کے دور اقتدار کے بعد امریکی میڈیا نے جرمن چانسلر کو مغربی جمہوریت کی علامت اور ایک آزاد دنیا کی علمبردار قرار دیا تھا۔

جون دو ہزار گیارہ میں باراک اوباما کی طرف سے جرمن چانسلر انگیلا میرکل کو اعلیٰ ترین امریکی تمغہ آزادی سے نوازا گیا تھا۔ انہیں یہ انعام یورپی سیاست میں فعال کردار ادا کرنے کی وجہ سے دیا گیا تھا۔ اس اعزاز کو جرمنی اور امریکا کے مابین اچھے تعلقات کی ایک سند قرار دیا گیا تھا۔

جون دو ہزار پندرہ میں جرمنی میں ہونے والے جی سیون اجلاس تک میرکل اور اوباما کے تعلقات دوستانہ رنگ اخیتار کر چکے تھے۔ موسمیاتی تبدیلیوں کے خلاف اوباما نے جرمن چانسلر کو ہر مدد کی یقین دہانی کروائی تھی۔ لیکن ٹرمپ کے آتے ہی یہ سب کچھ تبدیل ہو گیا۔

نومبر دو ہزار سات میں جرمن چانسلر نے اپنے خاوند یوآخم زاور کے ہمراہ ٹیکساس میں صدر اوباما کے پیشرو جارج ڈبلیو بُش سے ملاقات کی۔ اس وقت بھی ایران کا موضوع زیر بحث رہا تھا، جیسا کی اب ڈونلڈ ٹرمپ کے ساتھ ہے۔

جارج ڈبلیو بُش نے جولائی سن دو ہزار چھ میں جرمن چانسلر میرکل کو اپنے انتخابی حلقے میں مدعو کرتے ہوئے خود انہیں بار بی کیو پیش کیا۔ اسی طرح بعد میں جرمن چانسلر نے بھی انہیں اپنے انتخابی حلقے میں بلایا تھا۔

جولائی دو ہزار سترہ میں سابق جرمن چانسلر ہیلموٹ کوہل کی تدفین کے موقع پر سابق امریکی صدر بل کلنٹن نے ایک پرسوز تقریر کی۔ انگیلا میرکل کا ہاتھ پکڑتے ہوئے ان کا کہنا تھا کہ وہ ہیلموٹ کوہل سے ’محبت کرتے‘ تھے۔

امریکی میڈیا کی طرف سے فرانسیسی صدر ایمانویل ماکروں کے دوستانہ رویے کی تعریف کرتے ہوئے کہا گیا تھا کہ وہ جانتے ہیں کہ صدر ٹرمپ کو کس طرح شیشے میں اتارا جا سکتا ہے۔ تاہم حقیقی طور پر یہ صرف ظاہری دوستی ہے۔ امریکی صدر نے محصولات اور ایران پالیسی کے حوالے سے اپنے اختلافات برقرار رکھے ہیں، جو فرانس اور جرمنی کے لیے باعث فکر ہیں۔

نیروبی کی اس کچی بستی کے رہائشیوں کے پاس صرف انتہائی ضرورت کے وقت استعمال کی جانے والی اشیاء ہی تھیں اور آگ نے وہ بھی ان سے چھین لیں۔ 28 جنوری کو کیجیجی بستی میں آتشزدگی کے نتیجے میں چار افراد ہلاک جبکہ 600 سے زائد بے گھر ہو گئے۔

بدھ چھ فروری کو یورپی پارلیمان میں یورپ کے مستقبل پر ہونے والی بحث کے دوران یورپی کمیشن کے سربراہ ژاں کلود ینکر نے بیلجیم کے سیاستدان گائے فرہوفشٹڈ کے بالوں کو چھیڑنا شروع کر دیا۔ فرہوفشٹڈ اس موقع پر اخبار پڑھ رہے تھے۔ یہ تصویر ظاہر کرتی ہے کہ بریگزٹ اور بڑھتی ہوئی عوامیت پسندی کے دور میں بھی یورپی سیاستدان ہماری طرح ہی کے لوگ ہیں۔

فحش فلموں کی امریکی اداکارہ اسٹیفانی کلیفورڈ عرف سٹورمی ڈینیئلز نیو یارک کی ایک عدالت میں سکیورٹی چیک اپ کے بعد اپنے جوتے پہن رہی ہیں۔ اس عدالتی معاملے کا تعلق ڈینیئلز اور امریکی صدر ڈونلڈ ٹرمپ کے مابین جنسی روابط سے تھا۔ ڈینیئلز کو ٹرمپ کے وکیل مائیکل کوہن نے انہیں اس موضوع پر کوئی بات نہ کرنے کے لیے ایک لاکھ تیس ہزار ڈالر دیے تھے۔ تاہم ڈینیئلز خاموش نہیں رہی تھیں۔

یہ تصویر امریکی ریاست جارجیا کی ہے، جہاں نیشنل سوشلسٹ تحریک کے ارکان نے نازی خفیہ علامات کا مظاہرہ کیا۔ اس موقع پر فوٹوگرافر گو ناکامورا بھی موجود تھے۔ یہ وہی سفید فام گروپ ہے، جو 2017ء شارلٹس وِل میں نکالی گئی ریلی میں بھی موجود تھا۔ شہری حقوق کی تنظیموں نے امریکا میں دائیں بازو کے شدت پسند گروپوں کے اثر و رسوخ میں اضافے کے خلاف خبردار بھی کیا تھا۔

جنوبی کوریا کے صدر مون جے ان اور شمالی کوریائی رہنما کم جونگ ان نے غیر عسکری زون میں مصافحہ کیا۔ اس موقع پر ان دونوں نے ایک دوسرے کے خلاف تمام تر جارحانہ کارروائیاں ختم کرنے کے عزم کا اعادہ بھی کیا۔ کیا یہ ایک نیا آغاز ہے؟

فرانس نے فٹ بال کی عالمی چیمپئن شپ کے فائنل میں کروشیا کو چار دو سے شکست دے دی۔ یہ تصویر فائنل میچ کے ختم ہونے کے بعد کی ہے، جس میں کھلاڑی اپنے کوچ کے ساتھ مل کر جیت کی خوشیاں منا رہے ہیں۔

یہ صرف شدید گرم موسم ہی نہیں تھا بلکہ خشک ترین بھی تھا۔ دریا اور جھیلیں خشک ہو گئے اور کسان اپنی فصلوں کی وجہ سے پریشان ہو گئے۔ یہ تصویر جرمن شہر ڈسلڈورف کی ہے، جہاں موسم گرما کے دوران دریائے رائن میں پانی کی سطح کم ہونے کی وجہ سے بحری جہازوں کی صرف محدود آمد و رفت ہی ممکن رہ گئی تھی۔

یہ تصویر آیہ کی ہے، جو کوپن ہیگن کی سڑکوں پر نقاب پہن کر گھوم پھر رہی ہیں۔ ڈنمارک میں عوامی مقامات پر چہرے پر نقاب اوڑھنا غیر قانونی ہے۔ آیہ کے اس اقدام کا مقصد کوپن ہیگن حکومت کی جانب سے نقاب پر پابندی لگائے جانے کے خلاف احتجاج کرنا تھا۔

ایک فلسطینی شہری اور ایک اسرائیلی فوجی ایک دوسرے سے جھگڑ رہے ہیں۔ یہ جھگڑا غرب اردن کے علاقے میں ایک فلسطینی اسکول بند کرنے کے اسرائیلی اعلان کے بعد شروع ہوا تھا۔

لوئس آکوسٹا ہاتھوں میں پانچ سالہ اینجل جیزز کو اٹھا کر گوئٹے مالا اور میکسیکو کے درمیان بہنے والے ایک دریا کو عبور کر رہا ہے۔ یہ دونوں وسطی امریکی مہاجرین پر مشتمل اس قافلے کا حصہ ہیں، جو امریکا جانا چاہتے ہیں۔ اس مقصد کے لیے یہ مہاجرین ہر قسم کا خطرہ مول لینے کو تیار ہیں۔

یہ تصویر مالیبو، کیلیفورنیا کی ہے، جسے زمین پر جنت سے تعبیر کیا جاتا ہے۔ نومبر کے اوائل میں یہ بہشت شعلوں کی لپیٹ میں آ گئی۔ اس آتشزدگی میں کم از کم 85 افراد ہلاک ہوئے جبکہ بڑے بڑے بنگلے اور کوٹھیاں بھی جل کر راکھ ہو گئے۔

’یہ میرے لیے ایک اعزاز کی بات تھی،‘ یہ تھے جرمن چانسلر انگیلا میرکل کے اپنی جماعت کرسچین ڈیموکریٹک یونین کی قائد کے طور پر آخری الفاظ۔ وہ اٹھارہ سال تک اس پارٹی کی سربراہ رہنے کے بعد اس عہدے سے الگ ہو گئیں۔ ان کی جگہ اب سی ڈی یو کی سربراہ آنے گریٹ کرامپ کارن باؤر ہیں۔

نہ تو جنگ اور نہ ہی کوئی قدرتی آفت۔ دنیا کے دیگر خطوں کے مقابلے میں یورپ میں حالات قدرے بہتر ہیں۔ تاہم اس کے باوجود جرمنی، فرانس اور بیلجیم کے شہری کم تنخواہوں، مہنگے کرایوں، کم ہوتی ہوئی پینشن اور بڑھتی ہوئی مہنگائی کی وجہ سے پریشانی میں مبتلا ہیں۔ ابھی حال ہی میں فرانس میں پیلی جیکٹیں پہن کر شہریوں نے حکومت مخالف مظاہرے کیے۔

انڈونیشیا میں آنے والی سونامی لہروں کے باعث ہلاکتوں کی تعداد بڑھ کر چار سو سے زائد ہو گئی۔ ہنگامی امدادی مرکز کے مطابق ایک ہزار سے زائد افراد زخمی ہوئے۔ متاثرہ علاقوں میں کئی سو عمارات ملبے کے ڈھیر بن گئیں۔ ہفتہ بائیس دسمبر کو خلیج سنڈا میں آنے والی اس قدرتی آفت سے سماٹرا کا جنوبی اور جاوا کا مغربی حصہ سب سے زیادہ متاثر ہوئے۔ یہ علاقے اپنے خوبصورت ساحلوں کی وجہ سے بہت مشہور ہیں۔