جنسی ہراسانی اسکینڈل: مس یونیورس کی انڈونیشیا سے راہیں جدا
14 اگست 2023
انڈونیشیا میں مس یونیورس کے مقابلوں میں حصہ لینے والی خواتین نے مقامی منتظمین پر جنسی ہراسانی کے الزامات لگائے تھے۔ مس یونیورس آرگنائزیشن نے اس سال ملائیشیا میں ہونے والا مقابلہ حسن بھی ملتوی کر دیا۔
اشتہار
مس یونیورس کے مقابلوں کا انعقاد کرانے والی تنظیم نے اعلان کیا ہے کہ وہ جنسی ہراسانی کے الزامات سامنے آنے کے بعد انڈونیشیا کی فرنچائز کے ساتھ اپنے تعلقات منقطع کر لے گی۔
ہم اب تک کیا جانتے ہیں؟
مس یونیورس نے پہلے ٹوئٹر اور اب ایکس کے نام سے مشہور سوشل میڈیا پلیٹ فارم پر لکھا،''یہ واضح ہو گیا ہے کہ یہ فرنچائز ہمارے برانڈ کے معیارات، اخلاقیات، یا ہماری فرنچائز ہینڈ بک اور ضابطہ اخلاق میں بیان کردہ توقعات پر پورا نہیں اتری۔‘‘
تنظیم نے کہا کہ وہ''انڈونیشیا میں اپنی موجودہ فرنچائز اور اس کی نیشنل ڈائریکٹر پوپی کپیلا کے ساتھ تعلقات ختم کر دے گی۔‘‘ نصف درجن خواتین نے مس یونیورس انڈونیشیا کی منتظم پر جنسی طور پر ہراساں کرنے کا الزام لگایا تھا۔ ان خواتین کا کہنا تھا کہ ان کی جلد کی خامیوں یا سیلولائٹ کو دیکھنے کے لیے بے لباس 'باڈی چیک‘ پر مجبور کیا۔
جکارتہ میں پولیس نے کہا ہے کہ انہوں نے ان الزامات کی تحقیقات شروع کر دی ہیں۔
مس یونیورس ملائیشیا کا مقابلہ بھی ختم
مس یونیورس آرگنائزیشن نے یہ بھی کہا کہ اس سال مس یونیورس ملائیشیا کا مقابلہ نہیں ہوگا کیونکہ انڈونیشیا کی فرنچائز کو اس مقابلے کی نگرانی بھی سونپی گئی ہے۔ انڈونیشیا کی فرنچائز ڈائریکٹر پوپی کیپیلا نے اپنی انسٹاگرام پوسٹ میں ان الزامات کی تردید کی۔
’’میں بطور نیشنل ڈائریکٹر اور مس یونیورس انڈونیشیا کے لائسنس کے مالک کے طور پرمس یونیورس 2023 کے انعقاد کے عمل میں حصہ لینے والے کسی بھی شخص کی طرف سے باڈی چیک کے ذریعے جنسی تشدد یا ہراسانی کےمعاملے سے واقف ہوں نہ میں نے ایسا کرنے کے لیے کسی کو بھی حکم، درخواست یا اجازت دی۔‘‘
انڈونیشیا میں ہر سال خواتین مس یونیورس کے مقابلے میں حصہ لیتی ہیں۔ فبینے نکول اس سال کی مس انڈونیشیا ہیں اور وہ اب بھی نومبر میں ایل سلواڈور میں ہونے والے مس یونیورس کے عالمی مقابلے میں حصہ لینے کے لیے تیار ہیں۔
ش ر ⁄ ع ا (روئٹرز، اے پی)
ہرناز سندھو کون ہیں؟
بھارت کی ہرناز سندھو سال2021 کی مس یونیورس قرار پائی ہیں۔ بالی ووڈ, میں کام کرنے والی ہرناز نے تقریباً 80 امیدواروں کو مات دے کر حسینہ کائنات کا تاج اپنے نام کیا۔ یہ مقابلہ حسن اسرائیل کے شہر ایلات میں منعقد ہوا تھا۔
تصویر: MENAHEM KAHANA/AFP/Getty Images
کون ہیں ہرناز؟
اکیس سالہ ہرناز بھارتی صوبے پنجاب کے شہر چنڈی گڑھ میں پیدا ہوئیں۔ وہیں ان کی پرورش و پرداخت ہوئی۔ وہیں سے انہوں نے اسکول اور کالج کی تعلیم حاصل کی۔
تصویر: Menahem Kahana/AFP/Getty Images
خوداعتمادی سب سے اہم
نوجوان خواتین کو درپیش چیلنجز کے حوالے سے پوچھے گئے ایک سوال کے جواب میں ہرناز سندھو کا کہنا تھا، ''آج کے نوجوانوں پر سب سے بڑا دباؤ ان کی اپنی خود اعتماد ی کا ہے۔ یہ جاننا کہ آپ منفرد ہیں آپ کو خوبصورت بناتا ہے۔ خود کا دوسرے سے موازنہ کرنا بند کیجیے اورزندگی اور ضروری چیزوں کے بارے میں سوچیے۔‘‘
تصویر: Menahem Kahana/AFP/Getty Images
21برس بعد بھارت کی کامیابی
ہرناز سندھو نے بھارت کے لیے 21 برس کے وقفے کے بعد مس یونیورس کا اعزاز جیتا ہے۔ اس سے قبل سن 2000 میں لارا دتہّ اور سن 1994میں سشمتا سین نے مس یونیورس کا خطاب جیتا تھا۔ دونوں بالی ووڈ کی اداکارہ ہیں۔
تصویر: Menahem Kahana/AFP/Getty Images
پیراگوئے دوسرے نمبر پر
پیراگوئے کی نادیہ فریرا حسینہ کائنات کے 70 ویں مقابلے میں دوسرے نمبر پر رہیں۔ جنوبی افریقہ کی لالیلا مسوانے نے تیسری پوزیشن حاصل کی۔ جنوبی افریقی حکومت نے فلسطینیوں کی اپیل پر اس پروگرام کی سرکاری طورپر تائید نہیں کی تھی۔
تصویر: Menahem Kahana/AFP/Getty Images
ماڈلنگ بھی اداکاری بھی
ہرناز سندھو ماڈلنگ اور اداکاری کے میدان میں بھی سرگرم ہیں۔ وہ 'یاراں دیاں پو باراں‘ اور ' بائی جی کٹانگے' جیسی پنجابی فلموں میں بھی کام کرچکی ہیں۔
تصویر: Ariel Schalit/AP Photo/picture alliance
پہلے بھی کئی خطاب جیت چکی ہیں
ہرناز سندھو سن 2017 سے حسن کے مقابلوں میں حصہ لیتی رہی ہیں اور کئی خطاب جیت چکی ہیں۔ سن 2017 میں ٹائمس فریش فیس مس چنڈی گڑھ منتخب ہوئی تھی۔ 2019 میں انہوں نے فیمینا مس انڈیا پنجاب کا خطاب جیتا تھا۔ سن 2019 میں ہی فیمینا مس انڈیا مقابلے میں چوٹی کے بارہ امیدواروں میں اپنی جگہ بنائی تھی۔